រដ្ឋមន្រ្តីក្រសួងបរិស្ថាន៖ កម្ពុជាទទួលបានជោគជ័យ លើកិច្ចការពារនិងអភិរក្សជីវៈចម្រុះ
រដ្ឋមន្រ្តីក្រសួងបរិស្ថានលោក សាយ សំអាល់ បានអះអាងនៅថ្ងៃនេះថា កម្ពុជាទទួលបានជោគជ័យ លើកិច្ចការពារនិងអភិរក្សជីវៈចម្រុះ។ ការថ្លែងរបស់លោករដ្ឋមន្រ្តី បានធ្វើឡើងនៅក្នុងពេលដែលកម្ពុជា កំពុងប្រារព្ធទិវា ជីវៈចម្រុះអន្តរជាតិ ថ្ងៃទី ២២ ឧសភា ឆ្នាំ២០១៧ ក្រោមប្រធានបទ “ជីវៈចម្រុះ និងទេសចរណ៍ប្រកបដោយនិរន្តរភាព"។
ចុះផ្សាយនៅថ្ងៃ៖
ស្តាប់ - ០២:០៨
ដោយផ្អែកលើការកែទម្រង់លើវិស័យបរិស្ថានក្នុងរយៈពេលថ្មីៗនេះ រដ្ឋមន្រ្តីក្រសួងបរិស្ថាន លោកសាយ សំអាល់ បានអះអាងថា កម្ពុជាទទួលបានជោគជ័យ លើកិច្ចការពារ និងអភិរក្សជីវៈចម្រុះនៅកម្ពុជា។ នោះបើផ្អែកលើការពង្រីកលើផ្ទៃដីតំបន់ការពារធម្មជាតិ ដែលបានកើនឡើងរហូតដល់ទៅ ៧,៥លានហិចតា ស្មើនឹង ៤១%នៃផ្ទៃប្រទេស។ លោកបន្តថា ចំនួននេះ បានកើនឡើងច្រើនជាង ២ដង នៃគោលដៅជីវៈចម្រុះសកល ដែលបានកំណត់នៅក្នុងកិច្ចប្រជុំកំពូលលើកទី១០ ដែលប្រព្រឹត្តទៅនៅឯប្រទេសជប៉ុន។ នេះបើតាមការលើកឡើងរបស់លោករដ្ឋមន្រ្តី នៅក្នុងទិវា “ជីវៈចម្រុះអន្តរជាតិ ថ្ងៃទី ២២ ឧសភា ឆ្នាំ២០១៧ ដែលបានប្រារព្ធធ្វើឡើងនៅទីក្រុងភ្នំពេញ នាថ្ងៃទី ២២ ឧសភានេះ។
បើតាមលោករដ្ឋមន្រ្តី ភាពជោគជ័យរហូតមកទល់ពេលនេះ គឺអាស្រ័យដោយមានកិច្ចខិតខំប្រឹងប្រែង និងការលះបង់ខ្ពស់របស់មន្ត្រីទាំងអស់ ក្នុងស្មារតីទទួលខុសត្រូវខ្ពស់។ លោករដ្ឋមន្រ្តី បានហៅ ផែនការ និងយុទ្ធសាស្រ្ត ដែលក្រសួងបានដាក់ឲ្យអនុវត្តនាពេលបច្ចុប្បន្ននេះថា បានឆ្លុះបញ្ចាំងឱ្យឃើញច្បាស់ពីជំហររបស់រដ្ឋាភិបាលកម្ពុជា ក្នុងការគ្រប់គ្រងធនធានធម្មជាតិ សម្រាប់ការអភិវឌ្ឍប្រកបដោយចីរភាព ហើយដែលគោលការណ៍នេះ បានដើរទន្ទឹមគ្នាជាមួយនិងនិន្នាការពិភពលោកផង។
គួរជំរាបជូនថា ដើម្បីទប់ទល់នឹងការប្រែប្រួលអាកាសធាតុ និងធានានូវលំនឹងបរិស្ថានធម្មជាតិ រួមទាំងបង្កើនការយល់ដឹងពីតម្លៃដ៏ធំធេងនៃធនធានជីវៈចម្រុះនោះ អង្គការសហប្រជាជាតិ បានកំណត់យកថ្ងៃទី ២២ ឧសភា ដើម្បីប្រារព្ធទិវា ជីវៈចម្រុះអន្តរជាតិ ប្រចាំឆ្នាំ ២០១៧ ក្រោមប្រធានបទ “ជីវចម្រុះ និងទេសចរណ៍ប្រកបដោយនិរន្តរភាព”។ សម្រាប់កម្ពុជា ដើម្បីអបអរសាទរទិវាជីវៈចម្រុះនេះ ក្រសួងបរិស្ថានក្នុងនាមជាអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព និងជាហត្ថលេខីនៃអនុសញ្ញានេះ ក៏បានប្រារព្ធទិវានេះ នៅរាជធានីភ្នំពេញ និងខេត្តទេសចរណ៍ចំនួន ៤ទៀត រួមមាន ខេត្តសៀមរាប មណ្ឌលគីរី ខេត្តកំពត និងខេត្តកែប ដោយមានការប្រកួតប្រជែងឆ្លើយសំណួរ និងថតរូបស្តីពីជីវៈចម្រុះ Post និង Share នៅលើបណ្តាញសង្គមហ្វេសបុក (Facebook) ដើម្បីយករង្វាន់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ