គណបក្សកាន់អំណាចអះអាងថាកំពុងរៀបចំញែកតួនាទីរបស់មន្រ្តីបក្ស និងមន្រ្តីរដ្ឋឲ្យដាច់ពីគ្នា
អនុប្រធានគណបក្សប្រជាជនកម្ពុជាលោក ស ខេង អះអាងថា លោកបាននិងកំពុងធ្វើការសិក្សា ដើម្បីញែកតួនាទី និងភារកិច្ចរបស់ក្រុមការងារនៃគណបក្សកាន់អំណាចមួយនេះ និងក្រុមការងារថ្នាក់រដ្ឋាភិបាល ឲ្យដាច់ចេញពីគ្នា ជៀសវាងការច្រឡូកច្រឡំគ្នាតទៅទៀត។ ការថ្លែងរបស់រដ្ឋមន្ត្រីក្រសួងមហាផ្ទៃដូច្នេះ ត្រូវបានស្វាគមន៍ពីមេដឹកនាំគណបក្សមួយចំនួននៅក្រៅរដ្ឋាភិបាល ខណៈមន្ត្រីរដ្ឋជាច្រើនតែងតែយកតួនាទីដែលរដ្ឋផ្តល់ឲ្យទៅបម្រើបក្ស។
ចុះផ្សាយនៅថ្ងៃ៖
ស្តាប់ - ០១:៣៥
ក្នុងពិធីរំលឹកខួបលើកទី៤១ ឆ្នាំ នៃថ្ងៃ៧មករា ដែលទើបធ្វើឡើងនៅខេត្តបាត់ដំបងថ្ងៃទី៩ ខែមករា លោកស ខេង បានថ្លែងថា សព្វថ្ងៃនេះគឺមានក្រុមការងារគណបក្សផង និងក្រុមការងាររដ្ឋាភិបាលផងដែលចុះជួយដោះស្រាយបញ្ហារបស់ប្រជាពលរដ្ឋនៅតាមមូលដ្ឋាន។ ដោយសារតែមានការច្រឡូកច្រឡំគ្នា នៃការបំពេញការងាររបស់ក្រុមទាំងពីរនេះ អនុប្រធានគណបក្សកាន់អំណាច និងជារដ្ឋមន្ត្រី ក្រសួងមហាផ្ទៃផងនោះ បានអះអាងថា លោកកំពុងធ្វើការសិក្សា ដើម្បីញែកតួនាទីភារកិច្ចរបស់ ក្រុមការងារទាំងពីរនេះ ។ បើតាម លោក ស ខេង កាលពីមុនក្រុមការងារបក្សជាអ្នកធ្វើទាំងអស់ខណៈមិនទាន់មានក្រុមការងាររបស់រដ្ឋាភិបាល។
លោក ពេជ្រ ស្រស់ ជាប្រធានគណបក្សយុវជនកម្ពុជា បានស្វាគមន៍ចំពោះ ការញែកតួនាទីឲ្យដាច់ពីគ្នារបស់មន្រ្តីបក្ស និងមន្ត្រីរដ្ឋាភិបាល។ តាមរយៈទំព័រហ្វេសប៊ុក លោក ពេជ្រ ស្រស់ កត់សំគាល់ថាបច្ចុប្បន្ននេះមានសាលា ឃុំឬសង្កាត់ មួយចំនួនរកមេឃុំមិនឃើញទេ ប៉ុន្តែបើទៅរកនៅទីស្នាក់ការគណបក្សកាន់អំណាច គឺ ឃើញមេឃុំនៅទីនោះ។
បើតាមមេដឹកនាំគណបក្សវ័យក្មេងរូនេះ គឺមានពលរដ្ឋមួយចំនួន ដែលមិនគាំទ្រគណបក្សកាន់អំណាចគឺមិនចង់ចូលទៅទីស្នាក់ការបក្សនេះឡើយ តែជៀសមិនរួច ពលរដ្ឋខ្លះបង្ខំចិត្តដើរទៅរកមេឃុំទាំងទើសទាល់។
លោក ពេជ្រ ស្រស់ បានហៅការបែងចែកតួនាទីឲ្យដាច់ស្រលះបែបនេះថាជាការកែទម្រង់ ឲ្យអំណាចមុខងារសារធាណៈស្ថិតក្នុងអំណាចរបស់ពលរដ្ឋ គឺមិនស្ថិតនៅលើអំណាចរបស់បក្សទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ