តុលាការកម្ពុជាចេញដីកានាំខ្លួនលោកជុន ច័ន្ទបុត្រ
នៅថ្ងៃទី០២ ឧសភានេះ គឺជាថ្ងៃលោកជុន ច័ន្ទបុត្រនាយករងវិទ្យុអាស៊ីសេរីផ្នែកភាសារខ្មែរចូលបំភ្លឺក្នុងនាមជាជនសង្ស័យ ខណៈដែលនាយករងវិទ្យុអាស៊ីសេរីរូបនេះ បានចាកចេញទៅសហរដ្ឋអាមេរិកវិញ។ ក្រោយការបំភ្លឺរបស់មេធាវី អយ្យការអមសាលាដំបូង បានចេញដីកាឱ្យលោកជុន ច័ន្ទបុត្រចូលខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
នៅទីបំផុតអយ្យការអមសាលាដំបូងរាជធានីភ្នំពេញបានចេញដីកាដោយឱ្យអាជ្ញាធរប្រើប្រាស់កម្លាំងសាធារណៈបង្ខំឱ្យលោកជុន ច័ន្ទបុត្រ បង្ហាញខ្លួននៅតុលាការភ្លាម ខណៈដែលអនុប្រធានវិទ្យុអាស៊ីសេរីរូបនេះ ទើបតែត្រឡប់ទៅដល់សហរដ្ឋអាមេរិកវិញ។ អយ្យការតុលាការបានសំអាងពីមូលហេតុថា ដោយសារតែការគេចវេសរបស់លោកហួត ឃីនវុទ្ធីចំពោះសវនាការឆ្លើយបំភ្លឺនៅថ្ងៃទី០២ ឧសភានេះដែលជាសវនាការដើម្បីឆ្លើយតបទៅនឹងការចោទប្រកាន់ថា បានផ្តល់សេចក្តីប្រកាសដោយភូតកុហុក បន្លំខ្លួនចូលពន្ធនាគារកាលពីថ្ងៃទី១៩ មេសា ទើបតុលាការត្រូវតែចេញដីកានេះដើម្បីជាវិធានការធានានិងផ្តល់ប្រយោជន៍ចំពោះការស៊ើបអង្កេត។
ប៉ុន្តែវិទ្យុអាស៊ីសេរី បានលើកឡើងថា សកម្មភាពរបស់លោកជុន ច័ន្ទបុត្រគឺមិនមែនជាបទឧក្រិដ្ឋដូចការលើកឡើងរបស់តុលាការកម្ពុជានោះទេ។ អាស៊ីសេរី បានហៅវិធានការនេះថា គឺជាការបំប្លែងរឿងទៅជារឿងនយោបាយខណៈដែលការបោះឆ្នោតក្រុមប្រឹក្សាឃុំ-សង្កាត់នៅសល់ប្រមាណជាង១ខែទៀតតែប៉ុណ្ណោះ។
សូមរំលឹកថា លោកជុន ច័ន្ទបុត្របានចាកចេញទៅប្រទេសថៃកាលពីថ្ងៃសុក្រសប្តាហ៍មុនបន្តដំណើរត្រឡប់ទឹកដីសហរដ្ឋអាមេរិកវិញ។ អង្គភាពវិទ្យុអាស៊ីសេរី បានប្រកាសថា ការហៅលោកជុន ច័ន្ទបុត្រត្រឡប់ទៅវិញនេះ គឺដោយសារតែគ្មានជំនឿលើប្រព័ន្ធច្បាប់របស់កម្ពុជា។ អ្នកនាំពាក្យក្រសួងយុត្តិធម៌របស់កម្ពុជា លោកគឹម សន្តិភាពដែលបានធ្វើសន្និសីទសារព័ត៌មានក្រោយការចេញដីកានេះ បានហៅវិទ្យុអាស៊ីសេរីដែលទទួលជំនួយពីសហរដ្ឋអាមេរិកជាវិទ្យុដែលមានវិជ្ជាជីវៈទាបដោយបានការពារទាំងកំរោលលើនីតិវិធីរបស់តុលាការខ្មែរ បុន្តែលោកកឹម សន្តិភាពបានបញ្ជាក់ថាតុលាការនៃរដ្ឋអធិបតេយ្យកម្ពុជានឹងបន្តចំណាត់ការតាមច្បាប់។
បើតាមសេចក្តីប្រកាសរបស់អាស៊ីសេរីដដែល លោកជុន ច័ន្ទបុត្រ ឬហួត ឃីនវុទ្ធីនឹងមិនត្រឡប់មកប្រទេសកម្ពុជាដើម្បីតទល់ក្តីវិញឡើយ។
នៅមុនចេញដីកាបង្ខំនាំខ្លួននេះ មេធាវីការពារក្តីឱ្យលោក ហួត ឃីន វុទ្ធី គឺលោកឌុន វិបុល បានចូលខ្លួនទៅផ្តល់ឯកសារដោះបន្ទុកដែលជាសេចក្តីថ្លែងការណ៍ផ្ញើតាមអីម៉ែលមកពីអាមេរិក អត្តសញ្ញាណប័ណ្ណ និងលិខិតឆ្លងដែន។ បើទោះបីជាបែបណាក៏ដោយ អាស៊ីសេរី បានអះអាងថា វិធានការលើលោកជុន ច័ន្ទបុត្រ ថាជាការបំភិតបំភ័យទៅលើអ្នកយកព័ត៌មានរបស់ខ្លួន ប៉ុន្តែវិទ្យុក៏នៅតែបន្តធ្វើការបម្រើប្រជាជនដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ