សាលារាជធានីភ្នំពេញគ្រោងបង្កើត Smart Card និង កម្មវិធីឡានក្រុងលើទូរសព្ទ
សាលារាជធានីភ្នំពេញគ្រោងបង្កើត Smart Card និង ប្រព័ន្ធកម្មវិធីឡានក្រុងលើទូរសព្ទចល័ត ដើម្បីបង្កភាពងាយស្រួលដល់ប្រជាពលរដ្ឋ។ នេះបើតាមការបញ្ជាក់របស់លោក ម៉េត មាសភក្តី អ្នកនាំពាក្យសាលារាជធានីភ្នំពេញ ដែលបានថ្លែងប្រាប់វិទ្យុបារាំងអន្ដរជាតិ នៅថ្ងៃសៅរ៍ទី៥សីហានេះ។អត្ថបទដោយ៖ ជក់ សុភា
ចុះផ្សាយនៅថ្ងៃ៖
ស្តាប់ - ០២:០១
Smart Card គឺជាកាតមួយប្រភេទដែលប្រើសម្រាប់បង់ប្រាក់ដោយស្វ័យប្រវត្តិ។ ពេលមាន Smart Card ប្រជាពលរដ្ឋមិនចាំបាច់ប្រើប្រាស់សាច់ប្រាក់ដោយផ្ទាល់ឡើយ គឺគ្រាន់តែបញ្ចូលទឹកប្រាក់ទៅក្នុង Smart Card នោះ ហើយដាក់កាតនោះទៅលើម៉ាស៊ីននៅលើឡានក្រុង វានឹងកាត់ទឹកប្រាក់ដោយស្វ័យប្រវត្តិ។ នេះបើតាមការពន្យល់របស់លោក ម៉េត មាសភក្តី។
ក្រៅពី Smart Card លោកឲ្យដឹងទៀតថា សាលាក្រុងនឹងបង្កើតឲ្យមានកម្មវិធីអាចឲ្យប្រជាពលរដ្ឋមើលប្រព័ន្ធឡានក្រុងតាមរយៈទូរសព្ទដៃចល័ត ថាតើឡានក្រុងនឹងមកដល់នៅទីតាំងណាមួយ ពេលប៉ុន្មាននាទីទៀត? សម្រាប់លោក មាស ម៉េតភក្តី ប្រព័ន្ធទាំងពីរនេះនឹងរួមចំណែកបង្កភាពងាយស្រួលដល់អ្នកប្រើប្រាស់ អ្នកគ្រប់គ្រង និងមានភាពសុក្រិត មិនអាចបន្លំបានឡើយ។
ការលើកឡើងរបស់អ្នកនាំពាក្យដូច្នេះ ធ្វើឡើងស្របពេលដែលរថយន្តក្រុងជំនួយពីប្រទេសចិន ទើបតែដាក់ឲ្យដំណើរការកាលពីដើមខែសីហានេះ។ អ្នកនាំពាក្យដដែលបញ្ជាក់ថា Smart Card និង ប្រព័ន្ធកម្មវិធីឡានក្រុងលើទូរសព្ទ គ្រោងនឹងបំពាក់លើរថយន្តថ្មីទាំងនោះ។
យ៉ាងណាក៏ដោយ Smart Card និង ប្រព័ន្ធកម្មវិធីឡានក្រុងលើទូរសព្ទ មិនមែនជាលក្ខណៈពិសេសតែពីរគត់របស់រថយន្តក្រុងថ្មីឡើយ។ លោក ម៉េត មាសភក្ដី បានលើកឡើងថា រថយន្តក្រុងថ្មី មានលក្ខណៈពិសេសផ្សេងទៀត ខុសប្លែកពីរថយន្តមុន ដោយសារវាជារថយន្តស៊េរីថ្មីស្រឡាង ល្អទាំងគុណភាពនិងសោភណ្ឌភាព មានទីតាំងអំណោយផលដល់ជនពិការ ស្ត្រីមានផ្ទៃពោះ និងចាស់ជរា ដែលមានលក្ខណៈស្តង់ដារដូចបណ្តាប្រទេសដទៃ។ មួយវិញទៀត រថយន្តក្រុងនេះបំពាក់នូវប្រព័ន្ធ LED ទាំងក្នុងនិងក្រៅ ដើម្បីផ្តល់ជាព័ត៌មាន ជាដំណឹង អំពីទីតាំងដែលរថយន្តកំពុងចត និងគោលដៅបន្ទាប់របស់រថយន្ត។
គួរបញ្ជាក់ផងដែរថា នាពេលបច្ចុប្បន្ននេះ ក្នុងចំណោមរថយន្តក្រុងដែលចិនផ្ដល់ជំនួយទាំង១០០គ្រឿង សាលាក្រុងភ្នំពេញ បានដាក់ឲ្យដំណើរការតែចំនួន៦០គ្រឿងប៉ុណ្ណោះ ដោយរត់នៅលើខ្សែផ្លូវចាស់ដដែល។ ចំណែកតម្លៃក៏នៅដដែលដែរ គឺសម្រាប់ប្រជាពលរដ្ឋធម្មតាថ្លៃតែ១៥០០រៀលប៉ុណ្ណោះ។ រីឯសិស្សនិស្សិត ព្រះសង្ឃ ចាស់ជរា និងក្មេងក្រោមកម្ពស់មួយម៉ែត្រចុះក្រោម សាលាក្រុងមិនតម្រូវឲ្យបង់ប្រាក់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ