សាលាឧទ្ធរណ៍ទាត់ចោលសំណើសុំនៅក្រៅឃុំរបស់មន្ត្រីអាដហុក និងគ.ជ.ប
បន្ទាប់ពីបើកសវនាការពេញមួយព្រឹកថ្ងៃចន្ទនេះ សាលាឧទ្ធរណ៍បានសម្រេចទាត់ចោលសំណើសុំនៅក្រៅឃុំបណ្តោះអាសន្នរបស់មន្ត្រីសិទ្ធិមនុស្សចំនួន៤ នាក់ និងមន្រ្តីគ.ជ.បម្នាក់ទៀត។ ការទាត់ចោលនេះ គឺធ្វើឡើងក្រោយពីសាលាដំបូងរាជធានីភ្នំពេញ បានទាត់ចោលសំណើសុំនៅក្រៅឃុំរបស់ពួកគេនេះម្តងរួចមកហើយកាលពីខែមុន។
ចុះផ្សាយនៅថ្ងៃ៖
ស្តាប់ - ០១:៤៣
ហេតុផលដែលសាលាឧទ្ធរណ៍សម្រេចទាត់ចោលសំណើសុំនៅក្រៅឃុំនេះ គឺដោយសារតែមានការព្រួយបារម្ភចំពោះបញ្ហាសន្តិសុខ ការបង្កឲ្យមានការលំបាកដល់ការស៊ើបសួរអង្កេតលើជនជាប់ចោទ និងការធានារក្សាជនជាប់ចោទទុកឲ្យតុលាការចាត់ការទៅតាមផ្លូវច្បាប់។ ម្យ៉ាងវិញទៀត បទល្មើស ដែលពួកគេបានប្រព្រឹត្តនេះ គឺជាបទល្មើសឧក្រិត ដែលមិនអាចអនុញ្ញាតឲ្យនៅក្រៅឃុំបណ្តោះអាសន្នបាន។
លោកសំ សុគង់ មេធាវីការពារក្តីឲ្យលោកនី ចរិយា បានលើកឡើងថា លោកមិនអាចទទួលយកបាននោះទេចំពោះការសម្រេចបែបនេះ ព្រោះថា ទាំងលោក និងទាំងក្រុមមេធាវីការពារក្តីឲ្យមន្ត្រីសិទ្ធិមនុស្សអាដហុក សុទ្ធតែបានលើកហេតុផល ដែលមានលក្ខណៈគ្រប់គ្រាន់ក្នុងការអាចដោះលែងឲ្យនៅក្រៅឃុំបាន ចំពោះមុខចៅក្រម។ ប៉ុន្តែត្រូវចៅក្រម បដិសេធចោលទៅវិញ។ យ៉ាងណាក៏ដោយ ក្រុមមេធាវីការពារក្តីឲ្យមន្ត្រីគ.ជ.ប និងមន្ត្រីសិទ្ធិមនុស្សអាដហុក នឹងបន្តប្តឹងសារទុក្ខចំពោះសាលដីការបស់សាលាឧទ្ធរណ៍នេះទៅកាន់តុលាការកំពូលបន្តទៀតនៅសហ្តហ៍ក្រោយ។
សូមបញ្ជាក់ថា កាលពីខែមុននេះ សាលាដំបូងរាជធានីភ្នំពេញក៏ធ្លាប់បានទាត់ចោលសំណើសុំនៅក្រៅឃុំបណ្តោះអាសន្នរបស់អ្នកទាំងអស់នេះផងដែរ។ កាលណោះ តុលាការបានលើកហេតុផលសំខាន់ថា គឺដើម្បីរក្សាទុកជនជាប់ចោទយកមកអនុវត្តទៅតាមនីតិវិធីរបស់តុលាការ។
លោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត ត្រូវបានតុលាការក្រុងភ្នំពេញសម្រេចឃុំខ្លួនបណ្តោះអាសន្ននៅពន្ធនាគារក្រុងភ្នំពេញ (PJ) ក្រោមបទចោទប្រកាន់«សមគំនិតក្នុងរឿងសូកប៉ាន់សាក្សី»។ ចំណែកមន្ត្រីសិទ្ធិមនុស្សអាដហុកទាំង៤រូប គឺ លោក នី សុខា លោក យី សុខសាន្ត លោក ណៃ វង់ដា និងលោស្រី លឹម មុន្នី ត្រូវបានតុលាការសម្រេចនាំខ្លួនទៅឃុំបណ្តោះអាសន្ននៅពន្ធនាគារព្រៃស ក្រោមបទចោទ«សូកប៉ាន់សាក្សី»។ ពួកគេទាំងនេះ ត្រូវបានចោទប្រកាន់ពាក់ព័ន្ធសំណុំរឿងកញ្ញាខុម ចាន់តារ៉ាទីហៅស្រីមុំ ដែលកំពុងមានរឿងអាស្រូវសេ្នហាជាមួយលោកកឹម សុខា ប្រធានស្តីទីគណបក្សសង្រ្គោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ