លោក ស ខេង ឲ្យលុបបំបាត់ការបញ្ជួនមន្រ្តីឈ្មោះដដែលៗទៅសិក្សាបន្ថែម
រដ្ឋមន្រ្តីក្រសួងមហាផ្ទៃ នៅថ្ងៃពុធនេះ បានបញ្ជាឲ្យលុបបំបាត់នូវទម្លាប់មួយដែលតែងតែកើតឡើង គឺការចាត់បញ្ជូនមន្រ្តីឈ្មោះដដែលៗ ចេញទៅសិក្សាបន្ថែម ខណៈអ្នកមិនធ្លាប់ទទួលបានការបណ្តុះបណ្តាល នៅតែគ្មានឱកាស។ ការលើកឡើងរបស់ លោក ស ខេង ដូច្នេះ ធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការអគារស្នាក់នៅកម្ពស់៥ជាន់ និងសមិទ្ធផលនានានៃបណ្ឌិត្យសភានគរបាលកម្ពុជា ស្ថិតនៅឃុំដីឥដ្ឋ ស្រុកកៀនស្វាយ ខេត្តកណ្ដាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ក្រៅពីបញ្ជាឲ្យលុបបំបាត់ទម្លាប់បញ្ជូនមន្រ្តីឈ្មោះដដែលៗចេញទៅសិក្សាបន្ថែមនោះ លោក ស ខេង ក៏បានបញ្ជាក់ថា បច្ចុប្បន្ននេះ មន្រ្តីនគរបាលទាំងអស់គឺត្រូវតែចូលសាលារៀនជាមុនសិន មុននឹងបញ្ជូនទៅបំពេញការងារនៅតាមអង្គភាពនីមួយៗ។ លើសពីនេះ លោកឧបនាយករដ្ឋមន្រ្តីក៏បានជំរុញឲ្យមានការលើកទឹកចិត្តដល់មន្រ្តីដែលទទួលបានការសិក្សាបន្ថែមនោះ ដោយប្រគល់តួនាទីរបស់ពួកគេមកវិញក្រោយពីបញ្ចប់ការសិក្សា។ ការបញ្ជាក់យ៉ាងដូច្នេះ ដោយលោកកត់សំគាល់ថា កន្លងទៅមានមន្រ្តីខ្លះដែលត្រូវបានចាត់បញ្ជូនទៅសិក្សាបន្ថែមហើយ ពេលបញ្ចប់កម្មសិក្សាមកវិញ ត្រូវអស់កន្លែងអង្គុយ ឬបាត់បង់តួនាទីពីមុន ជាហេតុធ្វើឲ្យមន្រ្តីខ្លះ ខ្លាចរអាក្នុងការចេញទៅសិក្សាបន្ថែម។
យ៉ាងណាក៏ដោយ លោក ស ខេង បានបញ្ជាឲ្យនាយកដ្ឋានបុគ្គលិក និងបណ្ឌិតសភានគរបាល ដាក់ទណ្ឌកម្មរដ្ឋបាលដល់មន្រ្តីនគរបាល ដែលត្រូវបានចាត់បញ្ជូនទៅសិក្សាហើយ ប៉ុន្តែមិនបានមកបង្ហាញមុខ ឬមិនគោរពវិន័យរបស់អង្គការចាត់តាំង។
បើតាមរដ្ឋមន្រ្តីក្រសួងមហាផ្ទៃដដែល លោកកំពុងតែតាមដានចំពោះមន្រ្តីដែលត្រូវបានចាត់បញ្ជូនឲ្យទៅសិក្សាបន្ថែមទាំងក្នុងប្រទេស និងក្រៅប្រទេសហើយ បែរជាមិនគោរពវិន័យ ឬមិនចង់សិក្សា ដែលលោកចាត់ទុកថា ធ្វើខាតបង់ទាំងថវិកា និងខូចមុខមាត់ដល់អង្គភាព ក៏ដូចជារដ្ឋាភិបាលទៀតផង។
លោក ស ខេង បានអះអាងថា មកទល់ពេលនេះ ធនធាននគរបាលរបស់ខ្មែរមិនខ្សត់ដូចពីមុនទៀតទេ ដោយក្នុងមួយឆ្នាំៗ កម្ពុជាបានបញ្ជួនមន្រ្តីនគរបាលរាប់រយនាក់ចេញទៅសិក្សាបន្ថែមនៅបរទេស រួមមាន វៀតណាម ចិន សិង្ហបុរី ថៃ បារាំង និងអាមេរិកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ