លោកនាយករដ្ឋមន្ត្រីប្រាប់ឲ្យអាជ្ញាធរចាត់ការអ្នកអំពាវនាវថាទឹកថ្នាំជ្រលក់ដៃអាចសម្លាប់មនុស្ស
លោកនាយករដ្ឋមន្ត្រី ហ៊ុន សែន នៅព្រឹកថ្ងៃចន្ទនេះ បានប្រាប់ឲ្យអាជ្ញាធរចាត់វិធានការអ្នក ដែលលើកឡើងថាមានទឹកថ្នាំជ្រលក់ម្រាមដៃ ដែលប្រើប្រាស់សម្រាប់ការបោះឆ្នោតខាងមុខ អាចសម្លាប់មនុស្សបាន។ ចំណែក គ.ជ.ប បញ្ជាក់ថានឹងផ្ទៀងផ្ទាត់ផ្លូវច្បាប់ បើករណីនេះកើតឡើង។
ចុះផ្សាយនៅថ្ងៃ៖
លោកនាយករដ្ឋមន្ត្រី ហ៊ុន សែន ក្នុងឱកាសដាក់សម្ពោធឲ្យប្រើប្រាស់ស្ពានអាកាស មិត្តភាពកម្ពុជា-ចិន សែនសុខ (ស្ពានអាកាសផ្សារដីហុយ) នាថ្ងៃទី២ ខែកក្កដានេះ បានលើកឡើងថា ថ្មីៗ នេះមានការផ្សាយព័ត៌មានតាមបណ្តាញសង្គម ថា នៅក្នុងពេលបោះឆ្នោតជាតិខាងមុខនេះ គឺមានទឹកខ្មៅពីរប្រភេទ ដែលនឹងយកមកប្រើគឺ ទឹកខ្មៅជ្រលក់ម្រាមដៃធម្មតា និង ទឹកខ្មៅ ដែលជ្រលក់ម្រាមដៃហើយ គឺនឹងធ្វើអោយស្លាប់ក្នុងរយៈពេល២៤ម៉ោង។
លោកនាយករដ្ឋមន្ត្រី ហ៊ុន សែន បានហៅការផ្សព្វផ្សាយបែបនេះថា ជាការឆបោក ដែលមានចេតនាបង្កចលាចល អសន្តិសុខ និងសណ្តាប់ធ្នាប់ដល់ប្រទេសជាតិ និងបំភ័យប្រជាជនកុំអោយទៅបោះឆ្នោតនៅក្នុងថ្ងៃបោះឆ្នោតជាតិខាងមុខនេះ។ លោកបញ្ជាក់ថា នេះគឺជាសកម្មភាព ដែលចាត់ទុកជាអំពើឧក្រិដ្ឋ និងជាបទល្មើស ដែលមិនអាចអត់ឱនឲ្យបានជាដាច់ខាត ហើយ សមត្ថកិច្ច និងអាជ្ញាធរគ្រប់លំដាប់ថ្នាក់ត្រូវឃ្លាំមើលសកម្មភាពពួកគេ ព្រមទាំងនាំខ្លួនជនទុច្ចរិតទាំងនោះមកផ្តន្ទាទោសតាមច្បាប់ជាធរមាន។
ជាការលើកឡើងបន្ទាប់ពី សកម្មជនអតីតគណបក្សប្រឆាំង តាមរយៈបណ្តាញសង្គមឈ្មោះ ឆាំ ឆានី បានសរសេរ កាលពីថ្ងៃទី១ ខែកក្កដា ថា “ជំនាញការវៀតណាម ជាអ្នកផ្តល់ថ្នាំជ្រលក់ដៃ ដែលបានលាយ ជាមួយអាស៊ីតនីទ្រិច និង ថ្នាំលាង រ៉ែមាស ស្យានីត។ ថ្នាំជ្រលក់ម្រាមដៃនេះ មានធ្វើតែស្ត៍រួចហើយ គឺអាចសម្លាប់មនុស្ស បួនម៉ោងក្រោយពេលជ្រលក់ម្រាមដៃ”។
បើតាមលោក ហ៊ុន សែន ទោះបីជាអ្នកប្រព្រឹត្តិទៅដល់ប្រទេសណា ក៏ដោយ ក៏ត្រូវចាប់ខ្លួនត្រឡប់មកប្រទេសកម្ពុជាវិញដែរ។ លោកបន្តថា លោកបានស្គាល់អត្តសញ្ញាណ និងបានបញ្ជូនទៅឲ្យរដ្ឋមន្ត្រីក្រសួងមហាផ្ទៃចាត់ការរួចរាល់ហើយ។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប បានបញ្ជាក់ថា ទង្វើនេះគឺជាការរារាំងដល់ដំណើរការបោះឆ្នោតតាមមាត្រា១៤២។ ប៉ុន្តែរហូតមកដល់ពេលនេះ គ.ជ.ប មិនទាន់ឃើញព័ត៌មាននេះ ផ្សព្វផ្សាយនៅឡើយ ហើយបើមាន គ.ជ.ប នឹងចាត់វិធានការត្រួតពិនិត្យ។
សូមជម្រាបជូនកម្ពុជានឹងរៀបចំការបោះឆ្នោតជ្រើសតាំងតំណាងរាស្ត្រនៅថ្ងៃទី២៩ ខែកក្កដា ខាងមុខនេះ ដែលមានគណបក្សនយោបាយចំនួន២០ចូលរួម។ ជាការបោះឆ្នោត ដែលសហគមន៍អន្តរជាតិមួយចំនួន បានធ្វើការរិះគន់ថាមិនស្របតាមគោលការណ៍សេរីពហុបក្ស ព្រោះអវត្តមានអតីតគណបក្សសង្រ្គោះជាតិចូលរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ