អាជ្ញាធរដាក់ផែនការចរាចរណ៍ ២០១៨ ធ្វើយ៉ាងណាឲ្យអ្នកបើកម៉ូតូពាក់មួកសុវត្ថិភាពគ្រប់គ្នា និងគ្រប់ពេល
នៅថ្ងៃទី ៥មករានេះ មន្ត្រីនគរបាលចរាចរណ៍គ្រប់ជាន់ថ្នាក់ បានចេញប្រតិបត្តិការពង្រាងកងកម្លាំងយ៉ាងព្រោងព្រាត នៅគ្រប់ខណ្ឌទាំងអស់ ក្នុងរាជធានីភ្នំពេញ និងតាមបណ្តាខេត្តផងដែរ ដើម្បីអនុវត្តច្បាប់ចរាចរណ៍ផ្លូវគោក។ ប្រធាននាយករដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានឲ្យដឹងថា នេះគឺជាការពង្រឹងច្បាប់ចរាចរណ៍ សម្រាប់ទំព័រឆ្នាំថ្មី ឆ្នាំ២០១៨នេះ។ ក្នុងនោះ មន្ត្រីប៉ូលីស ក៏បានប្តេជ្ញាថា នៅឆ្នាំថ្មីនេះ គេនឹងអនុវត្តឲ្យបាននូវផែនការគោល គឺការពង្រឹងការពាក់មួកសុវត្ថិភាព សម្រាប់អ្នកបើកបរម៉ូតូគ្រប់គ្នា និងគ្រប់ពេល។
ចុះផ្សាយនៅថ្ងៃ៖
ស្តាប់ - ០១:៤១
ផែនការគោលនៃការអនុវត្តច្បាប់ចរាចរណ៍ផ្លូវគោក សម្រាប់ឆ្នាំ ២០១៨ គឺចង់ឃើញអ្នកចរាចរម៉ូតូលើគ្រប់ផ្លូវគោកទាំងអស់ ក្នុងប្រទេសកម្ពុជា ត្រូវតែពាក់មួកសុត្ថិភាព គ្រប់ពេលវេលា។ នេះគឺជាការតាំងចិត្តរបស់ លោក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ដែលបានប្រាប់វិទ្យុបារាំង នៅព្រឹកថ្ងៃសុក្រនេះ។
ផែនការជាទិសដៅចម្បង ក្នុងឆ្នាំ២០១៨នេះ ត្រូវបានលោក រុន រ័ត្នវាសនា បញ្ជាក់ថា គឺដោយសារតែគ្រោះថ្នាក់ចរាចរណ៍ កាលពីឆ្នាំ ២០១៧ បានកើតឡើងភាគច្រើន គឺ ៨០ភាគរយ ទៅលើអ្នកបើកបរម៉ូតូ ហើយក្នុងនោះ មាន ៧២ភាគរយ បានស្លាប់ ដោយមិនបានពាក់មួកការពារសុវត្ថិភាព។ តាមផែនការពង្រឹងការពាក់មួកសុវត្ថិភាពនៅឆ្នាំនេះ គឺសមត្ថកិច្ច នគរបាលចរាចរណ៍ នឹងធ្វើការឃាត់ម៉ូតូទុក រហូតដល់អ្នកបើកបរ ទៅទិញ ឬយកមួក មកបង្ហាញ ហើយពាក់នៅមុខសមត្ថកិច្ចសិន។
យ៉ាងណាក៏ដោយ លោក រុន រ័ត្នវាសនា បានវាយតំលៃថា ករណីគ្រោះថ្នាក់ចរាចរណ៍ មានការថយចុះ ក្នុងឆ្នាំ ២០១៧ បើប្រៀបទៅនឹងឆ្នាំ ២០១៦។ ហើយការគោរពច្បាប់ចរាចរណ៍របស់ប្រជាពលរដ្ឋភាគច្រើន ក៏មានការល្អប្រសើរពីមួយឆ្នាំ ទៅមួយឆ្នាំផងដែរ។ ប៉ុន្តែមន្ត្រីនគរបាលជាន់ខ្ពស់រូបនេះ នៅតែយល់ថា ការអនុវត្តច្បាប់ចរាចរណ៍ផ្លូវគោកក្នុងប្រទេសកម្ពុជា នៅតែជួបឧបសគ្គ។ ឧបសគ្គនោះ គឺការមិនចង់ចូលរួមរបស់ប្រជាពលរដ្ឋ។
យ៉ាងណាមិញ លោក រុន រ័ត្នវាសនា មានសុទិដ្ឋិនិយមថា ចាប់ពីឆ្នាំ ២០១៨នេះតទៅ លោកចង់ឲ្យពលរដ្ឋចេះគោរពច្បាប់ដោយខ្លួនឯង មិនមែនដោយភាពភ័យខ្លាចការផាកពិន័យរបស់នគរបាលចរាចរណ៍នោះទេ។ នាយកវិទ្យាស្ថានសុវត្ថិភាពចរាចរណ៍ លោក អ៊ា ចរិយា គាំទ្រចំពោះផែនការរឹតបណ្តឹងរបស់អាជ្ញាធរមានសមត្ថកិច្ចយ៉ាងដូច្នេះ។ ប៉ុន្តែលោកក៏នៅមានការបារម្ភ ខ្លាចការអនុវត្តមានតែមួយឆាវៗ។ យ៉ាងណាក៏ដោយ មន្ត្រីរដ្ឋាភិបាល អះអាងថា ការអនុវត្តនឹងធ្វើឡើងជាដំណាក់កាល តាមត្រីមាសនីមួយៗ យ៉ាងច្បាស់លាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ