ការរំលឹករឿងអតីតកាលគឺជាបញ្ឆេះបញ្ហាផ្ទៃក្នុងហ្វ៊ុនស៊ិនប៉ិចបច្ចុប្បន្ន
អគ្គលេខាធិការប្រតិបត្តិគណបក្សហ៊្វុនស៊ិនប៉ិច លោក សាយ ហាក់ នៅព្រឹកថ្ងៃទី១ កុម្ភៈ នេះ បានធ្វើសន្និសីទសារព័ត៌មានបន្ទាប់ពីការឆ្លើយឆ្លងគ្នារវាងសម្តេចក្រុមព្រះ និងលោក ញឹក ប៊ុនឆៃ កំពុងតែផ្ទុះឥតឈប់។ អគ្គលេខាបក្សហ្វ៊ុនស៊ិនប៉ិចបានបញ្ជាក់ថាគ្មានការបែកបាក់ហ្វ៊ុនស៊ិនប៉ិចសាជាថ្មីនោះទេ ប៉ុន្តែលោកញឹក ប៊ុនឆៃបានអះអាងថា ការរំលឹករឿងអតីតកាលដែលហែកហួរគ្នាគឺជាបញ្ឆេះដែលធ្វើឱ្យហ្វ៊ុនស៊ិនប៉ិចបន្តមានជម្លោះពាក្យសម្តីក្នុងជួរថ្នាក់ដឹកនាំដូចបច្ចុប្បន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ការរំលឹករឿងអតីតកាលរវាងក្រុមលោក ញឹក ប៊ុនឆៃ និងក្រុមសម្តេចក្រុមព្រះនរោត្តមរណឫទ្ធិ គឺជាបញ្ហាចម្បងដែលធ្វើឱ្យមានជម្លោះក្នុងជួរក្បាលម៉ាស៊ីនហ្វ៊ុនស៊ិនប៉ិចបន្តរហូតមិនទាន់ចប់។ នាពេលចុងក្រោយនេះ មេដឹកនាំគណបក្សលោក ញឹក ប៊ុន ឆៃ និងសម្តេចក្រុមព្រះ បានឆ្លើយឆ្លងសារឱ្យផ្លែគ្នាទៅវិញទៅមកដោយម្ខាងចោទប្រកាន់ ម្ខាងសុំសិទ្ធបកស្រាយ។ ការចោទ និងការបកស្រាយនេះ បណ្តាលឱ្យមានមតិមួយចំនួនដាក់ការសង្ស័យថាហ៊្វុនស៊ិនប៉ិច នឹងអាចបែកគ្នាសារជាថ្មី ហើយអ្វីដែលធ្វើឱ្យលោក ញឹក ប៊ុនឆៃ និងសម្តេចក្រុមព្រះមើលមុខគ្នាមិនចំ ខណៈដែលមេដឹកនាំទាំងពីរគឺជាអតីតអ្នកស្មោះត្រង់នឹងគ្នា?
អនុប្រធានទី២គណបក្ស លោក ញឹក ប៊ុនឆៃ បានលើកឡើងថា សម្តេចក្រុមព្រះតែងតែយករឿងអតីតកាលមករំលឹក និងចោទលោកថា គឺជាអ្នកទទួលខុសត្រូវទាំងស្រុងលើការទម្លាក់ព្រះអង្គកាលពីឆ្នាំ២០០៦ ការលក់ និងការដោះដូរស្នាក់ការគណបក្ស រួមទាំងការចោទថាលោក ញឹក ប៊ុនឆៃ គឺជាអ្នកធ្វើឱ្យសូន្យកៅអីកាលពីការបោះឆ្នោតអាណត្តិមុនជាដើម។ លោក ញឹក ប៊ុនឆៃ បានសង្កត់ធ្ងន់ថា ចំណុចទាំងនេះរូបលោកមិនអាចទទួលយកទាំងស្រុងបានទេ ហើយថាសម្តេចក្រុមព្រះទ្រង់គួរតែទទួលយកខុសផងដែរ ។
អនុប្រធានគណបក្សដែលជាអតីតអ្នកស្មោះត្រង់របស់សម្តេចក្រុមព្រះ បានរំលឹកថា មុនពេលបង្រួបបង្រួមហ៊្វុនស៊ិនប៉ិចឡើងវិញកាលពីខែមករា ឆ្នាំ២០១៥នោះ ការចរចាត្រីភាគីរវាងសម្តេចក្រុមព្រះ ព្រះអង្គម្ចាស់ក្សត្រីអរុណរស្មី និងលោកញឹក ប៊ុនឆៃ បានសម្រេចជាឯកច្ឆន្ទ័ថា ក្រោយការបង្រួបបង្រួមរឿងអតីតកាលទាំងអស់ដែលបានកើតឡើងគឺបំភ្លេចចោលទាំងស្រុង ការចុះមូលដ្ឋានគឺត្រូវតែមានលោកញឹក ប៊ុនឆៃដង្ហែសម្តេចក្រុមព្រះដើម្បីបង្ហាញពីការបង្រួបបង្រួមជាដើម។
ប៉ុន្តែចំណុចទាំងនេះ មិនត្រូវបានគោរពនោះទេ។ ក្រោយការផ្ទុះជម្លោះរវាងជួរថ្នាក់ដឹកនាំបក្សរាជានិយមទាំងពីរកាន់តែស្រួចស្រាវ លោកសាយ ហាក់ អគ្គលេខាធិការហ៊្វុន ស៊ិនប៉ិច នៅព្រឹកថ្ងៃទី១ កុម្ភៈបានធ្វើសន្និសីទសារព័ត៌មានហើយបញ្ជាក់ថា គ្មានការបែកបាក់គ្នារវាងសម្តេចក្រុមព្រះ ប្រធានគណបក្ស និងលោក ញឹកប៊ុនឆៃ អនុប្រធានទី២គណបក្សហ៊្វុនស៊ិនប៉ិចនោះទេ។
ទន្ទឹមនឹងនេះលោក ញឹក ប៊ុនឆៃ បានអះអាងថាក៏គ្មានគម្រោងនៃការបែកបាក់នោះដែរ ប៉ុន្តែលោកបានលើកឡើងថា កាលពីមុនបង្រួបបង្រួមក្រុមការងារហ៊្វុនស៊ិនប៉ិចចាស់របស់លោកងាយស្រួលធ្វើការជាងនាពេលបច្ចុប្បន្នក្រោយបង្រួបបង្រួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ