ជំងឺជ្រូកត្រចៀកខៀវមានសភាពធូរស្រាលបន្ទាប់ពីជ្រូកជាងមួយពាន់ក្បាលបានស្លាប់
ជំងឺជ្រូកត្រចៀកខៀវមកដល់ពេលនេះមានសភាពធូរស្រាលហើយបន្ទាប់ពីប្រភេទជំងឺនេះបានផ្ទុះឡើង ជាងមួយសប្ដាហ៍ នៅខេត្តសៀមរាប និង បណ្ដាខេត្តផ្សេងទៀត។ មន្ត្រីជំនាញបានបញ្ជាក់ថា តាំងពីជំងឺនេះផ្ទុះឡើងជ្រូកជាងមួយពាន់ក្បាលបានស្លាប់។
ចុះផ្សាយនៅថ្ងៃ៖
ស្តាប់ - ០១:៣៧
តុល្យការចុងក្រោយនៃស្ថានភាពជំងឺជ្រូកត្រចៀកខៀវត្រូវបានមន្ត្រីជំនាញនៃក្រសួងកសិកម្មវាយតម្លៃថា បានធូរស្រាលហើយទាំងនៅខេត្តសៀមរាប កំពង់ចាម និងស្វាយរៀង បន្ទាប់ពីជំងឺនេះបានរាដាលទៅដល់។
ថ្លែងប្រាប់វិទ្យុបារាំងអន្តរជាតិRFIនៅព្រឹកថ្ងៃអាទិត្យ លោក ឡោ រស្មី អ្នកនាំពាក្យក្រសួងកសិកម្ម រុក្ខាប្រមាញ់និងនេសាទឲ្យដឹងថា ទោះជាជំងឺជ្រូកត្រចៀកខៀវបានធូរស្រាលយ៉ាងណាក៏ដោយ តែមិនមែនមានន័យថាជំងឺនេះលុបបាត់ទាំងស្រុងនោះទេ ពោលគឺមន្ត្រីជំនាញនៅតែបន្តតាមដានដោយយកចិត្តទុកដាក់។ ជាក់ស្ដែងនៅខេត្តកំពង់ចាម និង ស្វាយរៀងដែលបានឆ្លង់បន្តពីខេត្តសៀមរាបនោះ កំពុងតែស្ថិតក្នុងការតាមដានប៉ុន្តែវាគ្រាន់តែជាករណីមួយផ្ទុះឡើងតិចតួចប៉ុណ្ណោះដែលមានជ្រូកតែពីរឫបីក្បាលបានស្លាប់ បើគិតក្នុងពេលជាងមួយសប្ដាហ៍នេះ។
លោកអ្នកនាំពាក្យដដែល ក៏បានបញ្ជាក់ថាស្ថានភាពជំងឺជ្រូកត្រចៀកខៀវនេះគឺមិនមានសភាពធ្ងន់ធ្ងរដូចជំងឺផ្ដាសាយបក្សីនោះទេ ព្រោះជំងឺជ្រូកត្រចៀកខៀវឆ្លងពីជ្រូកទៅជ្រូកដូចគ្នាមិនអាចឆ្លងដល់មនុស្សបានទេ។ តែជំងឺផ្ដាសសាយបក្សីឆ្លងពីបក្សីទៅដល់មនុស្ស។ តែយ៉ាងណាក៏ដោយមន្ត្រីដដែលនៅតែអំពាវនាវឲ្យប្រជាពលរដ្ឋមានការប្រុងប្រយ័ត្នឲ្យបានខ្ពស់ជាមួយនិងជំងឺនេះ បើក្នុងករណីពលរដ្ឋយកសាច់ជ្រូកមកចំអិនជាអាហារត្រូវស្ថិតនៅក្នុងកម្រិតកំដៅ៧០អង្សារឡើងទៅទើបធានាបានថា មិនមានការឆ្លង់។ ករណីនេះក៏ធ្លាប់កើតមាននៅក្នុងប្រទេសវៀតណាមនាពេលកន្លងមកដែរ ហើយក៏មានប្រជាជនដែលបានឆ្លងមេរោគឱកាសនិយមពីសត្វជ្រូកដែលងាប់នោះ។ ហើយជំងឺនេះបានផ្ទុះឡើងនៅកម្ពុជាកាលពីសៅរ៍សប្ដាហ៍មុនក្នុងខេត្តសៀមរាប ដែលបណ្ដាលឲ្យ ជ្រូកជាង១០០០ក្បាលបាន ស្លាប់តាំង មាន ការផ្ទុះឡើងនៃជំងឺជ្រូកត្រចៀកខៀវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ