សមាគមផលិតអំបិលកំពតកំពុងប្រឈមនឹងបញ្ហា!
សមាគមផលិតអំបិលកំពតកំពុងតែប្រឈមនឹងបញ្ហា ដោយសារតែអំបិលនាំចូលពីក្រៅប្រទេសបានវាយលុកទីផ្សាររបស់ខ្លួននៅកម្ពុជា រហូតដល់ទៅ៦០%។ សហប្រធានសហគមន៍អ្នកផលិតអំបិលកំពត បានបញ្ជាក់ឲ្យដឹង នៅថ្ងៃទី ២៥ មិថុនានេះ ថានៅក្នុងឆ្នាំ ២០១៥ បរិមាណអំបិលសល់នៅក្នុងឃ្លាំងមានរហូតដល់ទៅជិត២៧ម៉ឺនតោន ខណៈដែលប្រជាជនកម្ពុជាជាង ១៤លាននាក់ត្រូវការអំបិលត្រឹមតែ ៨ម៉ឺន ទៅ៩ម៉ឺនតោនក្នុងរយៈពេលមួយឆ្នាំៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ប្រជាសហគមន៍ផលិតអំបិលនៅក្នុងខេត្តកំពតរាប់ពាន់នាក់កំពុងតែជួបនឹងបញ្ហាសេដ្ឋកិច្ច ដោយសារតែផលអំបិលរាប់សិបតោនរបស់ពួកគេ គ្មានទីផ្សារ។ លោក ប៊ុន បារាំង សហប្រធានសហគមន៍អ្នកផលិតអំបិលខេត្តកំពត និងកែប បានបញ្ជាក់ប្រាប់វិទ្យុបារាំងថា នៅក្នុងឆ្នាំ២០១៥នេះ អំបិលកំពតនៅសល់ក្នុងឃ្លាំងមានរហូតដល់ទៅជិត ២៧ម៉ឺនតោន។ ចំនួននេះគឺលើសពីការផ្គត់ផ្គង់ទីផ្សារកម្ពុជាក្នុងមួយឆ្នាំៗ រហូតដល់ទៅ៣ដង។
លោកប៊ុន បារាំងបានពន្យល់ថា មូលហេតុដែលអំបិលកំពតគ្មានទីផ្សារ ហើយនៅជាប់គាំងបែបនេះ ដោយសារតែមានអំបិលនាំចូលពីប្រទេសថៃ និងប្រទេសផ្សេងៗមួយចំនួនទៀត បានជ្រៀតចូលក្នុងទីផ្សារកម្ពុជារហូតដល់ទៅ៦០% ហើយតម្លៃទៀតសោត ក៏ថោកជាងអំបិលកំពតផងដែរ។
សហប្រធានសមាគមអ្នកផលិតអំបិលខេត្តកំពត និងកែបរូបនេះ បានបន្តថា ផលិតផលអំបិលជាប់គាំងបែបនេះ បានធ្វើឲ្យប្រជាពលរដ្ឋនៅក្នុងសហគមន៍ជាង ៤០០០នាក់បានរងផលប៉ះពាល់ផ្នែកសេដ្ឋកិច្ច ដោយសារតែពួកគាត់ត្រូវពឹងផ្អែកទៅលើការផលិតអំបិលនេះ។
អស់រយៈពេល១ខែមកហើយ ដែលសហគមន៍បានជូនដំណឹងពីផលប៉ះពាល់នេះជូនទៅដល់ស្ថាប័ន និងក្រសួងពាក់ព័ន្ធនានា ប៉ុន្តែលោកប៊ុន បារាំងបានឲ្យដឹងថា រហូតមកទល់នឹងពេលនេះនៅមិនទាន់មានការដោះស្រាយ និងជួយអន្តរាគមន៍ណាមួយពីខាងរដ្ឋាភិបាលនោះទេ។
លោកប៊ុន បារាំងបានសំណូមពរឲ្យក្រសួងពាក់ព័ន្ធជួយទប់ស្កាត់កុំឲ្យមានការនាំចូលអំបិលមកពីបរទេស ខណៈដែលការផលិតអំបិលក្នុងស្រុកក៏អាចផ្គត់ផ្គង់ទីផ្សារបានគ្រប់គ្រាន់ក្នុងរយៈពេលមួយឆ្នាំៗផងដែរ។ ហើយលោកក៏អំពាវនាវឲ្យប្រជាពលរដ្ឋក្នុងប្រទេសទាំងអស់ជួយគាំទ្រនិងប្រើប្រាស់ផលិតផលអំបិលនៅក្នុងស្រុក ដែលជាអំបិលធម្មជាតិ និងមានគុណភាពខុសពីអំបិលនាំចូលពីបរទេស ដែលផលិតឡើងពីទឹករ៉ែក្នុងដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ