ទីក្រុងភ្នំពេញចាប់ផ្តើមស្ងប់ស្ងាត់ ខណៈប្រជាពលរដ្ឋបានសម្រុកទៅលេងស្រុកកំណើតច្រើននៅថ្ងៃនេះ
ទិដ្ឋភាពនៅតាមដងផ្លូវនានានៅក្នុងទីក្រុងភ្នំពេញ គិតត្រឹមល្ងាច ថ្ងៃទី ២៦ កញ្ញានេះ បានចាប់ផ្តើមប្រែជាស្ងប់ស្ងាត់ ខណៈប្រជាពលរដ្ឋខ្មែររាប់ម៉ឺនសែននាក់ បានសម្រុកទៅលេងស្រុកកំណើតនៅក្នុងឱកាសនៃពិធីបុណ្យភ្ជុំបិណ្ឌ។ ដោយឡែក លើបញ្ហាចរាចរវិញ ប្រមុខរដ្ឋាភិបាលកម្ពុជានៅថ្ងៃទី ២៦ កញ្ញា នេះ បានចេញមកអំពាវនាវតាមបណ្តាញសង្គមហ្វេសបុក ឲ្យប្រជាពលរដ្ឋកម្ពុជាបើកបរដោយការយោគយល់ខ្ពស់ និងគោរពច្បាប់ចរាចរទាំងអស់គ្នា ដើម្បីសុខសុវត្ថិភាព នៅក្នុងឱកាសនៃពិធីបុណ្យភ្ជុំបិណ្ឌ។
ចុះផ្សាយនៅថ្ងៃ៖
ស្តាប់ - ០២:០៥
គិតត្រឹមល្ងាចថ្ងៃទី ២៦ កញ្ញា ទិដ្ឋភាពនៅតាមដងផ្លូវមួយចំនួននៅក្នុងទីក្រុងភ្នំពេញ បានចាប់ផ្តើមប្រែជាស្ងប់ស្ងាត់ ខណៈដែលប្រជាពលរដ្ឋរាប់សែននាក់បានសម្រុកចាកចេញពីទីក្រុងភ្នំពេញទៅកាន់ស្រុកកំណើត ដើម្បីជួបជុំក្រុមគ្រួសារនៅក្នុងឱកាសនៃពិធីបុណ្យភ្ជុំបិណ្ឌ។ ដោយឡែក អគារសាធារណៈរបស់រដ្ឋ ហាងលក់ទំនិញតូចធំ បុគ្គលិកធនាគារ និងក្រុមហ៊ុនឯកជននានា ក៏បានចាប់ផ្តើមបិទទ្វារនិងឈប់សម្រាកដែរ ចាប់តាំងពីថ្ងៃទី ២៦ កញ្ញា នេះតទៅ។
គួរជំរាបជូនថា ពិធីបុណ្យភ្ជុំបិណ្ឌ គឺជាពិធីបុណ្យជាតិនិងសាសនាដ៏ធំមួយរបស់ប្រជាពលរដ្ឋខ្មែរ បន្ទាប់ពីបុណ្យចូលឆ្នាំ ដែលរដ្ឋាភិបាលកម្ពុជាបានអនុញ្ញាតឲ្យប្រជាពលរដ្ឋនិងមន្ត្រីរាជការ បុគ្គលិកក្រុមហ៊ុនទាំងអស់ ឈប់សម្រាករយៈពេល៣ថ្ងៃ ដើម្បីធ្វើបុណ្យ និងជួបជុំក្រុមគ្រួសារ។
ដោយឡែកលើបញ្ហាចរាចរណ៍វិញ ក៏ជាបញ្ហាដ៏ឈឺក្បាលរបស់អាជ្ញាធរនិងភាគីពាក់ព័ន្ធផងដែរ។ តាមរយៈទំព័រហ្វេសបុកផ្លូវការរបស់ខ្លួន នៅល្ងាចថ្ងៃទី ២៦ កញ្ញានេះ ប្រមុខរដ្ឋាភិបាលកម្ពុជា លោក ហ៊ុន សែន បានអំពាវនាវឲ្យប្រជាពលរដ្ឋកម្ពុជាបើកបរដោយការយោគយល់គ្នាខ្ពស់ និងគោរពច្បាប់ចរាចរទាំងអស់គ្នាដើម្បីសុខសុវត្ថិភាព ជាពិសេសនៅក្នុងរដូវបុណ្យភ្ជុំបិណ្ឌនេះ។ បើផ្អែកតាមរបាយការណ៍របស់អគ្គស្នងការនគរបាលជាតិ កាលពីខែតុលាឆ្នាំមុន យ៉ាងហោចណាស់មនុស្សចំនួន៥៥នាក់បានស្លាប់ និងជិត២០០នាក់បានរងរបួសធ្ងន់និងស្រាល នៅក្នុងរយៈពេល៣ថ្ងៃ នៃពិធីបុណ្យភ្ជុំបិណ្ឌនេះ។ ហើយបើប្រៀបធៀបរយៈពេលដូចគ្នាក្នុងឆ្នាំ២០១៧ អ្នកស្លាប់មានការកើនឡើងចំនួន២% និងកើនឡើង២៥% បើធៀបនឹងឆ្នាំ២០១៦។
គួរជំរាបជូនថា នៅក្នុងឱកាសនៃពិធីបុណ្យភ្ជុំបិណ្ឌនេះ អាជ្ញាធររាជធានីភ្នំពេញក៏បានបណ្តេញរថយន្តក្រុងសាធារណៈប្រមាណជា១២០គ្រឿង ដើម្បីដឹកប្រជាពលរដ្ឋដោយឥតគិតថ្លៃរយៈពេល៥ថ្ងៃ ដោយចាប់ពីថ្ងៃទី ២៦ ដល់ថ្ងៃទី ៣០ កញ្ញា។ ក្រៅពីនេះ ក្រសួងសាធារណៈការនិងដឹកជញ្ជូនឯណោះវិញ ក៏បានប្រកាសឲ្យអ្នកធ្វើដំណើរតាមរថភ្លើង៣ខ្សែពីភ្នំពេញទៅកាន់ខេត្តកំពតនិងខេត្តព្រះសីហនុ និងពីភ្នំពេញទៅខេត្តពោធិ៍សាត់ ប៉ោយប៉ែត ដោយឥតគិតថ្លៃផងដែរ ចាប់តាំងពីថ្ងៃទី ២៥ រហូតដល់ថ្ងៃទី ៣០ កញ្ញា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ