លោកស្រី មូរ សុខហួរ គ្រោងវិលត្រលប់ទៅអាមេរិកវិញ ក្រោយអាជ្ញាធរថៃបិទមិនឲ្យចូល
លោកស្រី មូរ សុខហួរ មន្ត្រីជាន់ខ្ពស់អតីតគណបក្សសង្គ្រោះជាតិ មានគម្រោងវិលត្រលប់ទៅកាន់សហរដ្ឋអាមេរិកវិញ ក្រោយពីអាជ្ញាធរថៃហាមឃាត់មិនឲ្យលោកស្រីធ្វើដំណើរចូលប្រទេសថៃកាលពីថ្ងៃអាទិត្យ។ លោកស្រី មូរ សុខហួរ គឺជាថ្នាក់ដឹកនាំជាន់ខ្ពស់ម្នាក់ក្នុងចំណោម០៩នាក់ ដែលត្រូវបានរដ្ឋាភិបាលកម្ពុជាចោទប្រកាន់ពីបទ «ឧបឃាត» ឬប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាលកម្ពុជា ក្រោមផែនការមាតុភូមិនិវត្តន៍របស់លោក សម រង្ស៊ី នៅថ្ងៃទី ០៩ វិច្ឆិកា។
ចុះផ្សាយនៅថ្ងៃ៖
ស្តាប់ - ០២:១៥
លោកស្រី មូរ សុខហួរ គឺជាមន្ត្រីជាន់ខ្ពស់នៃអតីតគណបក្សសង្គ្រោះជាតិទីមួយ ដែលត្រូវបានអាជ្ញាធរថៃហាមឃាត់មិនឲ្យចូលទឹកដីរបស់ថៃកាលពីថ្ងៃអាទិត្យ។ បន្ទាប់ពីការបដិសេធនេះ លោកស្រីគ្រោងនឹងធ្វើដំណើរវិលត្រលប់ទៅកាន់សហរដ្ឋអាមេរិកវិញ ជាជាងការបន្តនៅក្នុងប្រទេសម៉ាឡេស៊ី ឬប្រទេសឥណ្ឌូនេស៊ី ដែលអាចត្រូវបានគេបណ្ដេញចេញម្ដងទៀត។ នេះបើតាមការចុះផ្សាយរបស់សារព័ត៌មានអូស្ត្រាលីឈ្មោះ The Age and The Sydney Morning Herald នៅថ្ងៃទី ២៣ តុលានេះ។
លោកស្រី មូរ សុខហួរ បានប្រាប់សារព័ត៌មាននេះពីប្រទេសម៉ាឡេស៊ីថា កាលពីថ្ងៃអាទិត្យ លោកស្រីត្រូវបានអាជ្ញាធរថៃ បង្ខំដាក់នៅក្នុងបន្ទប់ពិសេសមួយ។ ពួកគេ (អាជ្ញាធរថៃ) បានឃ្លាំមើលលោកស្រី ហើយបន្ទាប់មក បុគ្គលិកក្រុមហ៊ុនអាកាសចរណ៍ម៉ាឡេស៊ី (Malaysian Airlines) បានប្រឹងប្រែងស្វែងរកជើងហោះហើរថ្មី ដើម្បីឲ្យលោកស្រីធ្វើដំណើរវិលត្រឡប់ទៅកាន់ប្រទេសម៉ាឡេស៊ីវិញ។ បើតាមលោកស្រី មូរ សុខហួរ ដែលបានថ្លែងប្រាប់សារព័ត៌មានអូស្ត្រាលីខាងលើនេះថា លោកស្រីមិនត្រូវបានអនុញ្ញាតឲ្យឆ្លងព្រំដែនឡើយ ហើយលោកស្រីក៏មិនត្រូវបានអាជ្ញាធរថៃអនុញ្ញាតឲ្យចាកចេញពីអាកាសយានដ្ឋានដែរ។ ដូច្នេះ ជំនួសឲ្យការធ្វើដំណើរទៅកាន់ទីក្រុងចាកាតា ប្រទេសឥណ្ឌូនេស៊ី លោកស្រីបានសម្រេចចិត្តថា នឹងវិលត្រឡប់ទៅកាន់សហរដ្ឋអាមេរិកវិញ ជាជាងត្រូវបានគេបណ្ដេញចេញពីប្រទេសឥណ្ឌូណេស៊ីសារជាថ្មីម្ដងទៀត។ នេះបើតាមសារព័ត៌មានអូស្រ្តាលី The Age and The Sydney Morning Herald។
គួរជំរាបជូនថា លោកស្រី មូរ សុខហួរ គឺជាថ្នាក់ដឹកនាំជាន់ខ្ពស់ម្នាក់ក្នុងចំណោម០៩នាក់ នៃអតីតគណបក្សសង្គ្រោះជាតិ ដែលត្រូវបានរដ្ឋាភិបាលកម្ពុជាចោទប្រកាន់ពីបទ «ឧបឃាត» ឬប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាលកម្ពុជា ក្រោមផែនការមាតុភូមិនិវត្តន៍របស់លោក សម រង្ស៊ី នៅថ្ងៃទី ០៩ វិច្ឆិកា ខាងមុខនេះ។ ប៉ុន្តែក្រោមការស្នើសុំរបស់រដ្ឋាភិបាលកម្ពុជា លោកស្រី មិនត្រូវបានអនុញ្ញាតឲ្យចូលទឹកដីថៃឡើយ កាលពីរសៀលថ្ងៃអាទិត្យ ដោយសារតែលោកស្រីមានឈ្មោះនៅក្នុងបញ្ជីខ្មៅរបស់ថៃ។
សូមបញ្ជាក់ថា តាមរយៈក្រសួងការបរទេស រដ្ឋាភិបាលកម្ពុជា កាលពីខែមុន បានបញ្ជូនដីកាចាប់ខ្លួនលោក សម រង្ស៊ី លោកស្រី មូរ សុខហួរ និងថ្នាក់ដឹកនាំអតីតគណបក្សសង្គ្រោះជាតិដែលកំពុងរស់នៅដោយនិរទេសខ្លួននៅក្រៅប្រទេសមួយចំនួនទៀត ទៅកាន់ប្រទេសជាសមាជិកអាស៊ានទាំងអស់។ ការហាមឃាត់លោកស្រី មូរ សុខហួរ មិនឲ្យចូលប្រទេសថៃតាមផ្លូវគោកនេះ មានន័យថា គម្រោងមាតុភូមិនិវត្តន៍របស់ថ្នាក់ដឹកនាំអតីតគណបក្សសង្គ្រោះជាតិ ដែលរួមមានលោក សម រង្ស៊ី ផងនៅថ្ងៃទី ០៩ វិច្ឆិកា ខាងមុខ កំពុងជួបឧបសគ្គ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ