លោកហ៊ុន សែនប្រាប់កម្មករឲ្យបះបោរប្រឆាំងលោកចុះ បើលោកឈប់ជួយកម្មករនៅក្រោយការបោះឆ្នោត
នៅចំពោះមុខកម្មករ កម្មការិនីជាច្រើនរយនាក់នៅក្នុងខេត្តកំពង់ឆ្នាំងនាព្រឹកនេះ លោកនាយករដ្ឋមន្រ្តីហ៊ុន សែន បានអះអាងថា គោលនយោបាយគាំពារសង្គមដែលលោកបានដាក់ចេញដើម្បីជួយដល់កម្មករ នឹងមិនត្រូវអនុវត្តតែនៅមុនការបោះឆ្នោតនោះទេ ពោលគឺបន្ទាប់ពីបោះឆ្នោតហើយក៏នៅតែបន្តអនុវត្តដែរ។ បន្ថែមលើនេះ លោកនាយករដ្ឋមន្រ្តីក៏បានប្រកាសប្រាប់ឲ្យកម្មករ កម្មការិនីនាំគ្នាងើបបះបោរធ្វើបាតុកម្មផ្តួលរំលំលោកចុះ ប្រសិនបើគោលនយោបាយគាំពារសង្គមរបស់លោកឈប់អនុវត្តនៅក្រោយការបោះឆ្នោតនោះ។
ចុះផ្សាយនៅថ្ងៃ៖
ស្តាប់ - ០២:០៦
ការអះអាងដាច់ណាត់របស់ប្រមុខរដ្ឋាភិបាលកម្ពុជានៅចំពោះមុខកម្មករ កម្មការិនីនេះ គឺធ្វើឡើងក្រោយពីមានការរិះគន់មកលើរដ្ឋាភិបាលកម្ពុជាថា គោលនយោបាយគាំពារសង្គមនឹងអនុវត្តតែនៅមុនការបោះឆ្នោតប៉ុណ្ណោះ។ ចំណែកក្រោយការបោះឆ្នោតវិញ គោលនយោបាយគាំពារសង្គមនេះ នឹងលែងមានការអនុវត្តទៀតហើយ។ លោកនាយករដ្ឋមន្រ្តីហ៊ុន សែន បានចង្អុលចំៗថា អ្នកដែលរិះគន់បែបនេះ គឺក្រុមអតីតបក្សប្រឆាំងដែលត្រូវបានតុលាការកំពូលកម្ពុជារំលាយចោល។
ចំពោះបញ្ហានេះ លោកនាយករដ្ឋមន្រ្តីហ៊ុន សែន បានប្រកាសយ៉ាងម៉ឺងម៉ាត់ដោយជំរុញឲ្យកម្មករ កម្មការិនីត្រៀមងើបបះបោរ ធ្វើបាតុកម្មផ្តួលរំលំលោកចុះ ប្រសិនបើគោលនយោបាយគាំពារសង្គមដែលលោកបានដាក់ចេញដើម្បីជួយកម្មករនេះឈប់អនុវត្តនៅក្រោយការបោះឆ្នោតនោះ។ លោកនាយករដ្ឋមន្រ្តីបានសង្កត់ធ្ងន់បន្ថែមថា គោលនយោបាយគាំពារសង្គមនេះ មិនមែនសម្រាប់អនុវត្តនៅតែមុនការបោះឆ្នោតទេ ហើយថា គោលនយោបាយដែលចេញដោយគណបក្សកាន់អំណាចគឺមិនមែនជារឿងលេងសើចឡើយ ពោល គឺនឹងបន្តអនុវត្តទាំងមុន និងក្រោយការបោះឆ្នោត។
សូមបញ្ជាក់ថា នៅមុនការបោះឆ្នោតជាតិនៅថ្ងៃទី២៩ កក្កដានេះ លោកនាយករដ្ឋមន្រ្តីហ៊ុន សែន បានផ្តល់ការគាំពារសង្គមជាច្រើនដល់កម្មករ ដូចជាដំឡើងប្រាក់ឈ្នួលអប្បបរមា១៧០ ដុល្លារក្នុងមួយខែ ផ្តល់ប្រាក់សោធននិវត្តន៍ដល់កម្មករ កម្មការិនីចាប់ពីឆ្នាំ ២០១៩ មិនឲ្យកម្មករបង់ប្រាក់របបសន្តិសុខសង្គមដោយខ្លួនឯង ។ ក្រៅពីនេះ លោកក៏បានផ្តល់ឲ្យស្រ្តីមានផ្ទៃពោះសំរាលកូនគឺនឹងទទួលបានពេលវេលាឈប់សម្រាកពីការងាររយៈពេល៣ខែ និងទទួលបានប្រាក់ខែ ១២០%ថែមទៀត ។ ចំណែក កម្មការនីដែលសម្រាលបានកូន១ លោកនឹងផ្តល់ថវិកា៤០ម៉ឺនរៀល ហើយបើសម្រាលបានកូនភ្លោះ (២) គឺទទួលបានថវិកា៨០ម៉ឺនរៀលនិងបើសម្រាលបានកូន(៣)គឺទទួលបានថវិកា១លាន២សែនរៀលជាដើម។
សម្រាប់លោកនាយករដ្ឋមន្រ្តីហ៊ុន សែន អ្វីដែលគណបក្សកាន់រដ្ឋាភិបាលដាក់ចេញឲ្យអនុវត្តគឺបន្តអនុវត្តរហូតមិនមែនជាសន្យាដូចដែលគណបក្សក្រៅរដ្ឋាភិបាលបានធ្វើចំពោះប្រជាពលរដ្ឋនោះទេ។ លោកនាយករដ្ឋមន្រ្តីក៏បានគូសបញ្ជាក់ទៀតថា លោកសុខចិត្តចុះចេញពីដំណែងជានាយករដ្ឋមន្រ្តី ប្រសិនបើលោកមិនអាចអនុវត្តបានទៅតាមគោលនយោបាយគាំទ្រសង្គមដែលលោកបានដាក់ចេញឲ្យអនុវត្តនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ