ច្បាប់ថ្មី៖ អ្នកដែលប្រមាថព្រះមហាក្សត្រនឹងត្រូវមានទោសជាប់ពន្ធនាគារពី១ឆ្នាំទៅ៥ឆ្នាំ
នៅព្រឹកនេះ គណៈរដ្ឋមន្រ្តីកម្ពុជាដែលដឹកនាំប្រជុំដោយលោកនាយករដ្ឋមន្រ្តីហ៊ុន សែន បានសម្រេចអនុម័តលើសេចក្តីព្រាងច្បាប់ស្តីពីវិសោធនកម្មក្រមព្រហ្មទណ្ឌកម្ពុជា។ វិសោធនកម្មក្រមព្រហ្មទណ្ឌនេះ គឺរដ្ឋាភិបាលបានបញ្ចូលមាត្រាថ្មីមួយទៀតដោយកំណត់ដាក់ទោសទណ្ឌឲ្យជាប់ពន្ធនាគារពី១ឆ្នាំទៅ៥ឆ្នាំលើជនណាដែលប្រមាថដល់ព្រះមហាក្សត្រ។ សេចក្តីព្រាងវិសោធនកម្មនេះ នឹងត្រូវបញ្ជូនទៅកាន់រដ្ឋសភាក្នុងពេលឆាប់ៗនេះ ដើម្បីពិភាក្សា និងអនុម័តឲ្យប្រើប្រាស់។
ចុះផ្សាយនៅថ្ងៃ៖
ស្តាប់ - ០២:១៣
មាត្រាថ្មីស្តីពីការដាក់ទោសទណ្ឌលើជនណាដែលប្រមាថព្រះមហាក្សត្រនឹងត្រូវបញ្ចូលបន្ថែមទៅក្នុងជំពូកទី១ មាតិកាទី១ នៃគន្ថីទី៤ នៅក្នុងក្រមព្រហ្មទណ្ឌកម្ពុជាដោយប្រើប្រាស់មាត្រាស្ទួន ៤៣៧។ មាត្រាថ្មីនេះចែងថា ការប្រមាថចំពោះអង្គព្រះមហាក្សត្រ ត្រូវផ្តន្ទាទោសដាក់ពន្ធនាគារពី ០១ឆ្នាំ ទៅ០៥ឆ្នាំ និងពិន័យជាទឹកប្រាក់ពី ២លានរៀល ទៅ១០លានរៀល។ ចំពោះនីតីបុគ្គលក៏អាចត្រូវបានផ្តនា្ទទោសពិន័យជាប្រាក់ ១០លានរៀល ទៅ៥០លានរៀល ព្រមទាំងទោសបន្ថែមមួយ ឬច្រើន ក្នុងករណីដែលតុលាការរកឃើញថាមានពិរុទ្ធភាពពាក់ព័ន្ធនឹងការប្រមាថចំពោះអង្គព្រះមហាក្សត្រ។ នេះបើយោងតាមសេចក្តីព្រាងវិសោធនកម្មក្រមព្រហ្មទណ្ឌកម្ពុជាដែលគណៈរដ្ឋមន្រ្តីកម្ពុជាទើបតែអនុម័តនៅថ្ងៃសុក្រនេះ។
តាមពិតទៅ បើតាមក្រមព្រហ្មទណ្ឌកម្ពុជា ច្បាប់ដាក់ទោសទណ្ឌដើម្បីការពារដល់អង្គព្រះមហាក្សត្រមានចែងចេញជាមាត្រាមួយចំនួនរួចទៅហើយ ដូចជាការធ្វើឃាតព្រះមហាក្សត្រត្រូវជាប់ពន្ធនាគារមួយជិវិត ការធ្វើទារុណកម្មឬអំពើឃោរឃៅចំពោះព្រះមហាក្សត្រត្រូវជាប់ពន្ធនាគារពី១០ទៅ២០ឆ្នាំ និង ការប្រើអំពើហិង្សាចំពោះព្រះមហាក្សត្រត្រូវជាប់ទោសពី៧ ទៅ១៥ឆ្នាំជាដើម។ ប៉ុន្តែត្រង់បទល្មើសជេរប្រមាថកាតទានចំពោះព្រះមហាក្សត្រវិញ មិនទាន់មានចែងនៅក្នុងច្បាប់នៅឡើយទេ។ ហេតុដូច្នេះហើយ ទើបរដ្ឋាភិបាលកម្ពុជា បានសម្រេចបង្កើតមាត្រាថ្មីបន្ថែមទៅក្នុងក្រមព្រហ្មទណ្ឌកម្ពុជា ដើម្បីដាក់ទោសជនណាដែលប្រពឹ្រត្តបទល្មើសបែបនេះ។
ជាការកត់សម្គាល់ ការបង្កើតមាត្រាច្បាប់ថ្មីដើម្បីដាក់ទោសទណ្ឌដល់អុ្នកប្រមាថចំពោះព្រះមហាក្សត្រនេះ គឺបានផ្តួចផ្តើមធ្វើឡើងភ្លាមៗ បន្ទាប់ពីលោកលឺ ឡាយស្រេង ដែលជាអតីតមន្រ្តីជាន់ខ្ពស់របស់គណបក្សរាជានិយមហ្វ៊ុនស៊ិនប៉ិច និងដែលធ្លាប់ធ្វើជាឧបនាយករដ្ឋមន្រ្តីផង បាននិយាយប៉ះពាល់ដល់ព្រះមហាក្សត្រនៅក្នុងការសន្ទនាតាមទូរស័ព្ទមួយកាលពីអំឡុងខែតុលា ឆ្នាំ២០១៧កន្លងទៅ។ យ៉ាងណាក៏ដោយ រដ្ឋាភិបាលកម្ពុជាបានគូសបញ្ជាក់ថា ការបង្កើតនូវមាត្រាច្បាប់ថ្មីនេះ គឺដើម្បីធានាលើកស្ទួយ និងការពារព្រះចេស្ដា និងព្រះកិត្តិនាមរបស់អង្គព្រះមហាក្សត្រ ដែលជាព្រះប្រមុខរដ្ឋរបស់កម្ពុជា និងជាទីគោរពសក្ការៈដ៏ខ្ពង់ខ្ពស់បំផុតនៃប្រជាជាតិខ្មែរស្របតាមមាត្រា៧ នៃរដ្ឋធម្មនុញ្ញកម្ពុជា។ មាត្រា៧ នៃរដ្ឋធម្មនុញ្ញកម្ពុជា ដែលបានចែងថា អង្គព្រះមហាក្សត្រ មិនអាចរំលោភបំពានបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ