លោកស ខេង ធ្វើដំណើរទស្សនៈកិច្ចទៅវៀតណាម ក្រោយចប់ថ្ងៃ ៧មករា
លោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃ កាលពីថ្ងៃម្សិលមិញបានដឹកនាំគណៈប្រតិភូរបស់លោកទៅបំពេញទស្សនកិច្ចនៅវៀតណាមរយៈពេល ៣ថ្ងៃ។ ដំណើរទស្សនៈកិច្ចនេះ ធ្វើឡើងជារៀងរាល់ឆ្នាំ ដើម្បីពិនិត្យលើកិច្ចព្រមព្រៀងរវាងប្រទេសទាំងពីរ ដែលបានចុះហត្ថលេខានាពេលកន្លងមក។ ជាដំណើរទស្សនៈកិច្ច ដែលធ្វើឡើងក្រោយពីកម្ពុជា បានប្រារព្ធខួបលើកទី ៣៨ឆ្នាំ នៃជ័យជំនះលើរបបកម្ពុជាប្រជាធិបតេយ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
លោកខៀវ សុភ័គ្រ អ្នកនាំពាក្យក្រសួងមហាផ្ទៃបានឲ្យដឹងថាដំណើរទស្សនៈកិច្ចនេះ ធ្វើឡើងជារៀងរាល់ឆ្នាំ ដែលនេះការផ្លាស់ប្តូរទស្សនៈកិច្ចរវាងប្រទេសទាំងពីរ ដើម្បីពិនិត្យមើលលើកិច្ចព្រមព្រៀង របស់ភាគីទាំងពីរធ្លាប់បានចុះហត្ថលេខាជាមួយគ្នាកន្លងមក។ ដំណើរទស្សនៈកិច្ចនេះ ក៏ផ្តោតជាសំខាន់លើកិច្ចសហប្រតិបត្តិការរវាងក្រសួងនគរបាលវៀតណាម និងក្រសួងមហាផ្ទៃវៀតណាម។
យោងតាមការចុះផ្សាយរបស់សារព័ត៌វៀតណាមនៅថ្ងៃទី១០ ខែមករា បានឲ្យដឹងថាលោកស ខេង បានជួបជាមួយនាយករដ្ឋមន្ត្រីវៀតណាម លោក Nguyen Xuan Phuc និងប្រធានាធិបតីវៀតណាមលោក Trần Đại Quang កាលពីថ្ងៃទី ៩ ខែមករា នៅទីក្រុងហាណូយ។
ក្នុងជំនួបនោះ ប្រធានាធិបតីវៀតណាមបានលើកឡើងថាចំណងទំនាក់ទំនងរបស់ក្រសួងទាំងពីរ ពោលគឺក្រសួងសន្តិសុខជាតិវៀតណាម និងក្រសួងមហាផ្ទៃកម្ពុជា ដែលកំពុងលូតលាស់នៅពេលនេះ បានឆ្លុះបញ្ចាំងពីកិច្ចសហប្រតិបត្តិការដ៏មានប្រសិទ្ធភាពរវាងកម្ពុជា និងវៀតណាម នៅក្នុងកិច្ចការពារសន្តិសុខជាតិ សណ្តាប់ធ្នាប់សង្គម សុវត្ថិភាព ការពង្រឹងសន្តិភាព និងស្ថេរភាព។ នេះបើតាមការចុះផ្សាយរបស់សារព័ត៌មានវៀតណាម Vietname News។
លោកស ខេង ក្នុងជំនួបជាមួយថ្នាក់ដឹកនាំជាន់ខ្ពស់វៀតណាមបានថ្លែងថា ដំណើរទស្សនៈកិច្ចរបស់លោកនៅពេលនេះ គឺជាឱកាស ដើម្បីបង្ហាញពីការដឹងគុណចំពោះវៀតណាម និងពលរដ្ឋវៀតណាម ដែលបានរំដោះប្រទេសកម្ពុជាចេញពីរបបខ្មែរក្រហម។ លោកស សខេង បញ្ជាក់ថា បើគ្មានជ័យជំនះថ្ងៃ ៧មករា ១៩៧៩ទេ ប្រជាពលរដ្ឋកម្ពុជានឹងគ្មានសុភមង្គលដូចសព្វថ្ងៃនេះឡើយ។
ចំណែកជំនួបដាច់ដោយឡែកមួយទៀតរវាងនាយករដ្ឋមន្ត្រីវៀតណាមក្នុងថ្ងៃដដែលនោះ លោកនាយករដ្ឋមន្ត្រីវៀតណាមបានជូនពរកម្ពុជាឲ្យទទួលបានជោគជ័យសម្រាប់ការបោះឆ្នោតឃុំសង្កាត់ក្នុងខែមិថុនា ឆ្នាំ២០១៧ និងការបោះឆ្នោតសកលខែកក្កដា ឆ្នាំ២០១៨ខាងមុខ។ នាយករដ្ឋមន្ត្រីវៀតណាមបានស្នើឲ្យភាគីកម្ពុជាបង្កើតលក្ខខណ្ឌអំណោយផលសម្រាប់សហគមន៍ជនវៀតណាមនៅក្នុងប្រទេសកម្ពុជា ដើម្បីដោះស្រាយជីវិតរបស់ពួកគេ ដែលនេះគឺជាការរួមចំណែកដល់ការពង្រឹងទំនាក់ទំនងទ្វេភាគីប្រទេសទាំងពីរ។
សូមបញ្ជាក់ថាដំណើរទស្សនៈកិច្ចរបស់លោកឧបនាយករដ្ឋមន្ត្រី ស ខេង នៅពេលនេះធ្វើឡើង ក្រោយពីលោកនាយករដ្ឋមន្ត្រីហ៊ុន សែន បានធ្វើដំណើរទស្សនៈកិច្ចផ្លុវរដ្ឋមួយទៅប្រទេសវៀតណាម កាលពីថ្ងៃទី ២០ ដល់ថ្ងៃទី២១ ខែធ្នូ ឆ្នាំ២០១៦កន្លងទៅ។ ក្នុងដំណើរទស្សនៈកិច្ចនោះ លោកនាយករដ្ឋមន្ត្រីកម្ពុជា និងនាយករដ្ឋមន្ត្រីវៀតណាមក៏បានធ្វើសាក្សីក្នុងពិធីចុះកិច្ចព្រមព្រៀងចំនួន ៣ រវាងកម្ពុជា និងវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ