តំណាងសហគមន៍៖ ខេត្តទំាង ៤ នៅតែបន្តដាក់ញត្តិបើគ្មានការជួយអន្តរាគមន៍ ជុំវិញគម្រោងអភិវឌ្ឍន៍ឧស្សាហកម្មដំណាំអំពៅ
តំណាងសហគមន៍ ដែលរងផលប៉ះពាល់ដោយសារគម្រោងអភិវឌ្ឍន៍ឧស្សាហកម្មដំណាំអំពៅ មកពី៤ខេត្ត រួមមាន ខេត្តកំពង់ស្ពឺ ខេត្តឧត្តរមានជ័យ ខេត្តព្រះវិហារ និងខេត្តកោះកុង នៅថ្ងៃនេះបានឡើងមកភ្នំពេញ ដាក់ញត្តិស្នើសុំជួយអន្តរាគមន៍ដោះស្រាយ ពីរដ្ឋសភា និងក្រសួងពាក់ព័ន្ធទាំងអស់ ចំពោះបញ្ហាវិវាទដីធ្លី ដែលបានអូសបន្លាយជាច្រើនឆ្នាំមកហើយ ប៉ុន្តែនៅតែមិនទាន់បានដោះស្រាយ។ ទាក់ទងទៅនឹងការដាក់ញត្តិសុំអន្តរាគមន៍នេះត្រូវបាន តំណាងសហគមន៍ទាំង៤ខេត្ត រៀបរាប់ឱ្យដឹងនៅក្នុងសន្និសិទកាសែតមួយ នារសៀលថ្ងៃទី២១ មិថុនានេះ នៅមជ្ឈមណ្ឌលវប្បធម៌អាល្លឺមង់ រឺMeta House។ អត្តបទដោយប៉ុន សោភ័ណ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
នេះមិនមែនជាការដាក់ញត្តិសុំជួយអន្តរាគមន៍ដោះស្រាយលើកទី១នោះទេ ស្តីពីការរំលោភដីធ្លីរបស់ក្រុមហ៊ុនចំការអំពៅ។ តំណាងប្រជាសហគមន៍ មកពីខេត្តកំពង់ស្ពឺ ខេត្តឧត្តរមានជ័យ ខេត្តព្រះវិហារ និងខេត្តកោះកុង កន្លងមកបានដាក់ញត្តិសុំអន្តរាគមន៍ពីស្ថាប័នពាក់ព័ន្ធរបស់រដ្ឋ ក៏ប៉ុន្តែគ្មានលទ្ធផល។ យ៉ាងណាក៏ដោយពួកគេ នៅជំនះដាក់ម្តងហើយម្តងទៀត។ ជាក់ស្តែង នៅព្រឹកថ្ងៃទី២១ មិថុនានេះ ញត្តិដែលតំណាងសហគមន៍បានដាក់ទៅស្ថាប័នពាក់ព័ន្ធ ត្រូវបានក្រសួងកសិកម្ម រុក្ខា ប្រមាញ់ និងនេសាទ ក្រសួងបរិស្ថាន និងរដ្ឋសភាជាតិ ទទួលយកហើយ ក៏ប៉ុន្តែស្ថិតក្នុងការរងចាំសិន ដោយថាត្រូវធ្វើទៅតាមនិតិវិធីនៃច្បាប់ការងារ។
នៅក្នុងសន្និសិទកាសែតនេះ តំណាងសហគមន៍ដែលបានរងផលប៉ះពាល់បានរៀបរាប់ថា ការផ្តល់ដីសម្បទានដល់ក្រុមហ៊ុនវិនិយោគទាំងនោះបង្កឱ្យមានបញ្ហាជាច្រើនដូចជា ការរំលោភយកដីធ្លីរបស់ប្រជាពលរដ្ឋ ដែលធ្លាប់អាស្រ័យផលពីមុន មានការបណ្តេញចេញ ដែលនាំឱ្យមានរំលោភសិទ្ធិមនុស្សធ្ងន់ធ្ងរ ហើយបញ្ហាទាំងនោះបានអូសបន្លាយអស់រយៈពេលជាច្រើនឆ្នាំមកហើយ ប៉ុន្តែនៅតែមិនទាន់អាចដោះស្រាយបាន ដែលជាហេតុធ្វើឱ្យប្រជាពលរដ្ឋខាតបង់ផលប្រយោជន៍ជាប្រាក់ និងពេលវេលាជាច្រើន ជាពិសេសបាត់បង់នូវសិទ្ធិអាស្រ័យផលនានាពីដីរបស់ពួកគេ។ ប្រជាពលរដ្ឋ ដែលរងផលប៉ះពាល់ពីការអភិវឌ្ឍឧស្សាហកម្មដំណាំអំពៅនេះបានក្លាយ ជាកូនបំណុល និងធ្លាក់នៅក្នុងភាពក្រីក្រ ដែលធ្វើឱ្យការរស់នៅកាន់តែលំបាកខ្លាំងទៅៗ។
គួររំលឹកជូនថា កាល ថ្ងៃ២៥ ខែមិនា ឆ្នាំ២០១៦ កន្លងទៅ ប្រជាពលរដ្ឋប្រមាណជា ៣០០ នាក់មកពីបណ្តាឃុំចំនួនបួន ដែលស្ថិតនៅក្នុងស្រុកស្រែអំបិល និងស្រុកបុទុមសាគរ ខេត្តកោះកុង បាននាំគ្នាដើរក្បួនដាក់ញត្តិជូនដល់អភិបាលស្រុក ដើម្បីតវ៉ាទៅនឹងការរំលោភបំពានដីធ្លីពីសំណាក់ក្រុមហ៊ុនស្ករអំពៅ។ សហគមន៍បានដាក់ញត្តិជូនអភិបាលស្រុកដើម្បីទាមទារដំណោះស្រាយចំពោះបញ្ហាដីធ្លី ដែលកំពុងបន្តកើតឡើងជាមួយនឹងក្រុមហ៊ុនផ្គត់ផ្គង់ស្ករអំពៅរបស់ថៃ។ ជម្លោះដីធ្លីរវាងសហគមន៍ ជាមួយក្រុមហ៊ុនទាំងនេះ កើតមានលើផ្ទៃដីជាង ៩០០ ហិកតា និងបាត់បង់មុខរបរចិញ្ចឹមជីវិត របស់ប្រជាពលរដ្ឋក្នុងតំបន់ បន្ទាប់ពីក្រុមហ៊ុនទាំងនោះ ទទួលបានដីសម្បទានសេដ្ឋកិច្ចក្នុងទំហំសរុប ប្រហែលជា ២០.០០០ ហិកតា។
សូមជម្រាបជូនថា ចាប់តាំងពីឆ្នាំ ២០០៦មក សហគមន៍បានធ្វើការតវ៉ាទាមទារយ៉ាងសកម្មចំពោះបញ្ហាដីធ្លីដែលប្រព្រឹត្តិដោយក្រុមហ៊ុនស្ករអំពៅនេះ នៅក្រោយពេលដែល លោកឧកញ៉ា លី យ៉ុងផាត់ បានចុះហត្ថលេខាលើកិច្ចព្រមព្រៀងផ្តល់ដីសម្បទានសម្រាប់ក្រុមហ៊ុន ដាំដុះខេត្តកោះកុង កាលពីថ្ងៃទី ២ ខែសីហា ឆ្នាំ២០០៦ ដែលពេលនោះលោក មានឈ្មោះជានាយកក្រុមហ៊ុនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ