គ.ជ.ប.គ្រោងលុបឈ្មោះអ្នកបោះឆ្នោតចាស់ និងរៀបចំបញ្ជីឈ្មោះថ្មីឲ្យនៅតិចនិងសុក្រិតបំផុត
គណៈកម្មការជាតិរៀបចំការបោះឆ្នោតគ្រោងនឹងលុបឈ្មោះអ្នកបោះឆ្នោតចាស់ហើយរៀបចំឲ្យនៅតិចនិងសុក្រិតបំផុត។ នេះបើតាមលោក ស៊ិក ប៊ុនហុក ប្រធានគ.ជ.ប.ថ្មីដែលបានប្រាប់វិទ្យុបារាំងអន្តរជាតិនៅថ្ងៃសៅរ៍នេះ។ ការថ្លែងដូច្នេះ គឺធ្វើឡើងបន្ទាប់ពីបានបង្កើតគណៈកម្មការចំពោះកិច្ច និងគណៈកម្មការបច្ចេកទេសកិច្ចការបោះឆ្នោតនៅថ្ងៃទី៨ឧសភាម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
បញ្ជីឈ្មោះអ្នកបោះឆ្នោតជាបញ្ហាប្រឈម និងជារឿងដ៏ចម្រូងសម្រាស់បំផុតចំពោះគណៈកម្មការជាតិរៀបចំការបោះឆ្នោត ហើយនេះក៏ជាវិញ្ញាសាដ៏សំខាន់សម្រាប់គ.ជ.ប.ថ្មី បញ្ចេញសមត្ថភាពផងដែរ។
លោក ស៊ិក ប៊ុនហុក ប្រធានគ.ជ.ប.បានបញ្ជាក់ប្រាប់វិទ្យុបារាំងអន្តរជាតិ RFI ថា គ.ជ.ប.កំពុងរៀបចំបច្ចេកទេស និងបញ្ជីឈ្មោះថ្មីដែលអាចធានាបានសុក្រិត្យភាពនិងប្រសិទ្ធភាព ហើយគឺដើម្បីកុំឲ្យមានបាតុភូតចម្រូងចម្រាស់ជាមួយគ្នាបន្តទៀតនៅក្រោយពេលប្រកាសលទ្ធផលបោះឆ្នោត។ ចំពោះការចុះឈ្មោះក្នុងបញ្ជីថ្មីនេះ ក៏នឹងមានការផ្តិតស្នាមក្រយៅដៃ ហើយឯកសារដែលសំខាន់បំផុតសម្រាប់ការចុះឈ្មោះនោះ គឺអត្តសញ្ញាណប័ណ្ណ និងសាមីខ្លួនផ្ទាល់តែម្តង។ នេះបើតាមការបញ្ជាក់របស់លោក ស៊ិក ប៊ុនហុក។
ចំពោះបញ្ជីឈ្មោះអ្នកបោះឆ្នោតអាណត្តិចាស់ ក៏នឹងត្រូវមានការរៀបចំនិងពិនិត្យឡើងវិញដែរ ព្រមទាំងលុបឈ្មោះក្នុងបញ្ជីចាស់ជាច្រើនទៀតផង។ ផលហេតុពីរនៅក្នុងចំណោមមូលហេតុផ្សេងៗ ត្រូវបានប្រធានគ.ជ.ប.ថ្មីពន្យល់ថា មកពីការស្លាប់និងការផ្លាស់ប្តូរទីលំនៅរបស់សាមីខ្លួនអ្នកបោះឆ្នោត។
បើតាមលោក ស៊ិក ប៊ុនហុក ដដែល។ នៅក្នុងឆ្នាំ២០១៥នេះ គ.ជ.ប. នឹងចុះដើរពន្យល់អប់រំណែនាំ ប្រជាពលរដ្ឋតាមមូលដ្ឋាន និងរៀបចំចុះឈ្មោះសាកល្បង ហើយនឹងរង់ចាំទទួលមតិយោបល់កែលម្អពីសំណាក់ភាគីពាក់ព័ន្ធ និងអង្គការសង្គមស៊ីវិល។ ចំណែកឆ្នាំក្រោយ គឺឆ្នាំ២០១៦ នឹងមានការចុះឈ្មោះក្នុងបញ្ជីបោះឆ្នោតថ្មីជាផ្លូវការ ហើយក៏ជាការត្រៀមសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ ឆ្នាំ២០១៧ដែរ។ ដោយឡែក ចំពោះការបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ លោក ស៊ិក ប៊ុនហុក បញ្ជាក់ថា គ.ជ.ប.នឹងធ្វើបច្ចុប្បន្នភាពបញ្ជីឈ្មោះជាថ្មីម្តងទៀត។
សូមជម្រាបជូនដែរថា សព្វថ្ងៃនេះ គ.ជ.ប. កំពុងសហការនិងទាក់ទងការងារបច្ចេកទេស ជាមួយប្រទេសជប៉ុន និងសហភាពអឺរ៉ុប។ ចំពោះគម្រោងថវិការដែលភាគីនឹងផ្តល់ជំនួយឲ្យកម្ពុជានៅមិនទាន់ដឹងឡើយទេ ដោយលោក ស៊ិក ប៊ុនហុក ប្រាប់ថា រង់ចាំប្រជុំសម្រេចផែនការមេនិងបច្ចេកទេសលម្អិត ជាមួយសហភាពអឺរ៉ុប និងប្រទេសជប៉ុន នៅខែឧសភានេះបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ