៩ ខែ ដើមឆ្នាំ ២០១៦៖ ចំនួនអ្នកប្រើប្រាស់គ្រឿងញៀន នៅតែបន្តកើនឡើង
យៈពេល ៩ ខែ ដើមឆ្នាំ ២០១៦ អ្នកប្រើប្រាស់គ្រឿងញៀននៅទូទាំងប្រទេស មានចំនួន ១៨ ៥៥៥ នាក់ កើនឡើង ២៩,៦៣ ភាគរយ ធៀបនឹងឆ្នាំ ២០១៥។ ក្នុងនោះ អ្នកដែលមិនទាន់បានទៅទទួលសេវាព្យាបាលមានប្រមាណជាង ៤៩% ហើយ អ្នកដែលបាននឹងកំពុងទៅទទួលសេវាព្យាបាលមានប្រមាណ ៥០% អាយុចន្លោះ ពី ១៨ ទៅ ៣៥ ឆ្នាំ ។ នេះបើតាម របាយការណ៍ស្តីពីលទ្ធផលការងារ ត្រួតពិនិត្យគ្រឿងញៀន រយៈពេល ៩ ខែ ឆ្នាំ ២០១៦ និង ទិសដៅការងារត្រួតពិនិត្យគ្រឿងញៀន ត្រីមាសទី ៤ របស់អាជ្ញាធរជាតិប្រយុទ្ធប្រឆាំងនឹងគ្រឿងញៀន។
ចុះផ្សាយនៅថ្ងៃ៖
ស្តាប់ - ០១:៤៧
ចំនួនអ្នកប្រើប្រាស់គ្រឿងញៀន ក្នុងរយៈពេល ៩ ខែ ដើមឆ្នាំ ២០១៦ មានចំនួន ១៨ ៥៥៥ នាក់ ដែលបានកើនឡើងចំនួន ៤២៤២ នាក់ បើប្រៀបធៀបនឹងរយៈពេលដូចគ្នាឆ្នាំ២០១៥។ បើតាមអាជ្ញាធរជាតិប្រយុទ្ធប្រឆាំងនឹងគ្រឿងញៀន អ្នកប្រើប្រាស់គ្រឿងញៀន ភាគច្រើន មានអាយុចាប់ពី ១៨ ដល់ ២៥ ឆ្នាំ មានចំនួន ៤៣,៦ ភាគរយ។
ចំណែកឯការបង្រ្កាបបទល្មើសគ្រឿងញៀនវិញ ក៏មានការកើនឡើងដូចគ្នា ពោលគឺមានចំនួន ៣៤០៦ ករណី រួមទាំងបទល្មើសប្រើប្រាស់ ដោយកើនឡើងចំនួន ១២១៦ ករណី ស្មើនឹង ៥៥,៥២% បើប្រៀបធៀបនឹងរយៈពេលដូចគ្នាឆ្នាំ ២០១៥។
លោក មាស វីរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន បានទទួលស្គាល់ចំណុចខ្សោយរបស់ខ្លួន ដែលធ្វើឲ្យចំនូនអ្នកប្រើប្រាស់គ្រឿងញៀន នៅតែបន្តកើនឡើង មានដូចជា៖ ការរីករាលដាលនៃការប្រើប្រាស់គ្រឿងញៀនពីទីក្រុងទៅជនបទ ខ្លឹមសារនៃសារអប់រំអាចនៅមិនទាន់មានភាពទាក់ទាញ ចំពោះមហាជនទូទៅ ឬ អាចទៅមិនដល់ក្រុមជនគោលដៅងាយប្រឈមខ្ពស់នឹងគ្រោះថ្នាក់ និង កម្មវិធីនិងសកម្មភាពផ្សេងទៀត របស់ក្រសួងស្ថាប័ន នៅពុំទាន់អនុវត្តបានសកម្ម និង លទ្ធភាពដែលខ្លួនមាន។
ជាការកត់សម្គាល់ កម្ពុជានៅតែបន្តរងឥទ្ធិពលពីបញ្ហាគ្រឿងញៀន ទាំងការចរាចរឆ្លងកាត់ ទាំងការផ្តត់ផ្គង់ពីក្រុមឈ្មួញសម្រាប់ការប្រើប្រាស់ ដែលស្ថានភាពបែបនេះ ធ្វើឲ្យនិន្នាការនៃការប្រើប្រាស់នៅក្នុងប្រទេស បានរីករាលដាលពីទីក្រុង ទីប្រជុំជន រហូតដល់ទីជនបទមួយចំនួន។
បើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន ការចរាចរគ្រឿងញៀន ឆ្លងកាត់ព្រំដែនគោកចូលមកកម្ពុជា នៅតែត្រូវបានកត់សម្គាល់ទៅលើច្រកព្រំដែននៃបណ្តាខេត្តភាគខាងជើង និង ភាគឥសាននៃប្រទេស។ គ្រឿងញៀន ដែលនាំចូលតាមច្រកព្រំដែន ភាគខាងជើង ភាគច្រើនជាប្រភេទមេតំហ្វេតាមីន គ្រាប់ មេតំហ្វេតាមីនម្សៅ និង ហេរ៉ូអ៊ីន។ ចំណែកគ្រឿងញៀនដែលនាំចូល តាមច្រកអាកាសយានដ្ឋានអន្តរជាតិភ្នំពេញ ជាគ្រឿងញៀន ប្រភេទ ហេរ៉ូអ៊ីន និង កាកូអ៊ីន ដែលបណ្តាញនៃក្រុមឧក្រិដ្ឋជនគ្រឿងញៀនអន្តរជាតិ នាំមកពីតំបន់អាមេរិកខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ