អ្នកសង្កេតការណ៍៦ប្រទេស គាំទ្រការបោះឆ្នោតនៅកម្ពុជា
អ្នកសង្កេតការណ៍អន្តរជាតិមកពី៦ប្រទេស ដែលជាសមាជិកគណៈកម្មការជាតិរៀបចំការបោះឆ្នោតនៃប្រទេសនីមួយៗ បានធ្វើសន្និសីទកាសែតមួយនៅព្រឹកថ្ងៃទី ៣០ កក្កដា នេះ នៅក្នុងទីក្រុងភ្នំពេញ ដោយបានវាយតម្លៃជារួមថា ការបោះឆ្នោតនៅក្នុងប្រទេសកម្ពុជា កាលពីថ្ងៃអាទិត្យ បានប្រព្រឹត្តទៅដោយសេរី ត្រឹមត្រូវ និងយុត្តិធម៌។ ការវាយតម្លៃនេះ គឺបន្ទាប់ពីពួកគេបានចំណាយពេលតាមដានមើលដំណើរការបោះឆ្នោតពេញមួយថ្ងៃ កាលពីម្សិលមិញ។
ចុះផ្សាយនៅថ្ងៃ៖
ស្តាប់ - ០២:១២
តំណាងប្រទេសទាំង៦នោះ រួមមាន ប្រទេសវៀតណាម ប្រទេសឥណ្ឌា ម៉ាឡេស៊ី ថៃ ឡាវ និងប្រទេសរុស្ស៊ីជាដើម។ ពួកគេ បានថ្លែងនៅក្នុងសន្និសីទកាសែតរួមគ្នាមួយ នៅថ្ងៃទី ៣០ កក្កដា ក្នុងសម្លេងតែមួយថា ការបោះឆ្នោតនៅក្នុងប្រទេសកម្ពុជា កាលពីថ្ងៃអាទិត្យ បានប្រព្រឹត្តទៅដោយសេរី ត្រឹមត្រូវ យុត្តិធម៌ និងធ្វើឡើងក្នុងបរិកាសល្អប្រសើរ។
ផ្តើមពីលោក ប្រាស៊ីត សាយ៉ាស៊ីត (Prasith Sayasith) ឯកអគ្គរដ្ឋទូតឡាវប្រចាំនៅកម្ពុជា លោកបានកត់សំគាល់ថា ការបោះឆ្នោតនៅកម្ពុជា បានធ្វើឡើងក្នុងស្ថានភាព សន្តិភាព សន្តិវិធី និងគ្មានអំពើហិង្សាឡើយ។ លោកបានកើតសរសើរការបោះឆ្នោតនៅកម្ពុជាថា បានប្រព្រឹត្តទៅដោយរលូន ហើយបញ្ជីឈ្មោះបោះឆ្នោតមានទាំងរូបថតរបស់អ្នកបោះឆ្នោត ដែលជាចំណុចល្អប្រសើរ បើប្រៀបធៀបនឹងបញ្ជីឈ្មោះបោះឆ្នោតនៅក្នុងប្រទេសថៃ។
ដូចគ្នានេះដែរ លោក Sergey sirotkin តំណាងប្រទេសមកពីរុស្ស៊ីបានកើតសរសើរការបោះឆ្នោតនៅកម្ពុជាថា ជាការបោះឆ្នោតមួយប្រកបដោយវិជ្ជាជីវៈ ហើយប្រជាពលរដ្ឋជាច្រើនបានទៅសំដែងឆន្ទៈរបស់ពួកគេ។ លោក Sergey sirotkin បានចុះទៅសង្កេតឃ្លាំមើល៧ការិយាល័យនៃការបោះឆ្នោតនោះថា គ្មានអំពើហិង្សាកើតឡើងនោះទេ។ ដោយឡែកតំណាងមកពីប្រទេសឥណ្ឌា លោក Frederick Roy Kharkongor បានចាប់ផ្តើមដោយការអបអរសាទរចំពោះការបោះឆ្នោតនៅកម្ពុជា។ លោក Frederick Roy Kharkongor កាន់តែរីករាយថែមទៀត នៅពេលដែលការបោះឆ្នោតនៅកម្ពុជា បានប្រើប្រាស់ទឹកថ្នាំជ្រលក់ដៃ ដែលបញ្ជាទិញមកពីប្រទេសរបស់លោក។ សូមបញ្ជាក់ថា ឥណ្ឌាដែលជាប្រទេសប្រកាន់របបប្រជាធិបតេយ្យយូឆ្នាំនៅអាស៊ី។ មិនខុសគ្នានោះទេ តំណាងគណៈកម្មការជាតិរៀបចំការបោះឆ្នោតមកពីប្រទេសម៉ាឡេស៊ី វៀតណាម និងប្រទេសថៃផង សុទ្ធតែបានអបអរសាទរចំពោះលទ្ធផលនៃការបោះឆ្នោតនៅកម្ពុជា។ ពួកគេរកមិនឃើញឡើយ នូវបញ្ហាមិនប្រក្រតី ទោះបីជាអ្នកកាសែតបានសួរនាំច្រើនពីភាពមិនប្រក្រតីនៃការបោះឆ្នោត។
សូមបញ្ជាក់ថា ការបោះឆ្នោតនៅកម្ពុជាបានបិទបញ្ចប់ទៅកាលពីថ្ងៃអាទិត្យ ដោយមានប្រជាពលរដ្ឋទៅបោះឆ្នោតប្រមាណជា ៨២.១៧% បានចេញទៅបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ