ក្រសួងការបរទេសកម្ពុជាប្រាប់អង្គការអន្តរជាតិកុំឲ្យប្រព្រឹត្តិខុសច្បាប់នៅកម្ពុជា
ក្នុងជំនួបលើកទី១ជាមួយអង្គការអន្តរជាតិ រដ្ឋមន្ត្រីការបរទេសកម្ពុជា នៅថ្ងៃទី២៩ ខែមករានេះ បានអំពាវនាវឲ្យអង្គការអន្តរជាតិ ដែលកំពុងដំណើរការនៅក្នុងប្រទេសកម្ពុជា ត្រូវអនុវត្តឲ្យបានត្រឹមត្រូវតាមច្បាប់កម្ពុជា ហើយមិនត្រូវពាក់ព័ន្ធនឹងការលាងលុយនោះទេ។ ការអំពាវនាវរបស់រដ្ឋមន្ត្រីការបរទេស ធ្វើឡើងបន្ទាប់ពីអង្គការក្រៅរដ្ឋាភិបាលមួយចំនួនបានបង្ហាញពីការព្រួយបារម្ភចំពោះសេរីភាពក្នុងការអនុវត្តការងាររបស់ខ្លួន។
ចុះផ្សាយនៅថ្ងៃ៖
ស្តាប់ - ០២:០៧
លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានអំពាវនាវឲ្យអង្គការអន្តរជាតិទាំងអស់ត្រូវអនុវត្តតាមក្របខ័ណ្ឌច្បាប់ និងអនុលោមតាមបទបញ្ញត្តិ ដែលមានជាធរមានក្នុងប្រទេសកម្ពុជា។ ក្នុងជំនួបជាមួយអង្គការអន្តរជាតិនាថ្ងៃទី២៩ ខែមករា រដ្ឋមន្ត្រីក្រសួងការបរទេសរូបនេះ ក៏បានអំពាវនាវឲ្យអង្គការអន្តរជាតិទាំងនោះ ជៀសវាងជាដាច់ខាតនូវសកម្មភាព ដែលអាចភ្ជាប់ ឬជាប់ពាក់ព័ន្ធនឹងការលាងលុយ, ការផ្តល់ហិរញ្ញប្បទានដល់ភេរវកម្ម និងការផលិតអាវុធជាដើម។
លោកប្រាក់ សុខុន បន្តថា ច្បាប់ស្តីពីអង្គការក្រៅរដ្ឋាភិបាលមិនត្រូវបានអនុម័ត ដើម្បីរឹតបន្តឹងសកម្មភាពរបស់អង្គការក្រៅរដ្ឋាភិបាលទេ តែច្បាប់នេះតម្រូវឱ្យអង្គការទាំងអស់ធ្វើប្រតិបត្តិការ ដោយតម្លាភាព, គណនេយ្យភាព, និងសុចរិតភាព។
សូមជម្រាបជូនថានៅមុនពេលបោះឆ្នោតជ្រើសរើសតំណាងរាស្ត្រអាណត្តិទី៦ ឆ្នាំ២០១៨ អង្គការអន្តរជាតិធំៗមួយចំនួនត្រូវបានរដ្ឋាភិបាលកម្ពុជាចាត់វិធានការបិទសកម្មភាពរបស់ពួកគេ ដែលអង្គការអន្តរជាតិទាំងនោះមានដូចជាវិទ្យាស្ថានសាធារណរដ្ឋអន្តរជាតិ(IRI)និង វិទ្យាស្ថានជាតិប្រជាធិបតេយ្យ(NDI)ជាដើម ក្រោមហេតុផលថា មិនបានបង់ពន្ធ និង បំពេញការងារខុសច្បាប់នៅកម្ពុជាជាដើម។
លោក Roberto Panetto ជាតំណាងមកពីមូលនិធិដុនបូស្កូកម្ពុជា ដែលបានចូលរួមនៅក្នុងជំនួបជាមួយក្រសួងការបរទេសនាថ្ងៃទី២៩ ខែមករានេះ បានលើកឡើងថា លោកមានការពេញចិត្តនូវការគាំទ្រពីរដ្ឋាភិបាល ដែលមិនបានយកពន្ធលើសម្ភារៈនាំចូលរបស់មូលនិធិដុនបូស្កូកម្ពុជា ហើយបានផ្តល់សេរីភាពនិងការទុកចិត្តដល់មូលនិធិដុនបូស្កូកម្ពុជា។
ជាការកត់សម្គាល់ជំនួបលើកទី១រវាងក្រសួងការបរទេស និងអង្គការអន្តរជាតិក្នុងប្រទេសកម្ពុជានេះ ធ្វើឡើងបន្ទាប់ពីក្រសួងមហាផ្ទៃកម្ពុជាជួបជាមួយក្រុមអង្គការសង្គមស៊ីវិលក្នុងប្រទេស កាលពីថ្ងៃទី១៧ ខែមករាកន្លងទៅ។ បើតាមក្រសួងការបរទេសកម្ពុជា គិតត្រឹមខែធ្នូឆ្នាំ២០១៨ មានអង្គការអន្តរជាតិចំនួន៣៨៦ស្ថាប័ន ត្រូវបានក្រសួងការបរទេសទទួលស្គាល់ ឬបានចុះអនុសារណៈយោគយល់គ្នា(MOU)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ