សង្ឃប្រកាស ដាក់កំហិតចំពោះការប្រើប្រាស់បច្ចេកវិទ្យារបស់ព្រះសង្ឃ
អនុសំវច្ឆរមហាសន្និបាត ដែលជាការប្រជុំមន្ដ្រីសង្ឃទូទាំងប្រទេសបានបិទបញ្ចប់ហើយកាលពីម្សិលមិញ តាមរយៈការចេញសង្ឃប្រកាសដ៏សំខាន់មួយ ផ្ដោតលើការប្រើប្រាស់បច្ចេកវិទ្យារបស់ព្រះសង្ឃ។ ដោយសារតែមានការមើលឃើញថា ព្រះសង្ឃមួយចំនួន បានទទួលឥទ្ធិពលអវិជ្ជមានពីការប្រើប្រាស់បច្ចេកវិទ្យា ដូចជាបណ្តាញសង្គម Facebook ជាដើម ទើបសង្ឃប្រកាសចុះថ្ងៃទី ១៤ធ្នូ បានតម្រូវឲ្យមានការអប់រំណែនាំ និងដាក់កំហិតដល់ព្រះសង្ឃ ឲ្យងាកមកប្រើប្រាស់បច្ចេកវិទ្យានេះ ក្នុងផ្លូវត្រឹមត្រូវវិញ។ តាមសង្ឃប្រកាស ប្រសិនបើបព្វជិតពុទ្ធសាសនា អាចប្រើប្រាស់ប្រព័ន្ធនេះបានត្រឹមត្រូវ នោះនឹងផ្តល់តម្លៃធំធេងដល់ព្រះពុទ្ធសាសនា ព្រមទាំងសង្គមជាតិទាំងមូលបានច្រើន។
ចុះផ្សាយនៅថ្ងៃ៖
ស្តាប់ - ០២:២៩
មន្ត្រីសង្ឃគ្រប់លំដាប់ថ្នាក់ ជាពិសេសគឺចៅអធិការវត្ត ត្រូវអប់រំណែនាំ និងដាក់កំហិតដល់ព្រះសង្ឃ ឲ្យចេះប្រើប្រាស់បច្ចេកវិទ្យាប្រកបដោយវិន័យសីលធម៌ ប្រាសចាកភាពខុសឆ្គង និងភាពឥតសណ្តាប់ធ្នាប់ ហើយអនុញ្ញាតឲ្យប្រើប្រាស់ក្នុងការងារជាកុសល ដែលនាំប្រយោជន៍ដល់ព្រះពុទ្ធសាសនា និងសង្គមតែម្យ៉ាងប៉ុណ្ណោះ។ នេះគឺជាចំនុចសំខាន់មួយ ក្នុងចំណោមចំនុចផ្សេងទៀត នៅក្នុងសង្ឃប្រកាសបន្ទាប់ពីមានមហាសន្និបាតមន្ត្រីសង្ឃទូទាំងប្រទេសលើកទី ២៦ ដែលបានធ្វើឡើងនៅសាលមហាស្រពចតុម្មុខ រាជធានីភ្នំពេញ រយៈពេល២ថ្ងៃ ពីថ្ងៃទី ១៣ ដល់១៤ធ្នូថ្មីៗនេះ។
បើតាមសង្ឃប្រកាស ការប្រើប្រាស់បច្ចេកវិទ្យា ដែលមន្ត្រីសង្ឃជាន់ខ្ពស់ បានយកចិត្តទុកដាក់ ពីព្រោះវាមានឥទ្ធិពល ២យ៉ាង គឺវិជ្ជមាន និងអវិជ្ជមាន។ វិជ្ជមាន ដោយសារព្រះសង្ឃ អាចប្រើប្រាស់បច្ចេកវិទ្យាទំនើបនេះ ក្នុងការការងាររបស់ខ្លួន និងអភិវឌ្ឍវិស័យព្រះពុទ្ធសាសនា។ ប៉ុន្តែមានព្រះសង្ឃមួយចំនួនតូច បានប្រើប្រាស់បច្ចេកវិទ្យានេះ ដែលបានធ្វើឲ្យប៉ះពាល់ដល់តម្លៃព្រះសង្ឃ និងពុទ្ធសាសនា។ តាមការសង្កេតជាក់ស្តែង ព្រះសង្ឃនាពេលបច្ចុប្បន្ន មួយចំនួនធំ បានប្រើប្រាស់បណ្តាញសង្គម ដើម្បីផ្សព្វផ្សាយពីសាសនា ប៉ុន្តែក៏មានមួយចំនួនតូច បានប្រើប្រាស់ដើម្បីភាពកម្សាន្តរីករាយហួសប្រមាណ ដែលបណ្តាលឲ្យខុសវិន័យ រហូតមានព័ត៌មានពីការចាប់ផ្សិកជាបន្តបន្ទាប់។
ក្រៅពីប្រការនេះ នៅក្នុងសង្ឃប្រកាសដែលមានព្រះសង្ឃចូលរួមប្រមាណ ៧០០អង្គនោះ ក៏មានលើកឡើងពី ការបន្តជម្រុញសម្រាប់ការអប់រំសាសនា គឺសាលាពុទ្ធិកបឋមសិក្សា នៅតាមមូលដ្ឋានទូទាំងប្រទេស ដើម្បីពង្រឹងគុណភាពអប់រំដល់សមណសិស្ស និស្សិត ឲ្យយល់ពីតម្លៃនៃភាសាបាលី សំស្រ្កឹត និងពុទ្ធសាសនវិជ្ជាផងដែរ។ លើសពីនេះ ក៏មានការតម្រូវឲ្យគ្រប់វត្តអារាម ពង្រឹងការបដិបត្តិធម៌វិន័យ ឲ្យបានខ្ជាប់ខ្ជួន សម្តៅអប់រំកាយ វាចា ចិត្តឲ្យព្រះសង្ឃសមជាសមណភេទ។ ហើយព្រះសង្ឃគ្រប់អង្គ ក៏ត្រូវតែចូលរួមអប់រំសីលធម៌ ដល់ទំពាំងស្នងឬស្សីជំនាន់ក្រោយ ឲ្យបានស៊ីជម្រៅ នៅគ្រប់គ្រឹះស្ថានរដ្ឋ និងឯកជន។
សូមបញ្ជាក់ថា ប្រទេសកម្ពុជា គឺជាប្រទេសប្រកាន់នូវព្រះពុទ្ធសាសនា ដែលក្នុងមួយឆ្នាំៗ មានពិធីសាសនាជាច្រើនហូរហែ។ ការប្រតិបត្តិតាមគន្លងព្រះពុទ្ធសាសនា ត្រូវបានឲ្យតម្លៃថាដើម្បីលើកតម្កើងសីលធម៌ក្នុងសង្គម។ ប៉ុន្តែទោះមិនមានការវាយតំលៃណាមួយជាក់លាក់ គេសង្កេតឃើញថា បច្ចុប្បន្នសីលធម៌ក្នុងសង្គម ហាក់ដូចជាបានធ្លាក់ចុះ តាមរយៈការមិនគោរពសិទ្ធិគ្នាទៅវិញទៅមក ការរំលោភបំពាន និងការប្រព្រឹត្តប្រាស់ចាកសីលធម៌មនុស្សធ្ងន់ធ្ងរជាដើម។ ទាំងនេះ ជាកង្វល់របស់មន្ត្រីសង្ឃគ្រប់លំដាប់ថ្នាក់ ពីព្រោះគេយល់ឃើញថា ព្រះសង្ឃគ្រប់អង្គ គួរតែជាគម្រូ ជាអ្នកផ្សាយធម៌ ដើម្បីកែប្រែស្ថានភាពឲ្យប្រសើរ ជាជាងការបន្តធ្វើឲ្យដុនដាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ