លោកស្រី រ៉ូណាស្មីត នឹងជួបប្រធានគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជាបន្ទាប់ពីមានអំពើហិង្សា
បើគ្មានការប្រែប្រួលទេ លោកស្រី រ៉ូណា ស្មីត អ្នករាយការណ៍ពិសេស របស់អង្គការសហប្រជាជាតិទទួលបន្ទុកខាងសិទ្ធិមនុស្សនៅកម្ពុជា គ្រោងនឹងជួបជាមួយប្រធានគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជានៅរសៀលថ្ងៃនេះ។ ជំនួបដែលធ្វើឡើង នៅមួយថ្ងៃបន្ទាប់ពីការផ្ទុះអំពើហិង្សាទៅលើអ្នកឃ្លាំមើលសិទ្ធិមនុស្សរបស់អង្គការលីកាដូ និងខណៈដែលលោកស្រីកំពុងបំពេញទស្សនកិច្ចជាលើកទី ៣ នៅកម្ពុជាដោយផ្តោតលើបញ្ហាសិទ្ធិមនុស្ស និងសិទ្ធិជនជាតិភាគតិចនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:៥០
របៀបវារៈនៃជំនួបរវាងអ្នករាយការណ៍ពិសេសរបស់អង្គការសហប្រជាជាតិទទួលបន្ទុកខាងសិទ្ធិមនុស្សប្រចាំនៅកម្ពុជាលោកស្រី រ៉ូណា ស្មីត (Rohna Smith) ជាមួយលោក កែម រ៉េម៉ី ប្រធានគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជា (CHRC) នៅមិនទាន់ត្រូវបានបញ្ជាក់ឲ្យដឹងនៅឡើយទេ។ ក៏ប៉ុន្តែអំពើហិង្សា ដែលកើតទៅលើអ្នកឃ្លាំមើលសិទ្ធិមនុស្សរបស់អង្គការលីកាដូ លោក អំ សំអាត ស្វាគមន៍ដំណើរទស្សនកិច្ចអ្នករាយការណ៍ពិសេសរូបនេះ ទំនងជាត្រូវបានលើកឡើងនៅក្នុងជំនួបនេះ។ នេះបើតាមការរំពឹងទុករបស់ក្រុមអ្នកធ្វើការផ្នែកសិទ្ធិមនុស្សប្រចាំនៅកម្ពុជា។ តាមរយៈសេចក្តីថ្លែងការណ៍រួមមួយ កាលពីថ្ងៃទី ១០តុលា ក្រុមអង្គការសង្គមស៊ីវិលចំនួន ៦០ បានទទួចដល់អ្នករាយការណ៍ពិសេសរូបនេះ ឲ្យលើកឡើងពីបញ្ហាការបន្តប្រើប្រាស់អំពើហិង្សាជាបន្តបន្ទាប់ពីសំណាក់អាជ្ញាធរមានសមត្ថកិច្ច ក្នុងការគាបសង្កត់មកលើសេរីភាពក្នុងការបញ្ចេញមតិ និងការប្រមូលផ្ដុំដោយសន្តិវិធីនៅកម្ពុជានេះ។
អ្នកស្រី ចក់ សុភាព នាយកប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា (CCHR) បានមានប្រសាសន៍ថា៖ “ការវាយដំលើអ្នកឃ្លាំមើលសិទ្ធិមនុស្សដែលមានសម្គាល់អត្តសញ្ញាណ ដោយគ្រាន់តែបំពេញការងាររបស់ខ្លួនត្រូវបានរងគ្រោះដោយអំពើហិង្សា គឺពិតជាមិនអាចទទួលយកបានទេ។ ចំណែកអ្នកស្រី ណាលី ពីឡូក នាយករងផ្នែកតស៊ូមតិនៃអង្គការលីកាដូបានមានប្រសាសន៍ថា៖ “នេះជាឧទាហរណ៍ចុងក្រោយមួយ ដែលសន្តិសុខត្រូវបានពង្រាយសម្រាប់ប្រើអំពើហិង្សាដើម្បីរារាំងការប្រមូលផ្ដុំ ដែលជាយុទ្ធសាស្រ្តរបស់អាជ្ញាធរសម្រាប់បំភិតបំភ័យប្រជាពលរដ្ឋក្នុងការទាមទារសិទ្ធ”។
សូមបញ្ជាក់ថា លោកស្រី រ៉ូណា ស្មីត (Rohna Smith) អ្នករាយការណ៍ពិសេសរបស់អង្គការសហប្រជាជាតិទទួលបន្ទុកខាងសិទ្ធិមនុស្សប្រចាំនៅកម្ពុជាបានចាប់ផ្តើមបំពេញទស្សនកិច្ចជាលើកទី ៣ នៅកម្ពុជាចាប់ពីថ្ងៃទី ១០ ដល់ថ្ងៃទី ២០ តុលា ឆ្នាំ២០១៦នេះ ដើម្បីពិនិត្យមើលស្ថានភាពនយោបាយទូទៅនៅកម្ពុជា និងទិដ្ឋភាពផ្សេងៗនៃការរើសអើង ពិសេសលើស្ថានភាពបច្ចុប្បន្ននៃសិទ្ធិមនុស្ស និងការតាមដានការអនុវត្តអនុសាសន៍នានា ដែលផ្តល់ជូនរដ្ឋាភិបាលនាពេលកន្លងមក។ ប៉ុន្តែដំណើរទស្សនកិច្ចរបស់លោកស្រី ត្រូវបានស្វាគមន៏ដោយការវាយដំទៅលើលោក អំ សំអាត ដោយសន្តិសុខខណ្ឌដូនពេញ និងខណៈដែលស្ថានភាពនយោបាយរវាងគណបក្សកាន់អំណាច និងគណបក្សប្រឆាំងកំពុងប្រឈមមុខដាក់គ្នាចាប់តាំងពីខែកក្កដា ឆ្នាំ២០១៥មក។
យោងតាមកាលវិភាគរបស់លោកស្រីនៅថ្ងៃនេះ ក្រៅពីជួបជាមួយលោក កែម រ៉េម៉ី នៅវេលាម៉ោង ១ រសៀលនេះ លោកស្រី រ៉ូ ណាស្មីត នឹងបន្តជួបជាមួយអភិបាលរាជធានីភ្នំពេញលោក ប៉ា សុជាតិវង្ស និងរដ្ឋមន្រ្តីក្រសួងអប់រំយុវជន និងកីឡា បន្ទាប់ពីលោកស្រីបានជួបជាមួយមន្រ្តីជាន់ខ្ពស់ក្រសួងយុត្តិធម៌រួចមក។ កាលពីថ្ងៃទី ១០ តុលា ម្សិលមិញ លោកស្រីក៏បានជួបជាមួយក្រុមអង្គការសង្គមស៊ីវិល និងមន្រ្តីអង្គការសិទ្ធិមនុស្សអាដហុក ដោយផ្តោតសំខាន់ទៅលើស្ថានភាពសិទ្ធិមនុស្សនៅកម្ពុជា ពិសេសការចាប់ខ្លួន និងចោទប្រកាន់ទៅលើអ្នកធ្វើការលើផ្នែកសិទ្ធិមនុស្សចំនួន ៤រូប និងមន្រ្តី គជប ម្នាក់ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ