ក្រសួងកិច្ចការនារី កំពុងដឹកនាំច្បាប់ គ្រប់គ្រងការពពោះជំនួស
លោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ កាលពីព្រឹកមិញ បានថ្លែងប្រាប់ លោកស្រី គ្រីសស្ទាន ស៊ិន(Lene Kroll Christiansen) តំណាងថ្មី អង្គការមូលនិធិប្រជាជនអង្គការសហប្រជាជាតិ (UNFPA) ប្រចាំកម្ពុជាថា លោកនឹងជំរុញឲ្យ ស្ថាប័នពាក់ព័ន្ធនៅកម្ពុជា ខិតខំប្រឹងប្រែង រៀបចំសេចក្តីព្រាងច្បាប់ពាក់ព័ន្ធបញ្ហាពពោះជំនួស ឲ្យក្លាយទៅជា បញ្ហាស្របច្បាប់នៅកម្ពុជា ដើម្បីទប់ស្កាត់កុំឲ្យកុមារកម្ពុជា ដែលកើតចេញពីការពពោះជំនួសក្លាយទៅជាជនរងគ្រោះ។ ខណៈបណ្តាប្រទេសផ្សេងទៀតចេញច្បាប់ហាមឃាត់មិនឲ្យមានការជួលស្រី្តពពោះ ដើម្បីកើតកូនជំនួស បណ្តាញជំនួញពពោះជំនួសនេះ បានហូរចូលកម្ពុជា ទើបរដ្ឋាភិបាលកម្ពុជា ត្រូវការច្បាប់ទប់ស្កាត់ការពពោះជំនួស ដើម្បីការពារកុមារ ដែលកើតនៅក្នុងផ្ទៃស្ត្រី ដែលគេចង់បាន។
ចុះផ្សាយនៅថ្ងៃ៖
ស្តាប់ - ០២:១៨
អ្នកនាំពាក្យ ក្រសួងការបរទេស និងសហប្រតិបត្តិការ អន្តរជាតិ លោក ជុំ សុន្ទរី បានលើកឡើងថា ការរៀបចំតាក់តែងច្បាប់ស្ដីពីការពពោះជំនួសនេះ គឺដើម្បីអនុញ្ញាតឲ្យបញ្ហាពពោះជំនួស ក្លាយជាបញ្ហាស្របច្បាប់ ខណៈបញ្ហាពពោះជំនួស កំពុងកើតមាននៅកម្ពុជាបច្ចុប្បន្នមិនទាន់មានភាពស្របច្បាប់។ ក្នុងន័យនេះ ប្រសិនបើគ្មានច្បាប់ ហើយមានករណីពពោះជំនួសណាមួយ ដែលមិនប្រក្រតី គាប់ជួនម្តាយ-ឪពុក ដែលចង់បាននោះ មិនទទួលស្គាល់ នឹងនាំឲ្យពិបាកដល់កូនដែលកើតមក នឹងគ្មាន អត្តសញ្ញាណច្បាស់លាស់ ហើយផ្លូវច្បាប់ក៏ពិបាករកឪពុក-ម្តាយពិតប្រាកដដែរ។
អ្នកនាំពាក្យ ក្រសួងកិច្ចការនារី លោក ផុន ពុធបុរី បានបញ្ជាក់ប្រាប់វិទ្យុបារាំងអន្តរជាតិនៅ ថ្ងៃព្រហស្បតិ៍នេះថា ក្រសួងកិច្ចការនារី កំពុងតែញាប់ដៃញាប់ជើង រៀបចំសេចក្តីព្រាងច្បាប់មួយ ស្តីពី «ការគ្រប់គ្រងការពពោះជំនួស» ដែលគ្រោងនឹងបញ្ចប់ការតាក់តែងសេចក្តីព្រាងច្បាប់បឋម នៅក្នុងខែកុម្ភៈនេះ។ បើតាមអ្នកនាំពាក្យក្រសួងកិច្ចការនារី រដ្ឋាភិបាលកម្ពុជាចាត់ទុកថា ច្បាប់នេះមានការចាំបាច់ណាស់ ទើបសម្រេចឲ្យបង្កើតភ្លាមៗ ដើម្បីទប់ស្កាត់កុំឲ្យកុមារកម្ពុជា ក្លាយជាកម្មវត្ថុនៃការជួញដូរ និងការពារផលប្រយោជន៍ស្ត្រី ព្រមទាំងកុមារ។
គួរជម្រាបថា ក្រុមអ្នកជំនាញអន្ដរជាតិ កាលពីឆ្នាំ ២០១៦ កន្លងទៅ បានប្រកាសអាសន្នអំពីតម្រូវការនៃការបង្កើតច្បាប់សម្រាប់សេវាស៊ីឈ្នួលពពោះជំនួសនៅកម្ពុជា ខណៈ ទារកនៅកម្ពុជា យ៉ាងហោចណាស់ ២៣នាក់ បានកើតពីស្ដ្រីខ្មែរដែលស៊ីឈ្នួលពពោះជំនួស ហើយមាន គ្លីនិកយ៉ាងតិច ២ ដែលផ្ដល់សេវាកម្មពពោះជំនួស ដោយក្នុងនោះមានឈ្មួញកណ្ដាល និងភ្នាក់ងារយ៉ាងហោចណាស់ ៥០ រកចំណេញពីសេវានេះ។ ពាក់ព័ន្ធការស៊ីឈ្នួលពពោះជំនួស ខណៈកម្ពុជាគ្មានច្បាប់ កាលពីថ្ងៃទី ២១ ខែវិច្ឆិកា ឆ្នាំ ២០១៦ ព្រះរាជអាជ្ញា អមសាលាដំបូងរាជធានីភ្នំពេញ បានចោទប្រកាន់ គិលានុបដ្ឋាយិកាជនជាតិអូស្ត្រាលីម្នាក់ (Tammy Davis-Charles) ជាស្ថាបនិក ទីភ្នាក់ងារផ្តល់សេវាពពោះជំនួស (Fertility Solution PGD) និងស្រ្តីខ្មែរពីរនាក់ ស៊ីឈ្នួលពពោះឲ្យគេ ពី បទអន្តរការរវាងអ្នកសុំកូន និងស្រ្តីពពោះ និងបទសុំឲ្យផ្តល់ឯកសារដោយទុច្ចរិត តាមមាត្រា ៣៣២ និងមាត្រា ៦៣២ នៃក្រមព្រហ្មទណ្ឌកម្ពុជា។ ជនទាំងនេះក៏ត្រូវបានចោទប្រកាន់ពីបទប្រើប្រាស់ឯកសារក្លែងក្លាយផងដែរ។ ស្រ្តីអូស្រ្តាលី និងជនផ្សំគំនិតជាជនជាតិកម្ពុជាទាំងពីរនាក់ អាចប្រឈមនឹងការជាប់ពន្ធនាគាររយៈពេល ២ ឆ្នាំ ប្រសិនជាត្រូវបានរកឃើញថា មានកំហុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ