លោក ប៉ែន សមិទ្ធិ បូជាពេលវេលាស្ទើរតែពេញមួយជីវិតរបស់ខ្លួន ជូនដល់វិស័យសារព័ត៌មានខ្មែរ
លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា បានទទួលរមណៈភាពហើយ នៅវេលាម៉ោង៦និង១០នាទី ព្រឹកថ្ងៃចន្ទនេះ នៅក្នុងជន្មាយុ៥៤ឆ្នាំ ដោយរោគាពាធ។ បន្ទាប់ពីក្លាយជាអ្នកសារព័ត៌មាននៅទស្សវត្សឆ្នាំ៨០ លោក ប៉ែន សមិទ្ធិ បានបូជាពេលវេលាស្ទើរតែទាំងអស់ ជូនដល់វិស័យសារព័ត៌មានខ្មែរ។ មរណៈភាពរបស់លោកប៉ែន សមិទ្ធិ នាពេលនេះ ត្រូវបានមិត្តរួមអាជីពចាត់ទុកថា ជាការបាត់បង់ដ៏ធំធេងមួយ។
ចុះផ្សាយនៅថ្ងៃ៖
ស្តាប់ - ០២:០៨
លោក ប៉ែន សមិទ្ធិ គឺជាអ្នកកាសែតជើងចាស់ម្នាក់ ដែលបានឈានជើងចូលប្រឡូកក្នុងវិស័យសារព័ត៌មាននៅកម្ពុជាតាំងពីដើមទស្សវត្សឆ្នាំ៨០មក។ ជាង៣០ឆ្នាំនៅក្នុងអាជីពជាអ្នកសារព័ត៌មាន លោកបានដឹកនាំ ក៏ដូចជាជួយជ្រោមជ្រែងឲ្យកាសែតរស្មីកម្ពុជាមានឈ្មោះបោះសំឡេងល្បីសុះសាយទូទាំងប្រទេស។ មិនត្រឹមតែប៉ុណ្ណោះ ចាប់តាំងពីឆ្នាំ២០០០រហូតមក លោក ប៉ែន សមិទ្ធិ បានចំណាយពេលវេលារបស់ខ្លួន ដឹកនាំក្លឹបអ្នកកាសែតកម្ពុជាថែមទៀត។ ជាង១០ឆ្នាំមកនេះ ក្រោមការដឹកនាំរបស់លោក ប៉ែន សមិទ្ធិ ក្លឹបអ្នកកាសែតកម្ពុជាបានដើរតួនាទីយ៉ាងសំខាន់ ក្នុងការបណ្ដុះបណ្ដាលអ្នកកាសែត ព្រមទាំងការពារអ្នកកាសែតដែលរងគ្រោះដោយការរំលោភបំពាននៅក្នុងពេលបំពេញភារកិច្ច។
ក្រៅពីដឹកនាំនៅកាសែតរស្មីកម្ពុជា និងក្លឹបអ្នកកាសែតកម្ពុជា លោក ប៉ែន សមិទ្ធិ ក៏បានបង្កើតគេហទំព័រ cen.com.kh ដើម្បីបម្រើសេចក្ដីត្រូវការផ្នែកព័ត៌មានលើប្រព័ន្ធអ៊ីនធឺណែត។ គេហទំព័រ CEN សព្វថ្ងៃ មានប្រជាប្រិយភាពយ៉ាងខ្លាំង នៅក្នុងចំណោមគេហទំព័រព័ត៌មានល្បីៗនៅកម្ពុជា។
នៅក្នុងក្រសែភ្នែកមិត្តរួមអាជីព ទាំងអ្នកកាសែតជើងចាស់ និងអ្នកកាសែតជំនាន់ក្រោយ លោក ប៉ែន សមិទ្ធិ គឺជាអ្នកកាសែតដ៏មានបទពិសោធម្នាក់ ដែលស្គាល់សង្គម ព្រមទាំងស្គាល់បញ្ហាជាច្រើន។ លោក ប៉ែន សមិទ្ធិ ត្រូវបានគេស្គាល់ថាជាមនុស្សដែលមានអធ្យាស្រ័យល្អជាមួយអ្នកកាសែតទូទៅ ហើយលោកថែមទាំងចូលចិត្តចែករំលែកបទពិសោធដែលលោកមានទាំងប៉ុន្មាន ទៅកាន់អ្នកកាសែតផ្សេងទៀត ដោយឥតលាក់បាំង។ លោកមិនដែលចូលប្រឡូកនៅក្នុងឆាកនយោបាយ ហើយក៏មិនធ្លាប់បញ្ចេញជំហនយោបាយ ក្នុងពេលប្រកបអាជីពជាអ្នកសារព័ត៌មានដែរ។
លោក ប៉ែន សមិទ្ធិ ដែលបានបូជាពេលវេលាស្ទើរតែពេញមួយជីវិតរបស់ខ្លួនជូនដល់វិស័យសារព័ត៌មានកម្ពុជារូបនេះ បានទទួលមរណៈភាពហើយ នៅវេលាម៉ោង៦និង១០នាទី ព្រឹកថ្ងៃចន្ទ ទី៣០មីនា ឆ្នាំ២០១៥ ដោយរោគាពាធ ក្នុងជន្មាយុ៥៤ឆ្នាំ។ មរណៈភាពរបស់លោក ប៉ែន សមិទ្ធិ នាពេលនេះ ត្រូវបានមិត្តរួមអាជីពទាំងអស់សម្ដែងការសោកស្ដាយ និងចាត់ទុកថា ជាការបាត់បង់ដ៏ធំធេងមួយ នៅក្នុងវិស័យសារព័ត៌មានខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ