សពទាហានមួកខៀវកម្ពុជា បីរូប បានបូជារួចរាល់ ខណៈសពមួយទៀតត្រៀមបញ្ចុះនៅថ្ងៃពុធ
សពទាហានមួកខៀវកម្ពុជា ៤រូប ដែលបានបាត់បង់ជីវិត ក្នុងការវាយប្រហារមួយ នៅអាហ្វ្រិកកណ្តាល ត្រូវបានក្រុមគ្រួសារសព ៣រូប បូជារួចរាល់ហើយ ខណៈសពមួយទៀត នឹងរៀបចំពិធីបញ្ចុះនៅថ្ងៃពុធ ស្អែក។ បើតាម មន្រ្តីជាន់ខ្ពស់ នៃមជ្ឈមណ្ឌលកងកម្លាំងរក្សាសន្ដិភាព សពទាំង ៤ ត្រូវបានរៀបចំពិធីបូជា និងបញ្ចុះយ៉ាងសក្តិសមកិត្តិយស ដោយមានការចូលរួមពីថ្នាក់ដឹកនាំរាជរដ្ឋាភិបាល និងអាជ្ញាធរដែនដីយ៉ាងច្រើនកុះករ។
ចុះផ្សាយនៅថ្ងៃ៖
ស្តាប់ - ០១:៤៩
លោកឧត្តមសេនីយ៍ តុន សាលី អគ្គនាយករង នៃមជ្ឈមណ្ឌលកងកម្លាំងរក្សាសន្ដិភាព បោសសម្អាតមីន និងគ្រាប់មិនទាន់ផ្ទុះ បានបញ្ជាក់ប្រាប់វិទ្យុបារាំង នៅថ្ងៃអង្គារនេះថា សពទាហានមួកខៀវកម្ពុជា ៣រូប ត្រូវបានបូជា ចប់រួចរាល់ហើយ កាលពីថ្ងៃចន្ទ ទី២២ ខែឧសភា។ សពទាំងបី នោះ រួមមាន អនុសេនីយ៍ត្រី ស៊ាង នរិន្ទ បានបូជានៅ រាជធានីភ្នំពេញ ពលបាលឯក មុំ តុលា បូជា នៅខេត្តពោធិសាត់ និង អនុសេនីយ៍ត្រី ម៉ៅ អេង បូជា នៅខេត្តស្វាយរៀង។
លោកឧត្តមសេនីយ៍ តុន សាលី បានបន្ថែមថា សពពលបាលឯក អ៊ឹម សំ នឹងត្រូវរៀបចំពិធីបញ្ចុះ នៅខេត្តសៀមរាប នាថ្ងៃពុធ ទី២៤ ខែឧសភា។ ពិធីបុណ្យសពទាហាន ទាំងបួននេះ បានរៀបចំយ៉ាងសក្តិសម នឹងការលះបង់ដ៏អង់អាចក្លាហានរបស់ពួកគេ ក្នុងបុព្វហេតុថែរក្សាសន្តិភាពពិភពលោក ដោយក្នុងពិធីបុណ្យសពនិមួយៗ មានការអញ្ជើញចូលរួមពី ថ្នាក់ដឹកនាំ មន្ទីរជុំវិញខេត្តមិនតិចជាង ១៥អង្គភាព រួមទាំងអាជ្ញាធរដែនដី ដែលដឹកនាំដោយ អភិបាលខេត្ត ព្រមទាំងទទួលបានការជួយឧបត្ថម្ភផ្នែកថវិកាដើម្បីរៀបចំពិធីបុណ្យ ស្ទើរតែទាំងស្រុងពី អាជ្ញាធរដែនដី និងរាជរដ្ឋាភិបាលកម្ពុជាផងដែរ។
គួរជម្រាបថា កាលពីយប់ថ្ងៃទី០៨ ខែឧសភា កងកម្លាំងមួកខៀវរបស់កម្ពុជា ក្នុងអំឡុងពេលបំពេញបេសកកម្ម នៅប្រទេសអាហ្រ្វិកកណ្តាល ក្នុងក្របខណ្ឌអង្គការសហប្រជាជាតិ បានរងការវាយប្រហារដោយក្រុមឧទ្ទាម ដែលបណ្តាលឲ្យកងកម្លាំងកម្ពុជា ៤នាក់ស្លាប់ និងម្នាក់ទៀតរងរបួស។ ២សប្តាហ៍ក្រោយមក សពកងទ័ពមួកខៀវកម្ពុជា បួនរូប ត្រូវបានបញ្ជូនមកដល់អាកាសយានដ្ឋានអន្តរជាតិភ្នំពេញ ប្រទេសកម្ពុជា គឺនៅយប់ថ្ងៃទី ២១ ឧសភា ហើយក៏ត្រូវបានបញ្ជូនបន្តភា្លមៗ ទៅដល់ លំនៅដ្ឋាន របស់សពរៀងៗខ្លួន។ លោកនាយករដ្ឋមន្រ្តី ហ៊ុន សែន នឹងប្រគល់ថវិកា មួយម៉ឺនដុល្លារជូនភរិយា និងក្រុមគ្រួសារសព បន្ថែមទៅលើ ថវិកាសំណងពី អង្គការសហប្រជាជាតិ ប្រមាណ ៧ម៉ឺនដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ