ក្រុមព្រះសង្ឃដាក់ញត្តិទៅស្ថាប័នពាក់ព័ន្ធក្រោយរកឃើញបទល្មើសនៅព្រៃឡង់
ក្រុមព្រះសង្ឃដឹកនាំដោយព្រះតេជគុណ ប៊ុត ប៊ុនតិញ ប្រធានអង្គការបណ្ដាញព្រះសង្ឃឯករាជ្យដើម្បីយុត្តិធម៌សង្គម បានហែក្បួនយកញត្តិទៅដាក់ស្ថាប័នពាក់ព័ន្ធនៅព្រឹកថ្ងៃចន្ទទី០៦កក្កដានេះ។ ជាញត្តិដែលបញ្ជាក់ពីការរកឃើញបទល្មើសកាប់បំផ្លាញព្រៃឈើក្នុងតំបន់ព្រៃឡង់ ខេត្តព្រះវិហារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
ការដាក់ញត្តិធ្វើឡើងបន្ទាប់ពីដំណើរធម្មយាត្រាចុះទៅបំបួសដើមឈើរបស់ក្រុមព្រះសង្ឃប្រជាសហគមន៍ និស្សិត ជាង១០០អង្គនាក់នៅតំបន់ព្រៃឡង់។នៅក្នុងដំណើរធម្មយាត្រានោះ ក្រុមព្រះសង្ឃ បានរកឃើញបទល្មើសព្រៃឈើនិងចាប់បានរណាអាឈើចំនួន៥គ្រឿងយកមកភ្នំពេញប្រគល់ជូនរដ្ឋបាលព្រៃឈើ។
បើតាមសង្ឃដីការបស់ព្រះតេជគុណ ប៊ុត ប៊ុនទិញ ញត្តិបញ្ជាក់ពីការរកឃើញបទល្មើសកាប់បំផ្លាញព្រៃឈើក្នុងតំបន់ព្រៃឡង់ ខេត្តព្រះវិហារនេះ ត្រូវយកទៅដាក់នៅរដ្ឋបាលព្រៃឈើ សភាជាតិ និង ខុទ្ទកាល័យលោកនាយករដ្ឋមន្ត្រី ហ៊ុន សែន។ ជាញត្តិដែលផ្ដោតសំខាន់ទៅលើការស្នើសុំបីចំណុចរួមមាន៖ទី១-ទប់ស្កាត់បទល្មើសព្រៃនៅតំបន់ព្រៃឡង់ទី២-ពន្លឿនអនុក្រឹត្យដែលគ្រោងដាក់ព្រៃឡង់ជាតំបន់ការពារ ទី៣-ផ្អាកបណ្ដោះអាសន្នចំពោះគម្រោងក្រុមហ៊ុនធី អិន ធី ដែលកំពុងតែវិនិយាគទៅលើតំបន់ព្រៃឡង់ ដូចជាការសាងសង់ខុនដូ និង គម្រោងសាងសងព្រលានយន្តហោះជាដើម។
មូលហេតុនៃទាមទារឲ្យផ្អាក បើតាមប្រភពដដែលគឺចង់ឲ្យរដ្ឋាភិបាលសិក្សាឡើងវិញចំពោះគម្រោងនេះ។គួរកត់សម្គាល់ដែរថាក្បូនដាក់ញត្តិដែលមានអ្នកចូលរួមដង្ហែជាង១០០នាក់នៅថ្ងៃចន្ទនេះមិនមានការរារាំងពីកម្លាំងសមត្ថកិច្ចនោះទេ។តែផ្ទុយទៅវិញកម្លាំងសមត្ថកិច្ចបានចូលរួមជួយសម្រួលចរាចរណ៍។ បើតាមអ្នកចូលរួមការដាក់ញត្តិនឹងធ្វើឡើងរយៈពេលពេញមួយថ្ងៃចន្ទនេះតែម្ដង។
ដោយឡែកចំពោះក្បូនធម្មយាត្រាចុះទៅបំបួសដើមឈើនៅតំបន់ព្រៃឡង់ពីសំណាក់ក្រុមសង្ឃខាងលើកាលពីពីរថ្ងៃមុនក៏មិនមានការឃាត់ឃាំងពីអាជ្ញាធរខេត្តដែរ បន្ទាប់ពីមានការពន្យល់ពីព្រះសង្ឃ។ក្នុងនោះអ្នកចូលរួមបានបំបួសដើមឈើចំនួន៣០០ដើមនិងបានវាស់ដីព្រៃក្នុងតំបន់ព្រៃឡង់ចំនួន១០ហិកតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ