អង្គការសហប្រជាជាតិ ចាត់ទុក ការឃុំខ្លួនអ្នកការពារសិទ្ធិមនុស្សទាំង ៥ នាក់ គឺមិនត្រឹមត្រូវ តែរដ្ឋាភិបាល ច្រានចោល
អង្គការសហប្រជាជាតិ ស្តីពីការឃុំឃាំងដោយឥតច្បាប់ (WGAD) បានប្រកាសថា ការឃុំខ្លួនអគ្គលេខាធិការរងគ.ជ.ប លោក នី ចរិយា និង សកម្មជនការពារសិទ្ធិមនុស្ស ចំនួន ៤ នាក់ផ្សេងទៀត ថា គ្មានភាពត្រឹមត្រូវ។ ចំណែកឯអង្គការ ដែលធ្វើការពាក់ព័ន្ធនឹងបញ្ហាសិទ្ធិមនុស្សនៅកម្ពុជាវិញ បានទទូចឲ្យអាជ្ញាធរបញ្ឈប់ការធ្វើទុក្ខបុកម្នេញ លើអ្នកការពារសិទ្ធិមនុស្ស ដែលកំពុងជាប់ឃុំឲ្យបានឆាប់រហ័ស និងផ្តល់សំណងសមរម្យដល់អ្នកទាំងនោះ។ ក៏ប៉ុន្តែអ្នកនាំពាក្យក្រសួងយុត្តិធម៌ ចាត់ទុកថា ការលើកឡើងយ៉ាងដូច្នេះ គឺជាការដាក់សម្ពាធដល់ដំណើរការនីតិវីធីរបស់តុលាការ។
ចុះផ្សាយនៅថ្ងៃ៖
ស្តាប់ - ០២:៣៧
អង្គការសង្គមស៊ីវិលក្នុងស្រុក និងអន្តរជាតិ កាលពីម្សិលមិញ បានចេញសេចក្តីប្រកាសព័ត៌មានរួម ថ្កោលទោសចំពោះការបន្តឃុំខ្លួន លោក នី ចរិយា មន្ត្រីជាន់ខ្ពស់ គជប និងមន្ត្រីសិទ្ធិមនុស្ស ៤ នាក់ ផ្សេងទៀត។ អង្គការសហប្រជាជាតិស្តីពីការឃុំឃាំងដោយឥតច្បាប់នេះ បានទទួលស្គាល់នូវការរំលោភបំពាន លើអ្នកការពារសិទ្ធិមនុស្សទាំង ៥ នាក់ សិទ្ធិក្នុងការស្នើនិងផ្តល់ជំនួយផ្នែកច្បាប់ផ្អែកតាម វិជ្ជាជីវៈ និងផ្តល់ការប្រឹក្សាពាក់ព័ន្ធផ្សេងទៀត រួមទាំងការជួយក្នុងការក្របខណ្ឌការពារសិទ្ធិមនុស្ស។
ការប្រកាសទទួលស្គាល់នេះ គឺបន្ទាប់ពីអង្គការ ដែលធ្វើការលើបញ្ហាសិទ្ធិមនុស្សចំនួន ៥ រួមមាន ដូចជា មជ្ឈមណ្ឌលសិទ្ធិមនុស្សកម្ពុជា សមាគមអាដហុក អង្គការលីកាដូ និងអង្គការឃ្លាំមើលថែរក្សាអ្នកការពារសិទ្ធិមនុស្ស បានអនុម័តនូវអនុសាសន៍ ថា អ្នកការពារសិទ្ធិមនុស្ស ត្រូវបានរើសអើងដោយសារតែអ្នកទាំងនោះ ធ្វើការជាអ្នកការពារសិទ្ធិមនុស្ស ហើយសិទ្ធិស្មើគ្នា ចំពោះមុខច្បាប់ និងសិទ្ធិការពារពីច្បាប់ស្មើគ្នារបស់អ្នកទាំងនោះ ក៏ត្រូវបានរំលោភបំពាន យោងតាមមាត្រា ២៦ នៃកតិសញ្ញាអន្តរជាតិស្តីពីពលរដ្ឋ និងសិទ្ធិនយោបាយ។
អង្គការខាងលើនេះ ក៏បានសើ្នសុំឲ្យមានការដោះលែង និងទម្លាក់ចោលបទចោទទាំងអស់ ចំពោះសកម្មជនការពារសិទ្ធិមនុស្ស។ ទាក់ទងនឹងការលើកឡើងនេះ លោក ជិន ម៉ាលីន អ្នកនាំពាក្យក្រសួងយុត្តិធម៌ បានមានប្រសាសន៍ថា មកទល់ពេលនេះ លោក មិនទាន់បានមើលរបាយការណ៍លម្អិត ថាតើការលើកឡើងរបស់ អង្គការសហប្រជាជាតិ ផ្អែកតាម សាច់រឿង អង្គហេតុ ភស្តុតាង និងមូលដ្ឋានច្បាប់យ៉ាងណាខ្លះ ដែលឈានទៅដល់ការសន្និដ្ឋានបែបនេះ។ អ្នកនាំពាក្យរូបនេះ បានស្នើឲ្យស្ថាប័នមួយនេះ គួរតែ ប្រគល់ភស្តុតាង និងសាក្សី មកឲ្យ មេធាវីរបស់ជនជាប់ចោទ ដើម្បីតវ៉ាតាមផ្លូវតុលាការ ជាជាង ការអត្ថាធិប្បាយណាមួយ ដែលអាចដាក់សម្ពាធទៅលើតុលាការកម្ពុជា។
រហូតមកទល់ពេលនេះ មន្ត្រីសិទ្ធិមនុស្សសមាគមអាដហុក ៤រូប គឺលោក នី សុខា លោក យី សុខសាន្ត លោក ណៃ វ៉ង់ដា និងអ្នកស្រី លឹម មុន្នី ត្រូវបានអាជ្ញាធរឃុំខ្លួនបណ្ដោះអាសន្នរង់ចាំសវនាការ ដោយចោទប្រកាន់ពីបទសូកប៉ាន់សាក្សីក្នុងសំណុំរឿងអាស្រូវស្នេហារបស់លោក កឹម សុខា ប្រធានស្តីទីគណបក្សសង្គ្រោះជាតិ និងនាង ខុម ចាន់តារាទី ហៅស្រីមុំ។
ចំណែកលោក នី ចរិយា អគ្គលេខាធិការរង គ.ជ. កំពុងរុំព័ទ្ធដោយបណ្តឹងចំនួនពីរ។ កាលពីថ្ងៃទី២២ កញ្ញា កន្លងទៅ លោក ត្រូវបានចៅក្រមជំនុំជម្រះនៃតុលាការក្រុងភ្នំពេញ កាត់ទោសឲ្យជាប់ពន្ធនាគារ ៦ខែ និងពិន័យជាប្រាក់ចំនួន ៦លានរៀល ក្រោមបទចោទបរិហារកេរ្តិ៍ បរិហារបង្កាច់កេរ្តិ៍ និងពីបទប្រើប្រាស់ឥទ្ធិពលដាក់សម្ពាធលើតុលាការខេត្តសៀមរាប។ ហើយបណ្តឹងមួយទៀតនោះគឺ លោក នី ចរិយា ក៏កំពុងជាប់បណ្ដឹង ទាក់ទងនឹងរឿងអាស្រូវស្នេហារបស់លោក កឹម សុខា និងនាង ខុម ចាន់តារាទី ហៅស្រីមុំ ដោយលោកត្រូវបានតុលាការក្រុងភ្នំពេញ ចោទពីបទសមគំនិតសូកប៉ាន់សាក្សី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ