លោកនាយករដ្ឋមន្ត្រី ហ៊ុន សែន ចេញមុខជាសាធារណៈលើកដំបូងបន្ទាប់ពីបោះឆ្នោត
លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា នាព្រឹកថ្ងៃពុធនេះ បានចេញមុខជាសាធារណៈលើកដំបូង បន្ទាប់ពីការបោះឆ្នោតកាលពីថ្ងៃទី២៩ ខែកក្កដា។ ជាការបង្ហាញមុខ ដើម្បីសម្ពោធដាក់ឲ្យប្រើប្រាស់ចំណតនាវាដឹកអ្នកដំណើរនៅក្នុងខណ្ឌឬស្សីកែវ រាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:០០
ក្នុងឱកាសសម្ពោធដាក់ឲ្យប្រើប្រាស់ចំណតនាវាដឹកអ្នកដំណើរ នៅក្នុងខណ្ឌឬស្សីកែវរាជធានីភ្នំពេញ នាព្រឹកថ្ងៃទី១ ខែសីហា លោកនាយករដ្ឋមន្ត្រីបានប្រាប់អ្នកកាសែតថា ឆ្នាំ២០១៨នេះ គឺជាឆ្នាំដែលប្រទេសកម្ពុជា បានទទួលជោគជ័យធំ ទៅលើការកសាងសេដ្ឋកិច្ច និងប្រជាធិបតេយ្យ ដំណើរការសន្តិភាពនៅក្នុងប្រទេស ដូច្នេះលោកសម្រេចឲ្យប្រជាពលរដ្ឋជិះនាវាដឹកអ្នកដំណើរដោយមិនគិតថ្លៃចាប់ពីពេលនេះរហូតដល់ដំណាច់ឆ្នាំ២០១៨។ លោក ហ៊ុន សែន បញ្ជាក់ថាប្រជាពលរដ្ឋក៏អនុញ្ញាតឲ្យជិះរថភ្លើងពី ភ្នំពេញ ទៅប៉ោយប៉ែត ដោយមិនគិតថ្លៃរហូតដល់ដើមឆ្នាំ២០១៩ដែរ។
ជាការកត់សម្គាល់ នៅក្នុងឱកាសបង្ហាញមុខជាសាធារណៈលើកទី១ នៅក្រោយការបោះឆ្នោត ដែលគណបក្សរបស់លោកទទួលបានសំឡេងឆ្នោតច្រើនលើសលុបនេះ លោកនាយករដ្ឋមន្ត្រីហ៊ុន សែន មិនបានបញ្ចេញប្រតិកម្ម តបទៅនឹងបណ្តាប្រទេសលោកខាងលិចមួយចំនួន ដែលមិនពេញចិត្តនឹងការបោះឆ្នោតនៅក្នុងប្រទេសកម្ពុជានោះទេ។
ជាការបោះឆ្នោត ដែលប្រទេសប្រជាធិបតេយ្យភាគច្រើនបង្ហាញការសោកស្តាយ និងបានចេញសេចក្តីថ្លែងការណ៍មិនពេញចិត្តជាបន្តបន្ទាប់។ នៅក្នុងនោះក៏មានសហរដ្ឋអាមេរិក សហភាពអឺរ៉ុប អូស្ត្រាលី អាឡឺម៉ង់ បារាំងជាដើម។ សេចក្តីថ្លែងការណ៍ប្រទេសទាំងអស់នោះ ចាត់ទុកការបោះឆ្នោតនៅកម្ពុជាថា មិនតំណាងឲ្យឆន្ទៈពលរដ្ឋ និងខ្វះការជឿជាក់។
កាលពីថ្ងៃទី៣១ ខែកក្កដា លោកនាយករដ្ឋមន្ត្រីហ៊ុន សែន បានសរសេរសារតាមបណ្តាញសង្គមហ្វេសប៊ុករបស់លោកថា កម្ពុជាបានសម្រេចជោគវាសនាប្រទេសជាតិ តាមរយៈការបោះឆ្នោតដោយសេរី ត្រឹមត្រូវ និងយុត្តិធម៌។
លោកនាយករដ្ឋមន្ត្រីហ៊ុន សែន បញ្ជាក់ថា តាមរយៈលទ្ឋផលបឋមនៃការបោះឆ្នោតជ្រើសតាំងតំណាងរាស្រ្តនីតិកាល ទី៦ កាលពីថ្ងៃទី ២៩ កក្កដា ២០១៨ កន្លងទៅនេះ ដែលមានពលរដ្ឋទៅបោះឆ្នោត ៨២.៨៩% នៃចំនួនអ្នកបោះឆ្នោតសរុប ៨,៣៨០,២១៧ និងមានគណបក្សនយោបាយចំនួន២០ បានចូលរួម គឺបានបង្ហាញច្បាស់ថា ពលរដ្ឋកម្ពុជាច្រើនលើសលុបបំផុតគាំទ្រការបោះឆ្នោតតាមបែបលទ្ឋិប្រជាធិបតេយ្យសេរីពហុបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ