សកម្មជនការពារព្រៃឈើរបស់បក្សប្រជាជនម្នាក់ រងបណ្តឹងពីបទកាប់ព្រៃឈើគ្មានលិខិតអនុញ្ញាត
ព្រះរាជអាជ្ញាអមតុលាការសាលាដំបូងខេត្តកោះកុងនៅព្រឹកថ្ងៃសុក្រនេះ បានបើកការសាកសួរលើលោកវ៉ែន វ៉ន សមាជិកក្រុមប្រឹក្សាឃុំជំនាប់ ស្រុកថ្មបាំង មកពីគណបក្សប្រជាជនកម្ពុជា និង ជាសកម្មជនការពារព្រៃឈើដ៏សកម្មមួយរូបនៅក្នុងតំបន់អារ៉ែង ខេត្តកោះកុង។ ការសាកសួរនេះ គឺធ្វើឡើងតាមបណ្តឹងរបស់រដ្ឋបាលព្រៃឈើដែលបានប្តឹងលោកវ៉ែន វ៉ន ពីបទ ប្រមូលផលអនុផលព្រៃឈើដោយគ្មានលិខិតអនុញ្ញាត។ យ៉ាងណាក៏ដោយ ព្រះរាជអាជ្ញាមិនបានសម្រេចបែបណាមួយនៅឡើយនោះទេ។
ចុះផ្សាយនៅថ្ងៃ៖
ស្តាប់ - ០២:០២
បន្ទាប់ពីបានសាកសួរអស់ប្រមាណជាងពីរម៉ោង នៅព្រឹកនៅថ្ងៃសុក្រទី៣មេសានេះព្រះរាជអាជ្ញាអមតុលាការសាលាដំបូងខេត្តកោះកុងមិនបានធ្វើការសម្រេចយ៉ាងណាមួយនៅឡើយទេ ចំពោះលោកវ៉ែន វ៉ន ។ លោកវ៉ែន វ៉ន ត្រូវបានរដ្ឋបាលព្រៃឈើប្តឹងពីបទប្រមូលផលអនុផលព្រៃឈើដោយគ្មានលិខិតអនុញ្ញាត។
នៅក្នុងពេលសាកសួរជាងពីរម៉ោងនោះ លោកវ៉ែន វ៉ន ត្រូវបានព្រះរាជអាជ្ញាអមតុលាការសាលាដំបូងខេត្តកោះកុងលោកប៊ូ ប៊ុនហាង សួរនាំអំពីលិខិតអនុញ្ញាតឲ្យកាប់ឈើ និងការទទួលស្គាល់សហគមន៍អារ៉ែងដែលលោកបានបង្កើតឡើង។ លោកវ៉ែន វ៉ន បានឆ្លើយតបថា លោកមិនបានកាប់ឈើនោះទេ គឺបានទិញតពីគេផ្សេង ដើម្បីយកទៅសាងសង់ទីស្នាក់ការសហគមន៍អារ៉ែង។ ចំពោះសហគមន៍អារ៉ែងនេះ លោកវ៉ែន វ៉ន ក៏បានបញ្ជាក់នៅពីមុខព្រះរាជអាជ្ញាថា មិនទាន់មានការទទួលស្គាល់ ឫចុះបញ្ជីជាផ្លូវការនៅឡើយ។ យ៉ាងណាក៏ដោយ បន្ទាប់ពីបានសាកសួរតាមនីតិវិធី លោកព្រះរាជអាជ្ញាប៊ូ ប៊ុនហាង មិនទាន់បានសម្រេចថា ត្រូវចោទប្រកាន់ ឫតម្កល់សំណុំរឿងនេះទុកមិនចាត់ការនោះទេ។
លោកហុង ច័ន្ទសុខា មេធាវីការពារក្តីឲ្យលោកវ៉ែន វ៉ន បានចាត់ទុកបណ្តឹងរបស់រដ្ឋបាលឈើនោះថា ជាបណ្តឹងមួយផ្ទុយពីគតិច្បាប់ គឺផ្ទុយទៅនឹងមាត្រា២៤ និងមាត្រា៤០ នៃច្បាប់ស្តីពី ព្រៃឈើ។ មាត្រាទាំងពីរនេះ បានចែងថា សហគមន៍មូលដ្ឋានមានសិទ្ធក្នុងការប្រមូលផលអនុផលព្រៃឈើក្នុងបរិមាណមួយមិនមែនជាការធ្វើពាណិជ្ញកម្មបានដោយមិនចាំបាច់មានលិខិតអនុញ្ញាត។ ចំពោះបញ្ហានេះ លោកមេធាវីហុង ច័ន្ទសុខា បានបញ្ជាក់ថា លោកបានដាក់សារណាផ្នែកគតិច្បាប់ទៅកាន់ព្រះរាជអាជ្ញាអមសាលាដំបូងខេត្តកោះកុង ដើម្បីពិនិត្យ និងពិចារណា។ លោកហុង ច័ន្ទសុខា មានជំនឿថា តាមរយៈសារណារបស់លោកនេះ ព្រះរាជអាជ្ញា នឹងសម្រេចតម្កល់មិនចាត់ការលើសំណុំរឿងនេះ។
សួមបញ្ជាក់ថា លោកវ៉ែន វ៉ន គឺជាសមាជិកក្រុមប្រឹក្សាឃុំជំនាប់ ស្រុកថ្មបាំងមកពីគណបក្សប្រជាជនកម្ពុជា ដែលបានចូលរួមសកម្មភាពយ៉ាងច្រើនក្នុងការការពារព្រៃឈើ និង ធនធានធម្មជាតិ ជាពិសេសលោកបានចូលរួមជាមួយសកម្មជនការពារបរិស្ថានផ្សេងទៀតដើម្បីតវ៉ាប្រឆាំងនឹងការសាងសង់ទំនប់វារីអគ្គិសនីនៅក្នុងតំបន់អារ៉ែង។ សកម្មជនការពារតំបន់អារ៉ែងរូបនេះ ត្រូវបានរដ្ឋបាលព្រៃឈើធ្វើការប្តឹងផ្តល់ បន្ទាប់ពីលោកបានទទួលទិញឈើចំនួន៨ ម៉ែត្រគូប ដើម្បីយកទៅសាងសង់ទីស្នាក់ការសហគមន៍អារ៉ែងនៅក្នុងខេត្តកោះកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ