ក្រសួងព័ត៌មានបញ្ជាក់ពីគ្រោះថ្នាក់ចរាចរណ៍នៅរតនគីរីមិនមែនជាការប៉ុនប៉ងធ្វើឃាតអ្នកកាសែតទេ
អ្នកនាំពាក្យក្រសួងព័ត៌មាននៅថ្ងៃចន្ទទី ២៧ខែកុម្ភៈ ឆ្នាំ ២០១៧នេះ បានចេញផ្សាយសេចក្តីប្រកាសជាផ្លូវការមួយ ដោយទាត់ចោលការលើកឡើងរបស់ក្រុមប្រឹក្សាសារព័ត៌មានកម្ពុជាពី ករណីប៉ុនប៉ងធ្វើឃាតលើអ្នកសារពត៌មាន នៅក្នុងស្រុកវើនសៃ ខេត្តរតនគីរី កាលពីខែមុន។ ការបញ្ជាក់នេះ បានធ្វើឡើងបន្ទាប់ពីក្រសួងព័ត៌មានចាត់ឲ្យមានការស៊ើបអង្កេតជាលើកដំបូងអស់រយៈពេល ៣ថ្ងៃ ដែលមានការចូលរួមពីអង្គភាពពាក់ព័ន្ធនានា និងអាជ្ញាធរដែនដី។
ចុះផ្សាយនៅថ្ងៃ៖
ស្តាប់ - ០២:០៩
«គ្មានហេតុផលណាមួយដែលអាចធ្វើការសន្និដ្ឋានបានថា មានការប៉ុនប៉ងធ្វើឃាតលើក្រុមអ្នកសារព័ត៌មាន» ក្នុងឧបទ្ទវហេតុ នៅស្រុកវើនសៃ ខេត្តរតនគីរីនោះឡើយ។ នេះគឺជាការប្រកាសរបស់អ្នកនាំពាក្យក្រសួងព័ត៌មាន បន្ទាប់ពីមានការបង្កើតគណៈកម្មការចំរុះចំពោះកិច្ចមួយ ដែលមានការចូលរួមពី សមាគមសារព័ត៌មានធំៗចំនួន ៣គឺ ក្លឹបអ្នកកាសែតកម្ពុជា សមាគមកម្ពុជាការពារអ្នកកាសែត និងសហភាព សហព័ន្ធអ្នកសារព័ត៌មានកម្ពុជា ចុះទៅស៊ើបអង្កេតដល់ខេត្តរតនគីរី ដោយផ្ទាល់។
បន្ទាប់ពីចុះទៅកាន់ស្រុកវើនសៃ ខេត្តរតនគីរី កាលពីថ្ងៃទី ១៤ដល់ ១៨កុម្ភៈ កន្លងមក គណៈកម្មការ ដែលដឹកនាំដោយក្រសួងព័ត៌មាននេះ បានធ្វើការសន្និដ្ឋានថា ករណីគ្រោះថ្នាក់ ប៉ះទង្គិចគ្នារវាងរថយន្តច្នៃនិងរថយន្ត ១គ្រឿង របស់អ្នករួមដំណើរ ១នាក់ជាមួយអ្នកសារព័ត៌មាន អាចជាករណីគ្រោះថ្នាក់ចរាចរណ៍ច្រើនជាង។
មួយវិញទៀត ករណីវាយបំបែកកញ្ចក់រថយន្តរបស់អ្នកសារព័ត៌មាន ពុំមានភស្តុតាងដាក់បន្ទុក ដូចការចោទប្រកាន់នោះឡើយ ដោយហេតុថា ពុំមានសាក្សីក្រៅពីខ្លួនឯង ហើយគ្មានរូបថតណាដែលបង្ហាញពីសកម្មភាពរបស់អ្នកវាយប្រហារ ឬ ព្រនង់ ឬ ដុំថ្ម ឬវត្ថុផ្សេង នៅពេលក្រុមអ្នកសារព័ត៌មាន សុទ្ធតែមានម៉ាស៊ីនថត ដាក់តាមខ្លួនទាំងអស់គ្នា។
អ្នកនាំពាក្យក្រសួងព័ត៌មានបន្តថា ការចូលក្នុងរបងផ្ទះរបស់ពលរដ្ឋ ដោយក្រុមអ្នកសារព័ត៌មាន បានធ្វើឲ្យពលរដ្ឋមានការភ័យខ្លាច ដោយសារក្រុមនេះ គម្រាមចាប់ពលរដ្ឋដាក់ខ្នោះបើសិនមិនបើកទ្វារ ឲ្យពួកគាត់ឆែកឆេរ ហើយនេះ គឺជាការប្រើសិទ្ធិហួសពីវិជ្ជាជីវៈសារព័ត៌មាន ខណៈដែលផ្ទះប្រជាជនធ្វើពីឈើ និងមានឈើក្តារបួន ដប់ដុំ រៀងៗគ្រួសារដែរ។
សូមបញ្ជាក់ថា «ក្រុមប្រឹក្សាសារព័ត៌មានកម្ពុជា» កាលពីថ្ងៃទី ១កុម្ភៈ ឆ្នាំ ២០១៧ បានស្នើសុំអន្តរាគមន៍ទៅក្រសួងព័ត៌មានជួសសមាជិករបស់ខ្លួនចំនួន ៦នាក់និងមន្ត្រីអង្គការក្រៅរដ្ឋាភិបាលម្នាក់ ដោយលើកហេតុផលថា ឧបទ្ទវហេតុគ្រោះថ្នាក់ចរាចរណ៍ និងការវាយកំទេចរថយន្តអ្នកកាសែត ៣គ្រឿង នៅកន្លែង ២ផ្សេងគ្នា គឺជាការប៉ុនប៉ងធ្វើឃាតលើអ្នកកាសែត។
សូមបញ្ជាក់ថា អ្នកកាសែតមួយចំនួន នៅតាមបណ្តាខេត្តជាញឹកញាប់តែងប៉ះទង្គិចជាមួយនឹង ឈ្មួញរកស៊ីឈើ ដោយសារពួកគេបានប្រព្រឹត្តខុសវិជ្ជាជីវៈ ដើរតួនាទីជាសមត្ថកិច្ច ក្នុងការតាមចាប់ការរត់ពន្ធឈើ និងអំពើល្មើសផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ