អ្នកវិភាគសង្គមថាអ្នកនយោបាយកំពុងតែខ្លាចស្រមោលខ្លួនឯង!
បន្ទាប់ពីលោកនាយករដ្ឋមន្ត្រី ហ៊ុន សែន ព្រមាននិងគំរាមមេអង្គការសង្គមស៊ីលវិលមួយ ថាកុំឲ្យលូកមាត់ក្នុងរឿងនយោបាយរួចមក, អ្នកវិភាគសង្គមនយោបាយ ក៏បានស្ងាត់មាត់ឈឹងដែរ។ តាំងពីម្សិលមិញរហូតដល់ព្រឹកនេះ លើទំព័រកាសែត និងតាមវិទ្យុអន្តរជាតិធំៗ គឺគ្មានឡើយ យោបល់របស់អ្នកវិភាគដែលគេធ្លាប់បានអាន និងបានស្តាប់ឮ ដូចរាល់ដង។ ក៏ប៉ុន្តែ ពួកគេទាំងនេះ គឺនៅតែបន្តវិភាគនិងចេញមតិយោបល់ នៅលើបណ្តាញសង្គមFacebook ផ្ទាល់ខ្លួនដដែល។
ចុះផ្សាយនៅថ្ងៃ៖
ស្តាប់ - ០២:៣៩
ក្រោយពីការគំរាមចំៗរបស់ប្រមុខរដ្ឋាភិបាលចំពោះអ្នកវិភាគ និងរួមទាំងការព្រមានម្តងទៀតនៅថ្ងៃទី ៦មីនាទៅលើប្រធានអង្គការសង្គមស៊ីវិល បានធ្វើឲ្យបណ្ឌិត មាស នី អ្នកតាមដានការអភិវឌ្ឍសង្គម ហាក់លំបាកនៅក្នុងការទាក់ទងសុំការបញ្ចេញយោបល់ ដូចរាល់ដង។
ក៏ប៉ុន្តែបណ្ឌិតរូបនេះ គឺនៅតែបន្តប្រើសិទ្ធិជាពលរដ្ឋរបស់ខ្លួន ដោយបានបញ្ចេញសំណេរតាម Facebook។ លោក មាស នី សរសេរថា «មនុស្សម្នាក់ដែលកំពុងស្ថិតនៅក្នុងស្ថានភាពខ្លាចស្រមោលខ្លួនឯង រមែងតែសម្តែងចេញនូវភាពព្រួយបារម្ភ និងប្រុងប្រយ័ត្នជានិច្ច! ហើយក៏បានប្រព្រឹត្តអំពើមិនសមភ្នែកជាច្រើន ដែលអាចឲ្យសាធារណជនយល់ថា គាត់កំពុងមានការភ័យខ្លាចរហូតដល់ពេលខ្លះ គាត់ត្រូវបាត់បង់ការគ្រប់គ្រងអារម្មណ៍ខ្លួនឯង ផងក៏មាន»។
ជាមួយគ្នានេះ លោក មឿន តុលា នាយកមជ្ឈមណ្ឌលសម្ពន្ធ័ភាពការងារ និងសិទ្ធិមនុស្ស (សង់ត្រាល់) សរសេរបែបប្រយោលដូច្នេះថា «មិនដឹងថាអ្នកណាចាញ់បោកអ្នកណាទេ តែមើលទៅដូចជាចាញ់បោកគេច្រើនជាង ហើយប្រហែលជាដឹងខ្លួនថាចាញ់បោកគេមែនមើលទៅ បានជាច្រឡោ ច្រង៉េងច្រង៉ាង ជំទាស់មិនរើសទីកន្លែងអញ្ចឹង!»
ចំណែកអ្នកវិភាគផ្សេងទៀត ផ្តើមប្រតិកម្មចំពោះអ្នកនយោបាយដែលមិនឲ្យអ្នកផ្សេងលូកលាត់ក្នុងរឿងនយោបាយ។ សាស្ត្រាចារ្យវិទ្យាសាស្ត្រនយោបាយ បណ្ឌិត ចាន់ វិបុល សរសេរក្នុង Facebook ផ្ទាល់ខ្លួនយ៉ាងខ្លីថា «មនុស្សគ្រប់រូប មិនអាចមិនខ្វល់ខ្វាយ អំពីនយោបាយបានទេ! ព្រោះនយោបាយ គឺជាការដឹកនាំ ធ្វើឲ្យរីកចម្រើន និងសុខសាន្ត។ វាជាជីវិត»។
ទន្ទឹមនេះ សារមួយទៀតរបស់លោក មឿន តុលា បានបង្ហោះរូបភ្ជាប់ជាមួយភាសាអង់គ្លេសយ៉ាងខ្លីថា Shame ប្រែថា អាម៉ាស់ ឬការអៀនខ្មាស់ និងដោយសរសេរថា «ជាទូទៅ អ្នកនយោបាយដែលមានចរិតអាក្រក់ តែងមិនចង់ឲ្យប្រជាពលរដ្ឋខ្វាយខ្វល់រឿងនយោបាយទេ គឺងាយពួកគេបោកប្រាស់ និងកេងប្រវ័ញ្ចថវិកាជាតិ បំផ្លាញធនធានធម្មជាតិ ។ល។ ដើម្បីបម្រើមហិច្ចតាបក្សពួក និងក្រុមគ្រួសារខ្លួន។ ហេតុនេះបើប្រជាពលរដ្ឋយល់ស្របឈប់ខ្វាយខ្វល់ពីរឿងនយោបាយ គឺពួកគាត់នឹងរងគ្រោះដោយសារការដឹកនាំរបស់អ្នកនយោបាយទុច្ចរិតទាំងនោះមិនខាន»។
រីឯប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ សរសេរបែបចំអកថា «មិនចង់ឲ្យនិយាយរឿងនយោបាយ ហ្នឹងបែបចង់ឲ្យនិយាយរឿងក្នុងខោ ហើយមើលទៅ!» «គិតថាចង់ផ្អាកផឹក មួយរយៈ ហើយអង្គុយសើចម្តង ដោយសារតែអ្នកផឹកជាមួយគ្នា មានអ្នកខ្លះស្រវឹង រាគនោម រាគអាចម៍ដាក់ខោ ហើយម្នាក់ទៀត ស្រវឹងហើយដើរជាន់អាចម៍ឆ្កែអ្នកភូមិ ហើយគំរាមប្តឹងម្ចាស់ឆ្កែយកលុយទៀតផង»។
ជាមួយគ្នានេះ នាយកមជ្ឈមណ្ឌលសម្ពន្ធ័ភាពការងារ និងសិទ្ធិមនុស្ស លោក មឿន តុលា ក៏បានចាប់អារម្មណ៍ពីការទម្លាយសារសម្ងាត់ជាសំឡេង ថា ឱកាសនេះ គឺជាអាណិត្តការបែកធ្លាយ!
ជាការកត់សម្គាល់ លោកសាស្ត្រាចារ្យ សូរ ចន្ថា និងលោក អ៊ូ វីរៈ អ្នកតាមដានការអភិវឌ្ឍដែលធ្លាប់បញ្ចេញសារតាម Facebook និងតាមវិទ្យុនានា ក្នុងFacebook ផ្ទាល់ខ្លួន ២ថ្ងៃមកនេះ គ្មានបញ្ចេញយោបល់ចំពោះរឿងនយោបាយ ដែលគួរឲ្យកត់សម្គាល់អ្វីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ