មន្រ្តីអតីតបក្សប្រឆាំងកើនដល់២០រូប កំពុងប្រឈមនឹងផ្លូវច្បាប់រឿងប្រឆាំងសាលដីការបស់តុលាការកំពូល
តំណាងអយ្យការអមសាលាដំបូងខេត្តបាត់ដំបង បានចេញដីកាកោះហៅមន្រ្តីអតីតគណបក្សសង្រ្គោះជាតិដែលបានកើនឡើងដែលបានកើនឡើងរហូត២០រូប ឱ្យចូលមកកាន់តុលាការជាបន្តបន្ទាប់នៅក្នុងខែឧសភានេះ។ នេះបើតាមដីកាកោះទាំង២០ធ្វើឡើងនៅថ្ងៃទី២៤ និង ២៥ ខែមេសា។ ការកោះហៅនេះ គឺដើម្បីសាកសួរជុំវិញការប្រឆាំងនឹងសាលដីការបស់តុលាការកំពូលកម្ពុជា។
ចុះផ្សាយនៅថ្ងៃ៖
មន្រ្តីអតីតគណក្សសង្រ្គោះជាតិទាំង២០រូបនេះ ខ្លះជាអតីតតំណាងរាស្រ្ត អតីតសមាជិកក្រុមប្រឹក្សាខេត្តបាត់ដំបង ហើយក្រៅពីនេះភាគច្រើនគឺជាអតីតចៅសង្កាត់នានានៅក្នុងខេត្តបាត់ដំបង។ ពួកគេត្រូវបានលោកគី ប៉ុណ្ណារ៉ា តំណាងអយ្យការអមសាលាដំបូងខេត្តបាត់ដំបងកោះហៅឱ្យចូលមកបំភ្លឺនៅតុលាការចាប់ពីចន្លោះថ្ងៃទី៨ ឧសភា រហូតដល់ថ្ងៃ២១ ខែឧសភា។ តុលាការកោះហៅពួកគេ ដើម្បីសាកសួរពីរឿងប្រឆាំង និងបំពានសាលដីការរបស់តុលាការកំពូលចុះថ្ងៃទី១៦ ខែវិច្ឆិកា ឆ្នាំ២០១៧កន្លងទៅ។ ជាសាលដីកាសម្រេចរំលាយចោលគណបក្សសង្រ្គោះជាតិ និងហាមឃាត់មន្រ្តីបក្សនេះចំនួន១១៨នាក់មិនឱ្យធ្វើនយោបាយរយៈពេល៥ឆ្នាំ ពាក់ព័ន្ធនឹងការចោទប្រកាន់រៀបចំផែនការផ្តួលរំលំរដ្ឋាភិបាលស្របច្បាប់។ រីឯអាសនៈសមាជិកក្រុមប្រឹក្សាឃុំសង្កាត់របស់អតីតគណបក្សសង្រ្គោះជាតិ ក៏ត្រូវបានដកហូតផងដែរ។
ជាការកត់សម្គាល់ ការកោះហៅមន្រ្តីអតីតគណបក្សសង្រ្គោះជាតិទាំងនេះ ធ្វើឡើងបន្ទាប់ពីពួកគេបានចេញវិឌីអូមួយប្រកាសគាំទ្រសកម្មភាពរបស់លោកសម រង្ស៊ី នៅក្រៅប្រទេស។ ជុំវិញរឿងនេះ តុលាការខេត្តបាត់ដំបងមិនអាចទាក់ទងសុំបញ្ជាក់បន្ថែមបាននោះទេ។ ប៉ុន្តែមន្រ្តីជាន់ខ្ពស់នៃតំណាងអយ្យការអមសាលាដំបូងខេត្តបាត់ដំបង បានថ្លែងប្រាប់ សារព័ត៌មានFresh News ថា ក្រុមមន្រ្តីអតីតបក្សប្រឆាំងទាំងនេះធ្លាប់បានធ្វើការជួបជុំគ្នាដោយប្រាប់អាជ្ញាធរថាមានពិធីបុណ្យទាន តែបែរជាបង្កើតវីដេអូមួយធ្វើការជួបជុំគាំទ្រដល់សកម្មភាពលោក សម រង្ស៉ីទៅវិញ។
ចំណែកលោកសម រង្ស៊ី ប្រធានស្តីទីគណបក្សសង្រ្គោះជាតិពីក្រៅប្រទេសបានចាត់ទុកដីកាកោះហៅមន្រ្តីរបស់ខ្លួននេះថា ជាការបំភិតបំភ័យដល់ប្រជាពលរដ្ឋខ្មែរផ្សេងទៀត កុំឲ្យមកចូលរួមទទួលការវិលចូលប្រទេសកម្ពុជាវិញរបស់លោក។ ក៏ប៉ុន្តែ លោកគឹម សន្តិភាព អ្នកនាំពាក្យក្រសួងយុត្តិធម៌កម្ពុជា បានគូសបញ្ជាក់ថា ការកោះហៅនេះ គឺអនុវត្តទៅតាមវិធានការច្បាប់។ លោកបានបញ្ជាក់បន្ថែមទៀតថា មន្រ្តីអតីតគណបក្សសង្រ្គោះជាតិទាំង២០នាក់នេះ គួរតែចូលទៅបំភ្លឺការពារខ្លួនតាមច្បាប់ ហើយកុំប្រញាប់វាយតម្លៃថាដីកាកោះហៅនេះ ជាការបំភិតបំភ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ