ជម្លោះរវាងអ្នកនយោបាយខ្មែរ៖ ក្រុមបញ្ញវន្តខ្មែរមួយក្រុម ស្នើសុំព្រះរាជអន្តរាគមន៍ពីព្រះមហាក្សត្រ
បញ្ញវន្តខ្មែរមួយក្រុម នៅថ្ងៃទី ៣០ តុលា នេះ បានរំលឹកឡើងវិញនូវលិខិតរបស់ខ្លួន ដែលផ្ញើទៅកាន់ព្រះមហាក្សត្រ ដើម្បីសុំព្រះរាជអន្តរាគមន៍ពីព្រះអង្គ លើបញ្ហាជម្លោះរវាងអ្នកនយោបាយនៅកម្ពុជា។ ការរំលឹកឡើងវិញនូវលិខិតសុំព្រះរាជអន្តរាគមន៍ ពីព្រះមហាក្សត្រកម្ពុជានេះ គឺនៅមួយថ្ងៃ ក្រោុយការប្រារព្ធខួប១៤ឆ្នាំ នៃការឡើងគ្រងរាជសម្បត្តិ នៃព្រះមហាក្សត្រកម្ពុជា និងចំពេលដែលភាគីជម្លោះនយោបាយកម្ពុជា រវាងលោកនាយករដ្ឋមន្ត្រី ហ៊ុន សែន និងលោក សម រង្ស៊ី ត្រូវគេមើលឃើញថា បានបន្តបែរខ្នងដាក់គ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
គឺតាំងពីមុនការបោះឆ្នោតជាតិនាខែកក្កដាមកម្ល៉េះ ដែលក្រុមបញ្ញវន្តកម្ពុជាមួយក្រុម រួមមានលោកបណ្ឌិត ឡៅ ម៉ុងហៃ លោកបណ្ឌិត មាស នី លោក លឺ ឡាយស្រេង អតីតឧបនាយករដ្ឋមន្ត្រី និងបញ្ញវន្តមួយចំនួនទៀត បានផ្ញើលិខិតសុំព្រះរាជអន្តរាគមន៍ពីព្រះមហាក្សត្រកម្ពុជា។ បើទោះបីជាលិខិតនេះចាស់ តែពាក្យពេចន៍ ខ្លឹមសារ និងស្មារតីនៃលិខិត មិនទាន់ចាស់ហួសសម័យនៅឡើយទេ។ នេះបើតាមការបញ្ជាក់ពីលោក ឡៅ ម៉ុងហៃ អ្នកវិភាគនិងជាបញ្ញវន្តម្នាក់ ក្នុងចំណោម៥នាក់ ដែលបានសរសេរលិខិតផ្ញើថ្វាយព្រះមហាក្សត្រកាលពីថ្ងៃទី ២៥ ខែឧសភា ប៉ុន្តែត្រូវបានផ្សព្វផ្សាយជាថ្មីនៅថ្ងៃទី ៣០ តុលា នេះ។
ការផ្សព្វផ្សាយជាថ្មី នៃលិខិតសុំព្រះរាជអន្តរាគមន៍ពីព្រះមហាក្សត្រកម្ពុជានេះ គឺធ្វើឡើងនៅមួយថ្ងៃក្រោយពីការប្រារព្ធខួប១៤ឆ្នាំ នៃការឡើងគ្រងរាជសម្បត្តិនៃព្រះមហាក្សត្រកម្ពុជា ព្រះបាទ សម្តេច ព្រះបរមនាថ នរោត្តម សីហមុនី និងចំពេលដែលភាគីជម្លោះនយោបាយកម្ពុជា ត្រូវគេមើលឃើញថា នៅបន្តបែរខ្នងដាក់គ្នានៅឡើយ។
ផ្អែកតាមលិខិតនេះ វិបត្តិរវាងអ្នកនយោបាយខ្មែរ ដែលកំពុងកើតមាននាពេលនេះ ហាក់ដូចជា កំពុងតែឈានទៅរកការបែកបាក់គ្នារវាងខ្មែរ និងខ្មែរគ្នាឯង ដោយគ្មានថ្ងៃបញ្ចប់។ វិបត្តិទាំងនេះ នឹងនាំមកនូវភាពមិនទុកចិត្តគ្នារវាងខ្មែរ និងខ្មែរ កាន់តែជ្រៅទៅៗ ហើយវាក៏កំពុងតែនាំទៅរកស្ថានភាពមួយ ដែលគូភាគីទាំងសងខាង លែងអាចនិយាយរកគ្នាបាន។
តែយ៉ាងណាក៏ដោយ ក្រុមបញ្ញវន្តទាំងនេះយល់ឃើញថា មានតែអង្គព្រះមហាក្សត្រមួយអង្គគត់ ដែលមានព្រះរាជកាតព្វកិច្ចជួយបង្រួបបង្រួមជាតិ និងផ្សះផ្សារភាពបែកបាក់គ្នានេះឡើងវិញបាន។ នោះបើផ្អែកតាមមាត្រា៩ នៃរដ្ឋធម្មនុញ្ញកម្ពុជា ដែលបានកំណត់ថា «ព្រះមហាក្សត្រ ទ្រង់មានតួនាទីដ៏ខ្ពង់ខ្ពស់ជាអាជ្ញាកណ្តាល ដើម្បីធានាការប្រព្រឹត្តទៅ នៃអំណាចសាធារណៈឲ្យមានភាពទៀងទាត់»។
លោកបណ្ឌិត ឡៅ ម៉ុងហៃ អ្នកវិភាគនិងតំណាងឲ្យក្រុមបញ្ញវន្តទាំងនេះ បានលើកឡើងថា ប្រសិនបើជម្លោះនេះនៅតែបន្តអូសបន្លាយកាន់តែយូរតទៅទៀត នោះវានឹងធ្វើឲ្យប៉ះពាល់ការទទួលស្គាល់រដ្ឋាភិបាលកម្ពុជា ក្រោយការបោះឆ្នោត កាលពីខែកក្កដាកន្លងមក។ បើតាមលោក ឡៅ ម៉ុងហៃ បញ្ហាខ្មែរគួរដោះស្រាយដោយប្រើប្រាស់យន្តការដែលមានស្រាប់ ហើយដែលធ្លាប់ត្រូវបានប្រើប្រាស់ជាច្រើនដងរួចមកហើយ។ យ៉ាងណាក៏ដោយ បើតាមលោក ឡៅ ម៉ុងហៃ លិខិតនេះ នៅមិនទាន់ទទួលបានការឆ្លើយតបពីព្រះមហាក្សត្រកម្ពុជា នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ