ការិយាល័យបោះឆ្នោតទូទាំងប្រទេសត្រៀមខ្លួនស្ទើររួចរាល់ហើយដើម្បីបើកទ្វារនៅថ្ងៃអាទិត្យ
គិតត្រឹមថ្ងៃទី៣មិថុនានេះ ការិយាល័យបោះឆ្នោតទាំងអស់នៅទូទាំងប្រទេស បានត្រៀមខ្លួនស្ទើររួចរាល់ហើយ ដើម្បីបើកទ្វារទទួលម្ចាស់ឆ្នោតនៅថ្ងៃស្អែក។ បើទោះបីជាកន្លងមក គជប បានពើបប្រទះបញ្ហាមួយចំនួនក៏ដោយ ក៏អ្នកនាំពាក្យ គជប បានអះអាងប្រាប់វិទ្យុបារាំងអន្ដរជាតិថា បញ្ហាទាំងនោះត្រូវបានដោះស្រាយរួចរាល់ហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ដោយរួម ដំណើរការរៀបចំការបោះឆ្នោតនៅតាមការិយាល័យបោះឆ្នោតទាំងជាង២ម៉ឺន២ពាន់ការិយាល័យ បានសម្រេចប្រមាណ៩៩ភាគរយហើយ។ នេះបើតាមការគូសបញ្ជាក់របស់លោក ហង្ស ពុទ្ធា អ្នកនាំពាក្យ គជប នៅថ្ងៃទី៣មិថុនា។ ក្នុងនោះ បើតាមលោក ហង្ស ពុទ្ធា គជប បានបណ្ដុះបណ្ដាលមន្ដ្រីបោះឆ្នោតរបស់ខ្លួនរួចរាល់ហើយ ដើម្បីត្រៀមបើកទ្វារទទួលប្រជាពលរដ្ឋនៅម៉ោង៧ព្រឹកថ្ងៃអាទិត្យ។ ចំណែកសម្ភារៈដែលបម្រើដល់ការបោះឆ្នោត ជាអាថិ៍ សន្លឹកឆ្នោត បញ្ជីឈ្មោះបោះឆ្នោត ទឹកថ្នាំខ្មៅជ្រលក់ម្រាមដៃ ត្រាសម្ងាត់ និងបន្ទប់សម្ងាត់ជាដើម ក៏ត្រូវបានបញ្ជូនទៅដល់ដែរ និងត្រូវបានរក្សាទុកយ៉ាងហ្មត់ចត់ត្រឹមត្រូវ។
សម្រាប់ការិយាល័យបោះឆ្នោតមួយចំនួនដែលជួបបញ្ហាកាលពីថ្ងៃសុក្រ ឥឡូវត្រូវបានដោះស្រាយរួចរាល់ហើយ។ ក្នុងនោះ សម្រាប់ការិយាល័យបោះឆ្នោតក្នុងឃុំកោះជាវាំង ខេត្តបាត់ដំបង ដែលលិចទឹក សម្បូរកំប្លោក ហើយមិនអាចដឹកសម្ភារៈចូលបាន ពេលនេះអាជ្ញាធរបានសហការជាមួយប្រជាពលរដ្ឋនិងអ្នកពាក់ព័ន្ធដទៃទៀត ជួយគ្នាវែកកំប្លោកចេញ ដើម្បីអនុញ្ញាតឲ្យកាណូតលឿនដឹកជញ្ជូនសម្ភារៈបោះឆ្នោតចូលទៅបាន។ ដោយឡែក ការិយាល័យបោះឆ្នោតនៅខេត្តប៉ៃលិនដែលលិចទឹក គណៈកម្មការខេត្តរៀបចំការបោះឆ្នោត បានសម្រេចប្ដូរពីកន្លែងដែលបានគ្រោងទុក ទៅកន្លែងមួយទៀតដែលនៅមិនឆ្ងាយប៉ុន្មានពីកន្លែងចាស់។
តាមរយៈការងារដោះស្រាយបញ្ហាទាំងនេះ លោក ហង្ស ពុទ្ធា បានអះអាងប្រាប់វិទ្យុបារាំងទៀតថា គ្មានបញ្ហាអ្វីដែលប៉ះពាល់ដល់ការបោះឆ្នោតនៅថ្ងៃអាទិត្យទេ។ គជប បានអំពាវនាវដល់ពលរដ្ឋខ្មែរគ្រប់អាយុនិងមានឈ្មោះបោះឆ្នោត ត្រៀមឯកសារពាក់ព័ន្ធដែលបម្រើដល់ការបោះឆ្នោត ព្រមទាំងទៅពិនិត្យមើលឈ្មោះដែលមានបិទផ្សាយនៅតាមការិយាល័យបោះឆ្នោត។ ឬបើពុំដូច្នោះទេ ពលរដ្ឋអាចស្វែងរកឈ្មោះខ្លួនលើគេហទំព័រ ឬទាក់ទងទៅក្រុមការងារបញ្ជីបោះឆ្នោត តាមលេខទូរសព្ទ ១៨០០២០១៧ ដោយឥតគិតថ្លៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ