សេចក្តីព្រាងច្បាប់ថវិកាឆ្នាំ២០១៦ នឹងត្រូវបញ្ជូនទៅកិច្ចប្រជុំសភាពេញអង្គក្នុងពេលខាងមុខនេះ
រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ នៅព្រឹកថ្ងៃពុធនេះ បានចូលបំភ្លឺនៅចំពោះមុខគណៈ កម្មការទី២រដ្ឋសភា ទទួលបន្ទុកសេដ្ឋកិច្ច ហិរញ្ញវត្ថុ ធនាគារ និងសវនកម្មទាក់ទងទៅនឹងសេចក្តីព្រាងច្បាប់ស្តីពី៖ «ហិរញ្ញវត្ថុសម្រាប់ការគ្រប់គ្រងឆ្នាំ២០១៦»។ ការបំភ្លឺរបស់រដ្ឋមន្ត្រីហិរញ្ញវត្ថុនៅពេលនេះ បានធ្វើឡើងបន្ទាប់ពីសេចក្តីព្រាងច្បាប់នេះ បានទទួលការសម្រេចរួចហើយពី គណៈរដ្ឋមន្ត្រីកម្ពុជាកាលពីខែមុន។
ចុះផ្សាយនៅថ្ងៃ៖
បន្ទាប់ពីជួបប្រជុំអស់ពេលពេញមួយព្រឹក លោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម រដ្ឋសភាជាតិ បានថ្លែងថាគណៈកម្មការរបស់លោក បានឯកភាព និងរៀបចំបញ្ជូនសេចក្តីព្រាងច្បាប់នេះទៅកាន់គណៈកម្មាធិការអចិន្ត្រៃយ៍រដ្ឋសភា ដើម្បីដាក់ជូនកិច្ចប្រជុំសភាពសម្រេចនៅពេលខាងមុខ។
សេចក្តីព្រាងច្បាប់ស្តី «ហិរញ្ញវត្ថុសម្រាប់ការគ្រប់គ្រងឆ្នាំ២០១៦» ត្រូវបានគណៈរដ្ឋមន្ត្រីនៃប្រទេសកម្ពុជាបានប្រជុំអនុម័ត កាលពីថ្ងៃទី២១តុលា ឆ្នាំ២០១៥ កន្លងទៅ ដែលត្រូវបានគ្រោងឡើងក្នុងទឹកប្រាក់ជាង ១៧លានរៀល ស្មើនឹងជាង ៤២០០លានដុល្លារ។ គឺមានកំណើនប្រមាណជា ១៦,១ភាគរយ ធៀបនឹងច្បាប់ថវិកាជាតិឆ្នាំ២០១៥ ដែលស្មើនឹង២១,៣១ភាគរយ នៃផលិតផលសរុបក្នុងស្រុក (ផ.ស.ស)។
តាមអត្ថបទនៃសេចក្តីព្រៀងនេះ បង្ហាញថាសេចក្តីព្រាងច្បាប់ថវិកា ឆ្នាំ២០១៦នេះ គ្រោងនឹងបែងចែកទៅលើការចំណាយក្នុងវិស័យអត្ថិភាពជាច្រើន ក្នុងនោះមានវិស័យសេដ្ឋកិច្ច ដែលត្រូវបានគ្រោងចំនួនជាង ២៨៣លានដុល្លារ។ ក្រសួងកសិកម្ម ៤៦លានដុល្លារ។ ក្រសួងធនធានទឹក និងឧតុនិយម ចំនួន២៣លានដុល្លារ។ ក្រសួងសាធារណការ និងដឹកជញ្ជូន ៩០លានដុល្លារ និងក្រសួងអភិវឌ្ឍន៍ជនបទប្រមាណជា ៣៦លានដុល្លារ។
ក្រៅពីនេះក៏មានការចំណាយទៅលើវិស័យរដ្ឋបាលទូទៅផងដែរ ដែលត្រូវបានគ្រោងចំនួន ប្រមាណ ៣៩១លានដុល្លារ។ រីឯវិស័យការពារជាតិ សន្តិសុខ និងសណ្តាប់ធ្នាប់សាធារណៈវិញច្បាប់ថវិកាឆ្នាំ២០១៦ ក៏ត្រូវបានគ្រោងចំនួន ៦៥០លានដុល្លារ។ រីឯវិស័យសង្គមកិច្ចវិញ ត្រូវបាន គ្រោងថវិកាចំនួន ១.០៥០លានដុល្លារ។ ក្នុងនោះក្រសួងអប់រំ យុវជន និងកីឡាស្មើប្រមាណ ៤៩៧លានដុល្លារ។ ក្រសួងការងារ និងបណ្តុះបណ្តាលវិជ្ជាជីវៈ ៤២ លានដុល្លារ ។ ក្រសួងសុខាភិបាល ២៧២ លានដុល្លារ ។ ជាទូទៅ ការចំណាយទៅលើគ្រប់វិស័យសំខាន់ៗទាំងអស់នៅឆ្នាំ២០១៦ សុទ្ធតែមានការកើនឡើងធៀបនឹងឆ្នាំ២០១៥។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បញ្ជាក់ថាការកើនឡើងនៃការចំណាយថវិកាជាតិនៅឆ្នាំ២០១៦ គឺដោយសារមានសេចក្តីត្រូវការ ក្នុងការអនុវត្តកម្មវិធីនយោបាយរបស់រដ្ឋាភិបាល និងមានការខិតខំកៀងគរចំណូលបានប្រសើរជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ