មានជនភៀសខ្លួនតែ៤នាក់ប៉ុណ្ណោះដែលស្ម័គ្រចិត្តមកកម្ពុជាជាផ្លូវការ
បន្ទាប់ពីទទួលបានភ្លើងខៀវពីប្រមុខរដ្ឋាភិបាលកម្ពុជាកាលពីថ្ងៃទី២០ ឧសភាកន្លងទៅ នៅពេលនេះក្រុមការងារផ្នែកជនភៀសខ្លួនរបស់ក្រសួងមហាផ្ទៃកំពុងរៀបចំនីតិវិធី និងកន្លែងស្នាក់នៅសម្រាប់ភៀសខ្លួន៤នាក់ដែលស្ម័គ្រចិត្តមកតាំងទីលំនៅថ្មីនៅកម្ពុជា។ យ៉ាងណាក៏ដោយ ក្រសួងមហាផ្ទៃ មិនទាន់បញ្ជាក់ច្បាស់លាស់នៅឡើយទេ ថាតើជនភៀសខ្លួនទាំងនោះនឹងមកដល់កម្ពុជានៅពេលណា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ការព្រមទទួលយកជនភៀសខ្លួនពីប្រទេសអូស្ត្រាលីនេះ គឺជាផ្លែផ្កានៃកិច្ចព្រមព្រៀងមួយរវាងរដ្ឋាភិបាលកម្ពុជា និងអូស្ត្រាលីក្នុងការបញ្ជូន និងទទួលយកជនភៀសខ្លួនចំនួន១ពាន់នាក់ពីកោះណៅរុ មកតាំងទីលំនៅថ្មីនៅក្នុងប្រទេសកម្ពុជាកាលពីថ្ងៃទី២៦ កញ្ញា ឆ្នាំ២០១៤កន្លងទៅ។ កិច្ចព្រមព្រៀងនេះ ត្រូវបានសង្គមស៊ីវិល មន្ត្រីបក្សប្រឆាំង និងប្រជាពលរដ្ឋមួយចំនួនតវ៉ាជំទាស់។ ក្រុមអ្នកតវ៉ា បានលើកឡើងថា កម្ពុជាមិនទាន់មានលទ្ធភាពគ្រប់គ្រាន់នៅឡើយទេ ក្នុងការទទួលយកជនភៀសខ្លួនទាំងនោះ ហើយបានចោទរដ្ឋាភិបាលថា ការចុះកិច្ចព្រមព្រៀងនេះ គឺដើម្បីជាថ្នូរទៅនឹងទឹកប្រាក់៣៥លានដុល្លារអាមេរិកពីរដ្ឋាភិបាលអូស្ត្រាលី។
ជាការឆ្លើយតប រដ្ឋាភិបាលកម្ពុជា បានទាត់ចោលនូវការចោទប្រកាន់នេះ ហើយថា ការព្រមទទួលយកជនភៀសខ្លួនអូស្ត្រាលី គឺធ្វើឡើងតាមអនុសញ្ញាអន្តរជាតិ គោលការណ៍មនុស្សធម៌ និង ធ្វើឡើងតាមការស្ម័គ្រចិត្តរបស់ជនភៀសខ្លួនតែប៉ុណ្ណោះ។ ទោះជាមានការតវ៉ា ទាំងរដ្ឋាភិបាលកម្ពុជា និង អូស្ត្រាលីនៅតែអះអាងថា នឹងនៅតែកាន់ដៃគ្នា អនុវត្តតាមកិច្ចព្រមព្រៀងនេះដដែល។ ជាមួយនឹងការប្តេជ្ញានេះ កាលចុងខែមីនា ឆ្នាំ២០១៥ រដ្ឋាភិបាលកម្ពុជា និងអូស្ត្រាលី បានចុះអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការអន្តោប្រវេសន៍មួយបន្ថែមទៀត។
ក្រោយមកព័ត៌មាននេះបានស្ងប់ស្ងាត់បន្តិច ប៉ុន្តែមិនបានយូរនោះទេ ក៏ត្រូវបានគាស់កកាយឡើងវិញដោយបណ្តាញព័ត៌មានអូស្ត្រាលី។ គឺនៅអំឡុងពាក់កណ្តាលខែមេសា បណ្តាញព័ត៌មានទាំងនោះ បានទម្លាយព័ត៌មាននៃការបញ្ជូនជនភៀសខ្លួនមកកម្ពុជាចំនួន១០នាក់នៅថ្ងៃទី២០ មេសា។ ភ្លាមៗ រដ្ឋាភិបាលកម្ពុជា បានបដិសេធហើយថែមទាំងបានបញ្ជូនក្រុមការងាររបស់ខ្លួនទៅកាន់កោះណៅរុ ដើម្បីស្វែងរកអ្នកស្ម័គ្រចិត្តមករស់នៅកម្ពុជាទៀតផង។ កាពីព្រហស្បតិ៍ទី២១ ឧសភា ព័ត៌មានដ៏រសើបនេះ បានក្លាយជាបច្ចុប្បន្នភាពដែលមហាជនកំពុងចាប់អារម្មណ៍។ នោះគឺប្រមុខរដ្ឋាភិបាលកម្ពុជា នៅថ្ងៃពុធ បានបញ្ជាក់ និងព្រមទទួលយកជនភៀសខ្លួននោះចំនួន៤នាក់ ជាផ្លូវការ។
បើតាមក្រសួងមហាផ្ទៃ ជនភៀសខ្លួនទាំង៤នាក់នោះ ម្នាក់ជាជនជាតិរូហ៊ីងយ៉ា មកពីប្រទេសមីយ៉ាន់ម៉ា និង៣នាក់ទៀត ជាជនជាតិអ៊ីរ៉ង់ហើយក្នុងនោះមានម្នាក់ជាស្ត្រី។ លោកខៀវ សុភ័គ អ្នកនាំពាក្យក្រសួងមហាផ្ទៃ មិនបានបញ្ជាក់ថា ជនភៀសខ្លួនទាំង៤នាក់ នឹងមកដល់កម្ពុជានៅពេលណា ហើយនឹងត្រូវឲ្យរស់នៅនៅកន្លែងណានោះទេ។
ប៉ុន្តែកន្លងមករដ្ឋាភិបាលកម្ពុជា ធ្លាប់បានគូសបញ្ជាក់ថា ក្រុមដំបូងនៃជនភៀសខ្លួនអូស្ត្រាលីនឹងត្រូវរៀបចំឲ្យរស់នៅក្នុងទីក្រុងភ្នំពេញ មុនបញ្ជូនទៅឲ្យរស់នៅនៅក្រៅទីក្រុង។ ទោះបីកម្ពុជាមិនបញ្ជាក់ពីកាលបរិច្ឆេទនៃការមកដល់ជនភៀសខ្លួននោះមែន ប៉ុន្តែសារព័ត៌មានABC របស់អូស្ត្រាលី បានចុះផ្សាយឲ្យដឹងថា ជនភៀសខ្លួនទាំង៤នាក់នេះ ត្រូវបានដឹកបញ្ជូនចេញ ពីកោះណៅរុ ហើយនៅពេលនេះកំពុងត្រៀមបញ្ជូនមកកាន់ប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ