បក្សប្រជាធិបតេយ្យមូលដ្ឋាន មរតករបស់លោកបណ្ឌិត កែម ឡី រៀបចំខួបមួយឆ្នាំ
ថ្ងៃនេះ ជាខួបមួយឆ្នាំ នៃការបង្កើតគណបក្សប្រជាធិបតេយ្យមូលដ្ឋាន (គបម)។ គណបក្សដែលបង្កើតចេញពី ក្រុមការងារបណ្តាញសង្គម ខ្មែរដើម្បីខ្មែរមានអ្នកគាំទ្រជា ប្រជាកសិករនៅតាមមូលដ្ឋាន និងអង្គការសង្គមស៊ីវិលមួយចំនួន។ លោកបណ្ឌិត កែម ឡី ក៏ជា ស្ថាបនិកម្នាក់ ដែលផ្តួចផ្តើម ជ្រោមជ្រែង និងរៀបចំបង្កើតគណបក្សនេះឡើង បំណងជា បក្សគំរូ ប្រជាធិបតេយ្យផ្ទៃក្នុងពិតប្រាកដមួយនៅកម្ពុជា។ ស្រី សុភ័ក្ត្រ រំលឹកពីប្រវត្តិស្នាដៃមួយឆ្នាំ និងទិសដៅបន្តរបស់ គណបក្សនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៦
ថ្ងៃនេះ ឆ្នាំមុន សមាជិកគណបក្សប្រជាធិបតេយ្យមូលដ្ឋាន ចំនួន ១០៨នាក់ ដែលភាគច្រើនជាប្រជាកសិករ បានសម្រេចបោះឆ្នោតជ្រើសរើស លោក យ៉េង វីរៈ ធ្វើជាប្រធានគណបក្ស លោក សាម ស៊ុនឌឿន ជាអនុប្រធាន លោក សាម អ៊ីន ជាអគ្គលេខាធិកា និងលោក ប៉ោ សេដ្ឋា ហេរញ្ញិកបក្ស។ មួយថ្ងៃក្រោយមក ហត្ថលេខារបស់ សមាជិកគណបក្សប្រជាធិបតេយ្យមូលដ្ឋានទាំងនោះ ត្រូវបានស្នើទៅ ក្រសួងមហាផ្ទៃ ដើម្បីចុះបញ្ជី គណបក្សប្រជាធិបតេយ្យមូលដ្ឋាន មួយនេះជាផ្លូវការ។
ដើមឡើយ ក្នុងបុព្វហេតុ អប់រំពលរដ្ឋ ឲ្យយល់ដឹងច្បាស់អំពី គោលគំនិត និងគោលការណ៍ប្រជាធិបតេយ្យ ក្រុមការងារបណ្តាញសង្គម ខ្មែរដើម្បីខ្មែរ ដែលមានសមាសភាព មេដឹកនាំក្នុងអង្គការសង្គមស៊ីវិលមួយចំនួន សហដឹកនាំដោយ លោកបណ្ឌិត កែម ឡី បានធ្វើការសិក្សាស្រាវជ្រាវ និងពិគ្រោះយោបល់ជាមួយ តំណាងប្រជាពលរដ្ឋតាមមូលដ្ឋាន ក្នុងឃុំគំរូមួយចំនួន ដើម្បីចងក្រងឯកសារ ផ្សព្វផ្សាយអំពីគោលគំនិត គោលការណ៍ និងប្រព័ន្ធប្រជាធិបតេយ្យ។ នៅទីបំផុត ក៏ឈានដល់ ការផ្តួចផ្តើមបង្កើត «គណបក្សប្រជាធិបតេយ្យមូលដ្ឋាន» មួយ ដែលទាំងលក្ខន្តិកៈ និងឯកសារគោលសំខាន់ៗ របស់បក្សនេះ សុទ្ធមាន ចំណែករួម នៃពេលវេលា និងទស្សនាទាន របស់លោក កែម ឡី ស្ថាបនិក ដ៏សំខាន់ ដែល ចូលរួមសម្របសម្រួល ពិគ្រោះយោបល់ ទាំងមុន និងក្រោយពេលបង្កើតគណបក្សប្រជាធិបតេយ្យមូលដ្ឋាននេះឡើង។ គណបក្សប្រជាធិបតេយ្យមូលដ្ឋាន (គបម) ឬ Grassroots Democratic Party (GDP) បង្កើតឡើង ដោយសមាជដំបូង កាលពីថ្ងៃទី២ សីហា ២០១៥។ គណបក្សប្រជាធិបតេយ្យមូលដ្ឋាន ជាបក្សនយោបាយតែមួយគត់នៅកម្ពុជា ដែលមានចែងជាលាយលក្ខណ៍អក្សរ អំពីគោលការណ៍ក្នុងការរៀបចំរចនាសម្ព័ន្ធដឹកនាំបក្ស ដោយកំណត់អាណត្តិនៃថ្នាក់ដឹកនាំគ្រប់កម្រិត មានរយៈពេល ៣ឆ្នាំ ហើយអាចឈរបានតែពីរអណត្តិ។
មួយឆ្នាំមកនេះ គណបក្សប្រជាធិបតេយ្យមូលដ្ឋាន ប្រមូលបាន សមាជិកក្នុងប្រទេសប្រមាណ ២០០០នាក់ ក្នុងនោះស្រ្តី មានរហូតដល់ ២៥% និងអ្នកគាំទ្រក្រៅប្រទេសមួយចំនួនទៀត មកពីប្រទេសបារាំង ស្វីស អាល្លឺម៉ង់ អាមេរិក ជាដើម ដែលតែងរួមវិភាគទានទ្រទ្រង់បក្សជាប្រចាំ។ ស្របតាម បេសកកម្មរបស់ គបម គឺបណ្តុះអ្នកដឹកនាំល្អ និងកសាងមូលដ្ឋានគ្រឹះប្រជាធិបតេយ្យទូទាំងប្រទេស បក្សថ្មីមួយនេះ បានចំណាយថវិកាប្រមាណ ១៥៥លានរៀល ក្នុងមួយឆ្នាំកន្លងទៅ និងពេលវេលាយ៉ាងច្រើន ទៅលើការបណ្តុះបណ្តាលថ្នាក់ដឹកនាំល្អ ប្រកបដោយសីលធម៌ល្អ នៅថ្នាក់មូលដ្ឋាន។ យ៉ាងហោចណាស់ សមាជិកបក្ស រស់នៅក្នុង ១៧០ឃុំ សង្កាត់ (៧០ស្រុក ១៦ខេត្ត រាជធានី) ឬសរុបប្រមាណ ១១៥៥នាក់ ធ្លាប់បានទទួលការបណ្តុះបណ្តាលពីភាពជាអ្នកដឹកនាំល្អនៅថ្នាក់មូលដ្ឋាន។
បក្សប្រជាធិបតេយ្យមូលដ្ឋាន កំពុងត្រៀមគោលនយោបាយ និងយុទ្ធសាស្រ្ត ១០០ឃុំ ដើម្បីដណ្តើមសន្លឹកឆ្នោត និងត្រៀមខ្លួនបោះឆ្នោតឃុំសង្កាត់ឆ្នាំ២០១៧ខាងមុខ ដោយផ្តល់ការយកចិត្តទុកដាក់ជាពិសេសទៅលើ ២០ឃុំ ដែលជាឃុំគម្រូល្អ ហើយសង្ឃឹមឈ្នះយ៉ាងប្រាកដ។ អគ្គលេខាធិការបក្ស បញ្ជាក់ថា នេះជាយុទ្ធសាស្រ្ត ដ៏មានប្រសិទ្ធភាពមួយ។ ទោះបីមិនរំពឹងថា អាចឈ្នះកៅអី រដ្ឋសភា ច្រើននៅឆ្នាំ២០១៨ តែបក្សនេះ មានគោលនយោបាយថ្នាក់ជាតិ គឺបំបែកសម្លេង ៥០% បូកមួយ របស់បក្សកាន់អំណាច ដើម្បីបង្ខំអោយបក្សកាន់អំណាច ចេះរៀនពីរបៀបជជែក ពិគ្រោះយោបល់ជាមួយបក្សដទៃទៀត ក្នុងការបង្កើតរចនាសម្ព័ន្ធសភា និងអនុម័តច្បាប់សំខាន់ៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ