គ.ជ.ប ទទួលបានយោបល់ពីគ្រប់ភាគីពាក់ព័ន្ធ ដើម្បីធ្វើបច្ចុប្បន្នភាពបញ្ជីបោះឆ្នោតឆ្នាំ២០១៧
កាលពីថ្ងៃម្សិលមិញ គ.ជ.ប បានទទួលយោបល់ពីគ្រប់ភាគីពាក់ព័ន្ធអស់ហើយ ដើម្បីពិភាក្សា និងដាក់បញ្ចូលក្នុងសេចក្តីព្រាងបទបញ្ជា និងនីតិវិធីសម្រាប់ធ្វើបច្ចុប្បន្នភាពបញ្ជីបោះឆ្នោតឆ្នាំ២០១៧។ អ្នកនាំពាក្យគ.ជ.ប ថាកន្លងមកយោបល់របស់ភាគីពាក់ព័ន្ធ ច្រើនតែស្នើឲ្យមានការរៀបចំការិយាល័យចុះឈ្មោះ និងបោះឆ្នោតនៅក្រៅប្រទេស។
ចុះផ្សាយនៅថ្ងៃ៖
លោកហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានថ្លែងប្រាប់វិទ្យុបារាំងអន្តរជាតិនៅថ្ងៃទី២៦ ខែកក្កដា ថា រហូតមកដល់ពេលនេះ គ.ជ.ប បានទទួលអនុសាសន៍ពីគ្រប់ភាគីពាក់ព័ន្ធអស់ហើយៗ អគ្គលេខាធិការដ្ឋានកំពុងតែបូកសរុបមតិយោបល់ទាំងអស់នោះ។
លោកហង្ស ពុទ្ធាមិនអាចបញ្ជាក់បានទេថាមានចំណុចអ្វីខ្លះ ដែលភាគីពាក់ព័ន្ធបានដាក់យោបល់របស់ខ្លួនមក គ.ជ.ប។ ប៉ុន្តែលោកកត់ស្គាល់ថា ក្នុងពេល គ.ជ.ប រៀបចំសន្និបាតបូកសរុបការងារកាលពីពាក់កណ្តាលខែកក្កដាកន្លងទៅ ភាគីពាក់ព័ន្ធ ដែលមានអង្គការក្រៅរដ្ឋាភិបាលជាតិ និងអន្តរជាតិ គណបក្សនយោបាយ និងតំណាងស្ថានទូតជាដើមនោះ ធ្លាប់លើកឡើងពីសំណើចង់ឲ្យមានការរៀបចំការិយាល័យចុះឈ្មោះ និងបោះឆ្នោត នៅតាមស្ថានទូតកម្ពុជានៅក្រៅប្រទេស និងនៅតាមជាយដែន។
កាលពីថ្ងៃទី១៩ ខែកក្កដា អង្គការក្រៅរដ្ឋាភិបាល តំណាងគណបក្សប្រឆាំង បានជជែកពិភាក្សាគ្នា ដើម្បីដាក់ចូលនូវមតិយោបល់របស់ខ្លួនឲ្យ គ.ជ.ប ហើយបញ្ហាធំដែលភាគីពាក់ព័ន្ធទាំងនោះលើកឡើងគឺការស្នើឲ្យពលករចំណាកស្រុកក្រៅប្រទេសអាចចុះឈ្មោះ និងបោះឆ្នោតបាននៅក្រៅប្រទេស។
អ្នកនាំពាក្យ គ.ជ.ប ចាត់ទុកថានេះគឺជាសំណើដដែលៗ ហើយ គ.ជ.ប ក៏នៅតែរក្សាចម្លើយរបស់ខ្លួនដដែលដែរ។ អ្នកនាំពាក្យបញ្ជាក់ថាសូមកុំនាំគ្នាទាញ គ.ជ.ប ឲ្យអនុវត្តខុសច្បាប់អី ចំពោះរឿងខាងលើនេះ។ លោកបន្ថែមថា ការស្នើវិសោធនកម្មច្បាប់ ដើម្បីបើកផ្លូវក្នុងការរៀបចំការិយាល័យចុះឈ្មោះ និងបោះឆ្នោតនៅក្រៅប្រទេស គឺមិនមែនជាតួនាទីរបស់ គ.ជ.ប ទេ។
លោកបន្តថាបើតំណាងរាស្ត្រមើលឃើញថាច្បាប់នោះមានបញ្ហាយ៉ាងណា គឺគួរតែស្នើទៅសភា ហើយបើសភាសម្រេចកែប្រែបែបណាចំពោះមាត្រាទាំងនោះ គ.ជ.ប នឹងអនុវត្តតាម។
លោកសុន ឆ័យ មន្ត្រីជាន់ខ្ពស់គណបក្សសង្រ្គោះជាតិបញ្ជាក់ប្រាប់វិទ្យុបារាំងថាការឆ្លើយបែបនេះ របស់គ.ជ.ប គឺជាការឆ្លើយដោយគ្មានការទទួលខុសត្រូវ។ លោកបន្ថែមថា បើទោះបីជា គ.ជ.ប មិនមានសិទ្ធិស្នើច្បាប់ ឬស្នើធ្វើវិសាធនកម្មច្បាប់ ប៉ុន្តែ គ.ជ.ប អាចរាយការណ៍មករដ្ឋសភាពីការលំបាករបស់ខ្លួនក្នុងអនុវត្តច្បាប់។ លោកសុន ឆ័យថារហូតមកដល់ពេលនេះ គ.ជ.ប មិនដែលផ្ញើរបាយការណ៍បង្ហាញពីភាពលំបាករបស់ខ្លួនមកសភាទេ៕
មន្ត្រីជាន់ខ្ពស់គណបក្សប្រឆាំងរូបនេះបញ្ជាក់ថានៅពេលនេះមន្ត្រីរបស់លោកកំពុងរៀបចំឯកសារស្នើធ្វើវិសោធនកម្មច្បាប់បោះឆ្នោត ដើម្បីដាក់ទៅរដ្ឋសភានៅដើមសប្តាហ៍ក្រោយនេះ។ ការស្នើធ្វើវិសោធនកម្មច្បាប់នេះ គឺដើម្បីបើកផ្លូវឲ្យពលករចំណាកស្រុកនៅក្រៅប្រទេសអាចចុះឈ្មោះ និងបោះឆ្នោតនៅប្រទេស ដែលពួកគេកំពុងបំពេញការងារ។ លោកសុន ឆ័យក៏សង្ឃឹមដែរថា គ.ជ.ប និងគណបក្សប្រជាជនសម្តែងការគាំទ្រចំពោះការស្នើធ្វើវិសោធនកម្មច្បាប់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ