ឆ្នាំថ្មី៖ បក្សប្រឆាំងអំពាវនាវឱ្យមានយុត្តិធម៌ និងបញ្ចប់ជម្លោះនយោបាយ
នៅថ្ងៃព្រហស្បតិ៍ ទី៣១ ធ្នូនេះ មេដឹកនាំនយោបាយខ្មែរ បានបញ្ចេញសារជូនពររៀងៗខ្លួនដល់ប្រជាពលរដ្ឋទូទាំងប្រទេសសម្រាប់ឆ្នាំថ្មី២០១៦។ នៅក្នុងនោះមានលោកនាយករដ្ឋមន្ត្រីហ៊ុន សែន ប្រធានគណបក្សប្រជាជនកម្ពុជា លោក សម រង្ស៊ី និងលោក កឹម សុខា ប្រធាន និងអនុប្រធានគណបក្សសង្គ្រោះជាតិ។ មេដឹកនាំបក្សប្រជាជនមិនបានយកសារនយោបាយអ្វីធំដុំនោះទេ ប៉ុន្តែគណបក្សសង្គ្រោះជាតិអំពាវនាវឱ្យមានយុត្តិធម៌ និងបញ្ចប់ជម្លោះនយោបាយ។
ចុះផ្សាយនៅថ្ងៃ៖
ស្តាប់ - ០២:១៣
ការបញ្ចប់ជម្លោះនយោបាយនៅកម្ពុជា និងការអំពាវនាវឱ្យមានយុត្តិធម៌ គឺជាសារនយោបាយសំខាន់ពីររបស់ប្រធាន និងអនុប្រធាននៃគណបក្សសង្គ្រោះជាតិ ខណៈដែលបក្សប្រជាជនកម្ពុជាមិនមានថ្លែងសារនយោបាយអ្វីសំខាន់សម្រាប់ឆ្នាំថ្មី២០១៦នោះទេ។ ក្រៅពីជូនពរដល់ពលរដ្ឋក្នុងនិងក្រៅប្រទេសឱ្យមានសេចក្តីសុខហើយនោះ លោកកឹម សុខាប្រធានស្តីទីគណបក្សប្រឆាំងបានអំពាវនាវឲ្យអ្នកនយោបាយខ្មែរទាំងអស់ បញ្ឈប់នូវការគុំគួន ការសងសឹក ការគំរាមកំហែង និងការបំភិតបំភ័យនានា។ ជាពិសេសអនុប្រធានរូបនេះ បានអំពាវនាវឲ្យមានការជួបជជែកគ្នារវាងអ្នកនយោបាយខ្មែរ ធ្វើយ៉ាងណាបញ្ចប់នូវកំដៅនយោបាយ ដែលធ្វើឲ្យប្រជាពលរដ្ឋខ្មែរមានការភ័យខ្លាច។
ដោយឡែកលោក សម រង្ស៊ី ប្រធានគណបក្សប្រឆាំងដែលកំពុងគេចខ្លួននៅក្រៅប្រទេស បានជូនពរដល់អ្នកដែលកំពុងរងគ្រោះដោយអំពើអយុត្តិធម៌ដោយសារការរឹបអូសយកដីធ្លី និងផ្ទះសម្បែងជាដើម ឱ្យផ្តើមឃើញពន្លឺយុត្តិធម៌នៅក្នុងឆ្នាំថ្មី ២០១៦នេះ។ តាមរយៈទំព័រហ្វេសប៊ុករបស់ខ្លួន ប្រមុខគណបក្សប្រឆាំងកម្ពុជា ក៏បានប្តេជ្ញាធ្វើយ៉ាងណាឲ្យជនជាតិខ្មែរគ្រប់គណបក្ស និងគ្រប់និន្នាការនយោបាយជានាគ្នា ស្រុះស្រួលគ្នា និងពួតដៃគ្នា ជាមហាគ្រួសារខ្មែរតែមួយ ដើម្បីការពារ និងថែរក្សាជាតិមាតុភូមិឲ្យបាននៅគង់វង្សជានិរន្តិ៍។ ចំណែកឯលោកនាយករដ្ឋមន្ត្រីហ៊ុន សែនវិញដែលកំពុងលំហែកាយនៅខេត្តព្រះសីហនុ មិនបានអំពាវនាវស្វែងរកយុត្តិធម៌ ឬបញ្ហានយោបាយអ្វីនោះទេ គ្រាន់តែផ្ញើសារយ៉ាងខ្លីជូនពលរដ្ឋខ្មែរឱ្យមានសេចក្តីសុខចំពោះឆ្នាំថ្មីនេះតែប៉ុណ្ណោះ។
សូមបញ្ជាក់ស្ថានភាពនយោបាយនៅកម្ពុជាបានកើនឡើងកំដៅកាន់តែខ្លាំងព្រោះថា ចុងក្រោយនេះ លោក កឹម សុខា ត្រូវបានតំណាងរាស្ត្រគណបក្សប្រជាជនកម្ពុជាបោះឆ្នោតទំលាក់ចេញពីតំណែងអនុប្រធាន ដោយឡែកលោក សម រង្ស៊ីត្រូវបានតុលាការកម្ពុជាកាត់ទោសឱ្យជាប់ពន្ធនាគារថែមទៀតផង។ ហើយចុងក្រោយនេះលោកនាយករដ្ឋមន្ត្រីហ៊ុន សែនបានប្រកាន់ជំហរតឹងរឹងមិនព្រមលើកលែងទោសឱ្យលោក សម រង្ស៊ី ជាដាច់ខាត។
បើទោះបីជាបែបណាក៏ដោយ លោកអ៊ូ វីរៈ អ្នកវិភាគស្ថានភាពនយោបាយ បានអះអាងថាការអំពាវនាវបន្ធូបន្ថយស្ថានភាពនយោបាយពីបក្សប្រឆាំងនេះ គឺគ្មានប្រសិទ្ធភាពនោះទេ។ ហើយលោកសមរង្ស៊ីនឹងមិនអាចវិលចូលប្រទេសកម្ពុជារហូតដល់ការបោះឆ្នោតឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ