អ្នកជំនាញអចលនវត្ថុនៅតែមានសុទិដ្ឋិនិយមចំពោះតម្រូវការផ្ទះសំបែងកើនឡើងនៅកម្ពុជា
ក្រុមអ្នកជំនាញអចលនវត្ថុបានជួបប្រជុំគ្នានៅថ្ងៃព្រហស្បតិ៍នេះ ដើម្បីពិនិត្យមើលពីស្ថានភាពអចលនវត្ថុនៅកម្ពុជានាពេលបច្ចុប្បន្ន និងទៅថ្ងៃអនាគត។ បើតាមក្រុមអ្នកវាយតម្លៃអចលនវត្ថុ តម្រូវការផ្ទះសំបែង និងខុនដូរ នៅតែមានតម្រូវការកើនឡើងពីមួយឆ្នាំទៅមួយឆ្នាំ បើទោះបីជាក្នុងរយៈពេលថ្មីៗនេះ ជនជាតិចិនជាច្រើន សម្រុកចាកចេញពីខេត្តព្រះសីហនុ និងស្ថានការណ៍នយោបាយនៅកម្ពុជាហាក់ដូចជាឡើងកម្តៅនៅពេលនេះក៏ដោយ។
ចុះផ្សាយនៅថ្ងៃ៖
ស្តាប់ - ០១:៤៧
នៅចំពោះមុខក្រុមអ្នកកាសែតរាប់សិបនាក់ លោក ហ៊ឹម សីហា នាយកផ្នែកស្រាវជ្រាវនៃក្រុមហ៊ុនVTRUST APPRAISAL បានលើកឡើងថា តាមការព្យាករណ៍នៅឆ្នាំ២០៣០ខាងមុខ តម្រូវការផ្ទះសំបែង និងខុនដូរ គឺរង្វង់៧០ម៉ឺនកន្លែងក្នុងមួយឆ្នាំ ខណៈបច្ចុប្បន្នតម្រូវការផ្ទះសំបែងមានចំនួន២ម៉ឺនខ្នង និងតម្រូវការខុនដូរចំនួន១ម៉ឺនកន្លែងក្នុងមួយឆ្នាំ។
បច្ចុប្បន្នជនជាតិខ្មែរមិនសូវចាប់អារម្មណ៍ទិញខុនដូរដូចជនបរទេសនោះទេ ប៉ុន្តែច្រើនឆ្នាំទៅមុខទៀត ជនជាតិខ្មែរនឹងងាកមកទិញខុនដូរពីជនបរទេសវិញ ហើយនឹងធ្វើឲ្យតម្លៃខុនដូរកើនឡើងទៅតាមនោះដែរ។ ការកើននៃតម្រូវការខុនដូរទៅថ្ងៃខាងមុខ បើតាមក្រុមអ្នកជំនាញ គឺ៥ឆ្នាំទៅមុខទៀត ដីនៅក្នុងទីក្រុងភ្នំពេញនឹងអស់មិនមានកន្លែងសាងសង់ផ្ទះសំបែងបានទៀតឡើយ គឺអាចសង់បានតែខុនដូរប៉ុណ្ណោះ។ ហើយក្រុមហ៊ុនផ្ទះល្វែងនឹងរត់ទៅសាងសង់ផ្ទះសំបែងនៅចំងាយយ៉ាងតិចក៏២០គីឡូម៉ែត្រពីចំណុចកណ្តាលនៃទីក្រុងភ្នំពេញ។
យ៉ាងណាក៏ដោយ នៅពេលសួរថា វិស័យអចលនវត្ថុនៅកម្ពុជា អាចនឹងរងផលប៉ះពាល់ដែរទេ នៅគ្រាដែលជនជាតិចិនជាច្រើនសម្រុកចាកចេញពីខេត្តព្រះសីហនុនៅពេលថ្មីៗនេះ និងស្ថានការណ៍នយោបាយនាពេលបច្ចុប្បន្នហាក់កំពុងតែឡើងកម្តៅនោះ ក្រុមអ្នកជំនាញអចលនវត្ថុអះអាងថា វិស័យអចលនវត្ថុនឹងមិនមានការប៉ះពាល់ឡើយ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុនៅកម្ពុជា បានគូសបញ្ជាក់ថា វិស័យដីធ្លីកំពុងតែមានសន្ទុះកើនឡើងនៅពេលនេះ គឺនៅខេត្តមួយចំនួន រួមមាន ខេត្តព្រះសីហនុ សៀមរាប បាត់ដំបង និងកំពត។ ចំណែក លោក ម៉ាន់ ច័ន្ទឌី អនុប្រធានសមាគមអ្នកវាយតម្លៃអចលនវត្ថុ ក៏អះអាងដែរថា ទីផ្សារដីឡូតិ៍គឺជាឱកាសសម្រាប់អ្នកមានប្រាក់ចំណូលមធ្យមក្នុងការវិនិយោគដើម្បីបានប្រាក់ចំណេញក្នុងរយៈពេលវែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ