ស្ត្រីម្នាក់ យកស្បែកជើងគប់រូបលោក ហ៊ុន សែន ត្រូវតុលាការកោះបញ្ជាឲ្យចូលខ្លួន!
ពីម្សិលមិញនេះ ព្រះរាជអាជ្ញាអមសាលាដំបូងខេត្តកំពង់ស្ពឺ បានកោះបញ្ជាឲ្យ ស្ត្រីម្នាក់ ចូលខ្លួនទៅស្នងការនគរបាល ដើម្បីសាកសួរពីដំណើររឿងប្រមាថ និងញុះញង់ឲ្យមានការរើសអើង។ ការកោះហៅនេះ គឺក្រោយពីរូបនាង បានយកស្បែកជើង គប់ស្លាកគណបក្សប្រជាជនកម្ពុជា ដែលមានរូបថតលោក ហ៊ុន សែន និងរូបលោក ហេង សំរិន។ ក៏ប៉ុន្តែ រំលងផុតបានមួយថ្ងៃទៅហើយ នារីនោះនៅតែមិនទាន់ចូលខ្លួន ហើយសមត្ថកិច្ចក៏មិនទាន់រករូបនាងឃើញនៅឡើយដែរ។ ទន្ទឹមនេះ បណ្តាញព័ត៌មានស្និទនឹងបក្សកាន់អំណាច បានសរសេរចោទថា នារីនោះជា “សកម្មជនបក្សប្រឆាំង”។
ចុះផ្សាយនៅថ្ងៃ៖
ស្តាប់ - ០៣:០១
ចំពោះអង្គហេតុនៃរឿងនេះ គេនៅមិនទាន់ដឹងថាកើតឡើងតាំងពីពេលណានោះទេ ព្រោះគ្មានកាលបរិច្ឆេទនៃបទល្មើស។ ក៏ប៉ុន្តែតាមរយៈវីដេអូខ្លី ត្រឹម១៣វិនាទី ដែលត្រូវបណ្តាញព័ត៌មានដែលស្និទនឹងបក្សកាន់អំណាចចុះផ្សាយនោះ គឺបង្ហាញសកម្មភាពពីស្ត្រីម្នាក់ បានយកស្បែកជើង ទៅគប់ចំនួនពីរដង ទៅលើរូបស្លាកប្រមុខថ្នាក់ដឹកនាំបក្សប្រជាជនកម្ពុជា និងថែមទាំងនិយាយ «អាណេះ វាតាមបំផ្លាញជាតិដល់នេះទៀត អាហ្នឹង!»។
សកម្មភាពនិងពាក្យសម្តីនេះ ត្រូវព្រះរាជអាជ្ញាខេត្តកំពង់ស្ពឺចាត់ទុកថា ជាការប្រមាថ និងជាការញុះញង់ឲ្យមានការរើសអើង ហើយបានចេញដីកាបញ្ជាឲ្យចូលខ្លួន នារីម្នាក់ឈ្មោះ សំ សុខា អាយុ៣៨ ស្នាក់នៅក្នុងខេត្តកំពង់ស្ពឺ ឲ្យចូលទៅបង្ហាញខ្លួននៅមុខមន្ត្រីនគរបាលយុត្តិធម៌ ឲ្យបានមុនថ្ងៃទី៨មេសា។
ពេលវេលាកំណត់បានផុតហើយ ក៏ប៉ុន្តែ មន្ត្រីស្នងការនគរបាលខេត្តកំពង់ស្ពឺ លោក សម សាមួន ប្រាប់វិទ្យុបារាំង RFI យ៉ាងខ្លីថា មិនទាន់ឃាត់ខ្លួននារីរូបនោះនៅឡើយទេ។ ពេលនេះ សមត្ថកិច្ចកំពុងដុតដៃដុតជើង ធ្វើការងារ។ ចំណែកស្ថាប័នអយ្យការ ក៏ពុំទាន់មានសេចក្តីពន្យល់បន្ថែមនៅឡើយដែរ នៅថ្ងៃអាទិត្យទី៩មេសា។
រីឯមន្ត្រីអ្នកនាំពាក្យទាំង២នាក់ និងអនុប្រធានទាំង៣ របស់បក្សសង្គ្រោះជាតិ ក៏គ្មានសេចក្តីអធិប្បាយយ៉ាងណានោះឡើយ។ ផ្ទុយពីគេឯង អ្នកតំណាងរាស្ត្របក្សប្រឆាំង លោក នុត រំដួល ដែលកំពុងចុះមូលដ្ឋានស្រាប់ ក៏ថាលោកពុំទាន់បានដឹងរឿងនេះនៅឡើយទេ។
យ៉ាងណាក៏ដោយ ប្រសិនបើតុលាការរកឃើញថា នារីរូបនោះ មានពិរុទ្ធពិតមែន! នាងទំនងជាអាចនឹងត្រូវទទួលទោសព្រហ្មទណ្ឌ ចំនួន២ករណី។ ទី១ បទប្រមាថ ដែលត្រូវជាប់ពន្ធនាគារពី១ថ្ងៃទៅ៦ថ្ងៃ ហើយបង់លុយ ១ពាន់ទៅ១០ម៉ឺនរៀល ហើយនិងទី២ បទញុះញង់ឲ្យមានការរើសអើង ដែលអាចត្រូវប្រឈមនឹងជាប់គុក១ឆ្នាំទៅ៣ឆ្នាំ ហើយបង់ពិន័យប្រាក់ ពី២លានទៅ៦លានរៀល។
ក៏ប៉ុន្តែអ្នកច្បាប់មានជាអាទិ៍ លោក មេធាវី សុខ សំអឿន យល់ថា មិនគួរយកបទល្មើស២នេះ មកចោទលើរូបនាងនោះឡើយ។ ព្រោះបើតាមការបកស្រាយផ្លូវច្បាប់ របស់មេធាវីរូបនេះ មាត្រា ៥០២ ស្តីពី ការប្រមាថ អ្នករាជការសាធរណៈឬពលរដ្ឋទទួលអាណត្តិសាធារណៈដោយការបោះឆ្នោត គឺសំដៅតែក្នុងពេលបុគ្គលនោះបំពេញមុខងារតែប៉ុណ្ណោះ។ ហើយមាត្រា ៤៩៦ គឺសម្រាប់ដែលករណីរើសអើងជាតិពន្ធុ ក្រុមជាតិ ពូជសាសន៍ និងសាសនា តែប៉ុណ្ណោះ គឺគ្មានការរើសអើង ឬស្អប់បុគ្គលម្នាក់ៗនោះឡើយ។ លោកមេធាវី សង្កត់ធ្ងន់ថា គេត្រូវបែងចែកឲ្យដាច់ពីគ្នា រវាងការស្អប់ មិនចូលចិត្ត ការបញ្ចេញមតិ និងការប្រមាថ ហើយគេក៏ពុំគួរបកស្រាយច្បាប់ដើម្បីការពារប្រយោជន៍បក្សនិងបុគ្គលនោះទេ។
ក៏ប៉ុន្តែ នៅមានមាត្រា៤៩៤មួយទៀត របស់ក្រមព្រហ្មទណ្ឌ ដែលអ្នកច្បាប់ឯករាជ្យខ្លះ គិតថា អាចជាសំអាងរបស់តុលាការក្នុងការចោទប្រកាន់។ មាត្រាច្បាប់នេះ ក្តោបលើការញុះញង់តាមសំណេរ គំនូរ និងពាក្យសម្តីតាមប្រភេទណាក៏ដោយ នៅទីសាធារណៈ គឺត្រូវផ្តន្ទាទោស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ