សកម្មជនព្រះសង្ឃដ៏លេចធ្លោមួយអង្គ ត្រូវបានតុលាការក្រុងភ្នំពេញកោះហៅជាលើកទី៣ក្នុងបណ្តឹងបរិហាកេរ្តិ៍
សកម្មជនព្រះសង្ឃដ៏លេចធ្លោមួយអង្គ ព្រះនាម ប៊ុត ប៊ុនតិញ ត្រូវបានតុលាការក្រុងភ្នំពេញ ចេញដីកាកោះហៅជាលើកទី៣ ឲ្យនិមន្តទៅបំភ្លឺនៅតុលាការសាលាដំបូងរាជធានីភ្នំពេញ នាព្រឹកថ្ងៃទី១៧ខែមីនាខាងមុខ។ ព្រះតេជគុណ ប៊ុត ប៊ុនតិញ ដែលគេដឹងថា ជាស្ថាបនិកបណ្តាញព្រះសង្ឃឯករាជ្យដើម្បីយុត្តិធម៌សង្គមនិងបរិស្ថាន បានរងបណ្តឹងបរិហារកេរ្តិ៍ជាសាធារណៈរបស់ លោក ម៉ម សូណង់ដូរ ប្រធានគណបក្សសំបុកឃ្មុំសង្គមប្រជាធិបតេយ្យ កាលពីខែកញ្ញាឆ្នាំមុន។ ព្រះតេជគណ ប៊ុត ប៊ុនតិញ ដែលកំពុងស្ថិតនៅសហរដ្ឋអាមេរិក បានមានសង្ឃដីកាបញ្ជាក់ថា ព្រះអង្គមិនអាចចូលបំភ្លឺតាមការកំណត់នេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
សកម្មជនព្រះសង្ឃដ៏លេចធ្លោ ព្រះតេជគណ ប៊ុត ប៊ុនតិញ ត្រូវបានតុលាការក្រុងភ្នំពេញចេញដីកាកោះហៅជាលើកទី៣ ឲ្យនិមន្តទៅកាន់តុលាការក្រុងភ្នំពេញ នៅថ្ងៃទី១៧មីនាសប្តាហ៍ក្រោយនេះ ជុំវិញពាក្យបណ្តឹងរបស់លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ។ នេះបើយោងតាមដីកាដែលចេញដោយលោក ស្រី ម៉ាកនី ព្រះរាជអាជ្ញារងអមតុលាការក្រុងភ្នំពេញ កាលពីថ្ងៃទី១០ មីនា ម្សិលមិញនេះ។
លោក ម៉ម សូណង់ដូ ដែលបានប្តឹងព្រះតេជគណ ប៊ុត ប៊ុនតិញ ពីបទបរិហាកេរ្តិ៍ជាសាធារណៈ កាលពីថ្ងៃទី ១ ខែកញ្ញា ឆ្នាំ២០១៣ ដោយទាមទារសំណងជំងឺចិត្ត១ម៉ឺនរៀល និងស្នើសុំឲ្យតុលាការពិចារណាផ្សឹកព្រះតេជគុណ ប៊ុត ប៊ុនតិញ។
ពាក្យបណ្តឹងរបស់លោក ម៉ម សូណង់ដូ កាលណោះ គឺបន្ទាប់ពីព្រះអង្គ ប៊ុត ប៊ុនតិញ បានមានសង្ឃដីកាថា ការចេញមកបង្កើតគណបក្សឡើងវិញរបស់លោក ម៉ម សូណង់ដូ គឺដោយសារតែលោកអាក់អន់ស្រពន់ចិត្តចំពោះលោក សម រង្ស៊ី ដែលមិនបានផ្តល់តួនាទីអ្វីសោះដល់លោកនៅក្នុងជួរដឹកនាំគណបក្សប្រឆាំង ក្រោយពីបោះឆ្នោតជាតិកាលពីឆ្នាំ២០១។ ប៉ុន្តែលោក ម៉ម សូណង់ដូ ដែលបច្ចុប្បន្នមានវ័យ៧៥ឆ្នាំទៅហើយនោះ បានចាត់ទុកថា ការអត្ថាធិប្បាយរបស់ព្រះតេជគណ ប៊ុត ប៊ុនតិញ ជារឿងមិនពិត និងជាការបរិហាកេរ្តិ៍រូបលោក។
សូមបញ្ជាក់ថា នេះគឺជាលើកទី៣ហើយ ដែលព្រះរាជអាជ្ញារង តុលាការក្រុងភ្នំពេញ លោក ស្រី ម៉ាកនី បានចេញដីកាកោះហៅសកម្មជនព្រះសង្ឃដ៏លេចធ្លោ ហើយដែលមានសមានចិត្តចំពោះគណបក្សប្រឆាំងអង្គនេះទៅកាន់តុលាការ។ កាលពីថ្ងៃទី២១ ខែវិច្ឆិកា តុលាការក្រុងភ្នំពេញ ក៏បានចេញដីកាកោះហៅព្រះអង្គឲ្យចូលបំភ្លឺនៅតុលាការម្តងរួចមកហើយ ប៉ុន្តែព្រះអង្គបានខកខាន។ យ៉ាងណាក្តី នៅលើកទី៣នេះ ព្រះតេជគណ ប៊ុត ប៊ុនតិញ បានមានសង្ឃដីកាពីសហរដ្ឋអាមេរិកបញ្ជាក់ថា បើទោះបីជាព្រះអង្គមិនអាចចូលបំភ្លឺតាមការកំណត់របស់តុលាការក្តី ប៉ុន្តែព្រះអង្គនឹងពឹងពាក់មេធាវីម្នាក់ ដើម្បីជួយការពារក្តី នឹងចូលខ្លួនជំនួសនៅថ្ងៃទី ១៧ មីនាសប្តាហ៍ក្រោយនេះ។ ព្រះតេជគណប៊ុត ប៊ុនតិញ ដែលកំពុងស្ថិតនៅសហរដ្ឋអាមេរិក បានចាត់ទុកដីកាកោះហៅជាលើកទី៣នេះថា គឺជាការគំរាមកំហែងព្រះអង្គ មិនឲ្យវិលត្រឡប់ចូលមកកាន់ប្រទេសកម្ពុជាវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ