តើដំណើរការបោះឆ្នោតព្រឹទ្ធសភា ឆ្នាំ២០១៨ ប្រព្រឹត្តទៅយ៉ាងដូចម្ដេចខ្លះ?
ការបោះឆ្នោតជ្រើសតាំងសមាជិកព្រឹទ្ធសភា នឹងរៀបចំធ្វើនៅថ្ងៃទី១៤មករាឆ្នាំ២០១៨។ ការបោះឆ្នោតនីតិកាលទី៤ ឆ្នាំ២០១៨នេះ មានការប្រែប្រួលខ្លះៗខុសពីការបោះឆ្នោតនីតិកាលទី៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ចំនួនអាសនៈព្រឹទ្ធសភា កើនឡើងពី៦១ ទៅ៦២អាសនៈ។ សមាជិកព្រឹទ្ធសភាចំនួន៤រូបត្រូវតែងតាំងដោយព្រះមហាក្សត្រនិងរដ្ឋសភា និង៥៨រូបទៀត នឹងត្រូវបោះឆ្នោតជ្រើសតាំងតាមរយៈការបោះឆ្នោតអសកល។ អ្នកបោះឆ្នោតនៅអាណត្តិនេះដែលជាសមាជិកក្រុមប្រឹក្សាឃុំសង្កាត់ កើនឡើងពី១១,៤៧៦នាក់ ដល់១១,៦៩៥នាក់។ រីឯរយៈពេលនៃការឃោសនាបោះឆ្នោត ត្រូវកាត់បន្ថយពី២១ថ្ងៃ មកត្រឹម១៤ថ្ងៃវិញ។
ចំពោះដំណើរការបោះឆ្នោតវិញ គឺដូចគ្នាទៅនឹងការបោះឆ្នោតមុនៗដែរ។ ក្នុងនោះ ការចុះឈ្មោះបោះឆ្នោត ចាប់ផ្ដើមពីថ្ងៃទី១៩តុលា រហូតដល់ថ្ងៃទី១វិច្ឆិកា។ នៅពេលចុះឈ្មោះរួចហើយ អគ្គលេខាធិការដ្ឋានរដ្ឋសភានិងក្រុមប្រឹក្សាឃុំសង្កាត់ ត្រូវបញ្ជូនបញ្ជីឈ្មោះអ្នកបោះឆ្នោតទៅគ.ជ.ប ដើម្បី គ.ជ.ប រៀបជាបញ្ជីបោះឆ្នោតដំបូង។ បញ្ជីនេះនឹងត្រូវបិទផ្សាយជាសាធារណៈនៅតាមរាជធានីខេត្ត នៅថ្ងៃទី២៥វិច្ឆិកា។
ក្នុងករណីដែលមានបណ្ដឹងតវ៉ាជំទាស់នឹងបញ្ជីបោះឆ្នោតដំបូង គណៈកម្មការរាជធានីខេត្តរៀបចំការបោះឆ្នោត ត្រូវដោះស្រាយក្នុងរយៈពេល៣ថ្ងៃយ៉ាងយូរបន្ទាប់ពីទទួលបានពាក្យបណ្ដឹង។ ប្រសិនបើមិនពេញចិត្តការសម្រេចរបស់គណៈកម្មការរាជធានីខេត្តរៀបចំការបោះឆ្នោត ម្ចាស់បណ្ដឹងអាចប្ដឹងបន្តទៅកាន់ គ.ជ.ប និងក្រុមប្រឹក្សាធម្មនុញ្ញជាបន្តបន្ទាប់។
នៅពេលដែលបណ្ដឹងតវ៉ា និងបណ្ដឹងជំទាស់ត្រូវបានដោះស្រាយចប់ជាស្ថាពរ គ.ជ.ប នឹងរៀបចំបញ្ជីបោះឆ្នោតតាមទម្រង់ដែលបានកំណត់ និងផ្ដល់សុពលភាពជាបញ្ជីបោះឆ្នោតផ្លូវការ។ ប្រតិទិនរបស់ គ.ជ.ប បង្ហាញថា ការផ្ដល់សុពលភាពបញ្ជីបោះ ឆ្នោតផ្លូវការ ធ្វើនៅថ្ងៃទី៣០ ខែធ្នូ ឆ្នាំ២០១៧ មុនការបោះឆ្នោតនៅថ្ងៃទី១៤ ខែមករា ឆ្នាំ២០១៨។ គួរជម្រាបជូនដែរថា ការបោះឆ្នោតជ្រើសតាំងសមាជិកព្រឹទ្ធសភាឆ្នាំ២០១៨នេះ រៀបចំធ្វើនៅ៨មណ្ឌលទូទាំងប្រទេស ដែលមានចំនួនការិយាល័យបោះឆ្នោតសរុប ចំនួន៣៣ ការិយាល័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ