ACU ស្វែងរកការបំភ្លឺ ចំពេលលោករៀល ខេមរិន្ទ្រ នៅក្រៅប្រទេស
លោករៀល ខេមរិន្ទ្រ តំណាងរាស្ត្រមណ្ឌលស្វាយរៀង របស់គណបក្សសង្គ្រោះជាតិ ត្រូវបានចោទពីបទកេងប្រវ័ញ្ចយកប្រាក់ចំនួន ៥ម៉ឺន៥ពាន់ដុល្លារ ពីការរៀបចំដំណើរទៅមើលបង្គោលព្រំដែន។ ការលើកឡើងនេះ ត្រូវបានបង្ហាញដោយអង្គភាពប្រឆាំងអំពើពុករលួយ (ACU) នៅក្នុងលិខិតចំហរមួយ ផ្ញើរសុំការបំភ្លឺ ពីលោករៀល ខេមរិន្ទ្រ ចុះថ្ងៃទី ៣១ កក្កដា ឆ្នាំ ២០១៥ តែទើបត្រូវបានផ្សព្វផ្សាយនៅព្រឹកថ្ងៃទី ១១សីហានេះ។ លោករៀល ខេមរិន្ទ្រ នៅមិនទាន់ បានឆ្លើយតប ពីបញ្ហានេះនៅឡើយទេ ដោយសារលោកមានបេសកកម្មនៅក្រៅប្រទេស។ ប៉ុន្តែលោកអ៊ូ ចន្ទរិទ្ធ អ្នកនាំពាក្យគណបក្សសង្គ្រោះជាតិ បានសម្តែងការភ្ញាក់ផ្អើល និងហួសចិត្តចំពោះលិខិតនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ចំពេលដែលកម្តៅនយោបាយ និងបញ្ហាព្រំដែន រវាងកម្ពុជា-វៀតណាម កំពុងតែពុះកញ្ច្រោល ស្រាប់តែនៅពេលនេះ លោករៀល ខេមរិន្ទ្រ តំណាងរាស្ត្រគណបក្សសង្គ្រោះជាតិ និងជាអ្នកចេញមុខចេញមាត់ ក្នុងការនាំមនុស្សទៅពិនិត្យមើលបង្គោលព្រំដែន រងការចោទប្រកាន់ថាបានកេងប្រវ័ញ្ច ប្រាក់ចំនួន ៥ម៉ឺន ៥ពាន់ដុល្លារអាមេរិក ពីការរៀបចំដំណើរទៅមើលបង្គោលព្រំដែនកាលពីពេលថ្មីៗនេះ។
សេចក្តីសង្ស័យនេះ បានកើតឡើងតាមរយៈការសុំការបំភ្លឺរបស់លោកឱម យិនទៀង ប្រធានអង្គភាពប្រឆាំងអំពើពុករលួយ (ACU) ទៅកាន់លោករៀល ខេមរិន្ទ្រ បន្ទាប់ពីលោកបានទទួលពាក្យបណ្តឹងចំនួន ៣ដោយសំងាត់ថា តំណាង រាស្ត្របក្សប្រឆាំងរូបនេះ បានកេងប្រវ័ញ្ចយកប្រាក់របស់ពួកគេ ដែលគ្រោងយកទៅចំណាយលើការរៀបចំ ដំណើរទៅពិនិត្យបង្គោលព្រំដែន។
ដោយសារលោករៀល ខេមរិន្ទ្រ ត្រូវទៅបំពេញបេសកកម្មនៅក្រៅប្រទេស មកដល់ពេលនេះ នៅមិនទាន់មានការបំភ្លឺជាក់លាក់ ចំពោះការចោទប្រកាន់នេះនៅឡើយទេ។ ប៉ុន្តែលោកអ៊ូ ចន្ទរិទ្ធ អ្នកនាំពាក្យស្តីទីគណបក្សសង្គ្រោះជាតិ បានសម្តែងការភ្ញាក់ផ្អើល និងហួសចិត្តជាខ្លាំង។ ភ្ញាក់ផ្អើល ព្រោះលោកយល់ថា នេះមិនមែនជាសមត្ថកិច្ចរបស់ ACU ដែលគួរចាត់ការរឿងនេះ ដោយសារនេះវាមិនមែនជារឿងពុករលួយ តែជារឿងកេងប្រវ័ញ្ច។ តាមលោកអ៊ូ ចន្ទរិទ្ធ មកដល់ពេលនេះ ខាងគណបក្សសង្គ្រោះជាតិ ក៏នៅមិនទាន់ទទួលបានលិខិតនេះ ជាផ្លូវការនៅឡើយទេ គ្រាន់តែឃើញតាមការផ្សព្វផ្សាយតែប៉ុណ្ណោះ។
ចំពោះលោកស្រីយោម បុប្ឋា ដែលជាគូដណ្តឹងរបស់លោករៀល ខេមរិន្ទ្រ បានប្រាប់វិទ្យុបារាំងថា នេះគ្រាន់តែជាការបង្ខួចកិត្តិយសដល់លោករៀល ខេមរិន្ទ្រតែប៉ុណ្ណោះ ដោយសារលោកមានសកម្មភាពច្រើន ក្នុងរឿងព្រំដែនកម្ពុជា-វៀតណាម ហើយបញ្ហានេះ កំពុងតែឡើងកម្តៅខ្លាំង។ លោកស្រី បានបញ្ជាក់ថា លិខិតចោទប្រកាន់ មិនមានឈ្មោះអ្នកចោទ ដូច្នេះរាល់ការក្លែងបន្លំ គឺនរណាក៏អាចធ្វើបានដែរ។
សូមបញ្ជាក់ថា នេះមិនមែនជាការចោទប្រកាន់របស់ ACU នោះទេ។ ការចេញលិខិតនៅពេលនេះ គឺគ្រាន់តែជាការសុំការបំភ្លឺពីលោករៀល ខេមរិន្ទ្រ តែប៉ុណ្ណោះ។ ក្នុងលិខិតរបស់ ACU បានស្នើឲ្យលោករៀល ខេមរិន្ទ្រ ធ្វើការបំភ្លឺដោយភ្ជាប់មកជាមួយនូវឯកសារនានា សម្រាប់បញ្ជាក់ ដើម្បី ACU ធ្វើការវាយតម្លៃ មុននឹងសម្រេចបន្តនីតិវិធីរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ