បក្សប្រឆាំងប្រារព្ធពិធីរម្លឹកខួបលើកទី៣៥ ថ្ងៃ១៧ មេសា ឆ្នាំ១៩៧៥
ថ្ងៃ១៧មេសា ឆ្នាំ២០១០ ថ្ងៃនេះ គម្រប់ខួបលើកទី៣៥ ឆ្នាំ នៃការឡើងកាន់អំណាចរបស់ក្រុមខ្មែរក្រហម នៅកម្ពុជា។ ក៏ប៉ុន្តែ ពិធីជួបជុំរបស់គណបក្សប្រឆាំង សម រង្ស៊ី នៅវាលពិឃាតជើងឯក នៅជាយក្រុងភ្នំពេញថ្ងៃនេះ មិនមែនជាការសាទរដល់ក្រុមខ្មែរក្រហមទេ តែជាការរម្លឹកពីសោកនាដកម្ម ដែលរបបខ្មែរក្រហមបានធ្វើឲ្យប្រជាពលរដ្ឋខ្មែរជិតពីរលាននាក់ ស្លាប់បាត់បង់ជីវិត ក្នុងរយៈពេល ៣ឆ្នាំ ៨ខែ និង២០ថ្ងៃ។
ចុះផ្សាយនៅថ្ងៃ៖
នៅមុខស្តូបតម្កល់លលាដ៍ឆ្អឹងជនរងគ្រោះជាង ២ ម៉ឺននាក់ដែលត្រូវបានសម្លាប់ នៅ វាលពិឃាតបឹងជើងឯក ក្នុងសម័យខ្មែរក្រហម គណបក្សប្រឆាំង សម រង្ស៊ី បានរៀបចំពិធីជួបជុំ បង្សុកូល និងរាប់បាត្រ ឧទ្ធិសកុសលជូនដល់វិញ្ញាណក្ខន្ធជនរងគ្រោះ។
នៅ ព្រឹកថ្ងៃទី១៧មេសា ឆ្នាំ ២០១០ ថ្នាក់ដឹកនាំគណបក្សសម រង្ស៊ី និងសកម្មជនគាំទ្រ គណបក្សប្រឆាំងមួយនេះប្រមាណ ៥០០នាក់ ដោយមានព្រះសង្ឃ ប្រហែល ៥០ អង្គ បានចូលរួមសូត្រធម៌ឧទ្ទិសកុសលជូនដល់អ្នកស្លាប់ ក្នុងរបបវាលពិឃាតខ្មែរក្រហម។
នេះជាការរម្លឹកដល់ព្រឹត្តិការណ៍ ថ្ងៃ១៧មេសា ឆ្នាំ១៩៧៥ ថ្ងៃខ្មែរក្រហម បានទទួលជ័យជម្នះលើរបបសាធារណរដ្ឋ លន់ នុល ហើយឡើងកាន់អំណាច។ ក៏ប៉ុន្តែ ថ្ងៃដែលខ្មែរក្រហម ឡើងកាន់អំណាច ថ្ងៃ ១៧មេសា ឆ្នាំ១៩៧៥នោះ ក៏នាំឲ្យមានការធ្វើទារុណកម្ម និងការសម្លាប់ជីវិតពលរដ្ឋខ្មែរយ៉ាងរង្គាល អស់ជិត ២ លាននាក់ ចន្លោះពីឆ្នាំ១៩៧៥ ដល់ឆ្នាំ១៩៧៩។
ក្រៅពីឡើងថ្លែងសារទុក្ខពី ការនិរាសព្រាត់ប្រាស់សាច់ញាតិ បាត់បង់កូន និងប្តី ដោយសារតែខ្មែរក្រហម យកទៅសម្លាប់ ក្រុមអ្នកចូលរួមពិធីបានជម្រុញឲ្យសាលាក្តីខ្មែរក្រហម បង្កើនល្បឿន ក្នុងដំណើរការជំនុំជម្រះក្តីលើអតីតមេដឹកនាំខ្មែរក្រហម។
ចំណែក លោកគង់ គាំ ប្រធានស្តីទីគណបក្សសម រង្ស៊ី បានលើកឡើងថា តុលាការមិនត្រូវអូសបន្លាយពេលយូរពេកទេ ព្រោះមេដឹកនាំខ្មែរក្រហមកាន់តែចាស់ជរាណាស់ទៅហើយសព្វថ្ងៃ។ ម្យ៉ាងទៀត តុលាការចម្រុះដែលមានភាគីអង្គការសហប្រជាជាតិ និងកម្ពុជាត្រូវតែពង្រឹងជំហរ ដោយយកកាតព្វកិច្ចដើម្បីរួមគ្នា រកយុត្តិធម៌ឲ្យជនរងគ្រោះខ្មែរ និងដើម្បីបញ្ចប់នូវវប្បធម៌និទណ្ឌភាព ( ការសម្លាប់ដែលមិនត្រូវបានគេគ្មានទោស) នៅកម្ពុជា។
ក្នុង ពិធីជួបជុំនៅព្រឹកមិញ លោកសម រង្ស៊ី ដែលកំពុងជាប់ទោសក្នុងរឿងដកតម្រុយបង្គោលព្រំដែន បានថ្លែងតាមទូរស័ព្ទពីទីក្រុងប្រ៊ុយហ្ស៊ែល ប្រទេសប៊ែលហ្ស៊ិក ដោយឆ្លៀតវាយប្រហាររដ្ឋាភិបាលថា របបខ្មែរក្រហមបាននាំឲ្យពលរដ្ឋខ្មែរ ខ្លាច ឃ្លាន និងខ្លៅ។ សារធាតុនៃរដ្ឋាភិបាលសព្វថ្ងៃ ក៏មានលក្ខណៈខ្លាច ឃ្លាន និងខ្លៅ ដូចរបបខ្មែរក្រហម ដោយសារតែមេដឹកនំាខ្មែរខ្លះ គឺជាអតីតខ្មែរក្រហម និងចេញមកពីប្រភពខ្មែរក្រហម។ លោកសម រង្ស៊ី នៅព្រឹកមិញក៏បានសម្តែងនូវការនឹករលឹកស្រុកកំណើតផងដែរ។
ចំពោះ ការអំពាវនាវខាងលើនេះ សាលាក្តីខ្មែរក្រហមអះអាងថា ខ្លួនកំពុងតែខិតខំប្រឹងប្រែង ដើម្បីនាំយកយុត្តិធម៌ជូនដល់ជនរងគ្រោះហើយ។ មន្ត្រីអ្នកនាំពាក្យសាលាក្តីខ្មែរក្រហម លោក ឌឹម សុវណ្ណារុំ បានឲ្យដឹងថា សហចៅក្រមស៊ើបអង្កេតនឹងបញ្ជូនដីកាឲ្យជំនុំជម្រះក្តីលើសំណុំរឿង០០២ ទៅកាន់សាលាដំបូង នៅក្នុងខែកញ្ញាខាងមុខ។ ចំណែក សំណុំរឿងកាត់ទោសអតីតមេគុកទួលស្លែង លោក កាំង ហ្កេកអ៊ាវ ហៅ ឌុច គ្រោងនឹងប្រកាស នៅពាក់កណ្តាលឆ្នាំ២០១០នេះ។
ជាមួយគ្នានោះ លោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័សរបស់ទីស្តីការគណៈរដ្ឋមន្ត្រីបានចាត់ទុក ការអត្ថាធិប្បាយរបស់មេបក្សប្រឆាំងថា អត់ន័យ និងមិនត្រឹមត្រូវ។ លោកថា មេដឹកនាំខ្មែរក្រហមត្រូវបានតុលាការកំពុងតែកាត់ទោស។ ចំណែកថ្នាក់ដឹកនាំគណបក្សប្រជាជនកម្ពុជាដែលកំពុងដឹកនាំរដ្ឋាភិបាល គឺជា អ្នករំដោះប្រជាជនកម្ពុជា ចេញពីការកាប់សម្លាប់របស់ខ្មែរក្រហម។ ម្យ៉ាងទៀត បើប្រៀបធៀបនឹងរបបខ្មែរក្រហម ជាមួយសម័យបច្ចុប្បន្ន គឺខុសគ្នាច្រើនណាស់។ បច្ចុប្បន្ន កម្ពុជាមានសិទ្ធិសេរីភាពសព្វបែបយ៉ាង និងមានការអភិវឌ្ឍន៍គ្រប់វិស័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ