ក្រសួងសាធារណការនិងដឹកជញ្ជូនទើបភ្ញាក់ពីដំណេក
ក្រុមហ៊ុនដឹកជញ្ជូនអ្នកដំណើរមួយចំនួនបានបញ្ចុះតម្លៃធ្វើដំណើរស្របទៅតាមស្ថានភាពទីផ្សារប្រេងឥន្ធនៈ ដែលបានធ្លាក់ថ្លៃច្រើននៅក្នុងប្រទេសកម្ពុជា។ ការបញ្ចុះតម្លៃនេះ បានធ្វើឡើងមុនការចេញសេចក្តីអំពាវនាវរបស់ក្រសួងសាធារណការកាលពីដំណាច់ខែមករា ដែលស្នើឲ្យក្រុមហ៊ុនដឹកអ្នកដំណើរចុះថ្លៃសេវាកម្មរបស់ខ្លួន។ សេចក្តីអំពាវនាវនេះរងការសាទរផងចំអកផងពីសាធារណជន។
ចុះផ្សាយនៅថ្ងៃ៖
ស្តាប់ - ០២:០៩
ក្រសួងសាធារណការទទូចសុំឲ្យក្រុមហ៊ុនដឹកជញ្ជូនអ្នកដំណើរទាំងអស់ពិចារណាកំណត់តម្លៃជិះរថយន្តឲ្យបានទាបជាងមុន សមស្របទៅតាមតម្លៃប្រេងឥន្ធនៈ អាចជាការជួយសម្រាល
បន្ទុកដល់ប្រជាពលរដ្ឋដែលមានប្រាក់ចំណូលទាប។
នៅក្នុងលិខិតអំពាវនាវមួយរបស់ក្រសួងសាធារណការនិងដឹកជញ្ជូន ដែលចុះកាលបរិច្ឆេទនៅថ្ងៃទី៣០ មករា ហើយទើបតែធ្លាយដល់សារព័ត៌មាននៅថ្ងៃព្រហស្បតិ៍ម្សិលមិញ អគ្គនាយកដឹកជញ្ជូនស្តីទីលោកឥម នីថារ៉ា បានសរសេររៀបរាប់ពីការមើលឃើញដូច សាធារណៈជនដែរថា មួយរយៈកន្លងទៅនេះតម្លៃប្រេងឥន្ធនៈនៅប្រទេសកម្ពុជាបានធ្លាក់ចុះជាងមុនគឺពី ៥២០០រៀល មកត្រឹម៣៦០០រៀលក្នុងមួយលីត្រ។
អ្នកប្រចាំការផ្នែកលក់សំបុត្ររថយន្តដឹកអ្នកដំណើរកំពតអ៊ិចប្រេស អ្នកនាង វុត្ថា ប្រាប់វិទ្យុRFI
ថានៅមិនទាន់បានទទួលការជូនដំណឹងទេ តែក្រុមហ៊ុនដឹកជញ្ជូនមួយនេះមិនបានប្រែប្រួលតម្លៃសំបុត្រឡើយនៅពេលដែលសាំងឡើងថ្លៃ ដូច្នេះពេលសាំងចុះថ្លៃក៏តម្លៃធ្វើដំណើរក្រុមហ៊ុនមិនប្រែប្រួលដែរគឺថ្លៃ៦ដុល្លារថេរជាយូរមកហើយសម្រាប់ការធ្វើដំណើរពីភ្នំពេញទៅ កំពត។
លោកប៉ាង ម៉ារីន មេការក្រុមហ៊ុនដឹកជញ្ជូនអ្នកដំណើរដោយរថយន្តក្រុងឈ្មោះ រិទ្ធិ មុនី ក៏បានប្រាប់ដែរថាក្រុមហ៊ុនរបស់លោកបានបញ្ចុះតម្លៃជាក់ស្តែងទៅតាមតម្លៃប្រេងសាំងរួចហើយ បើទោះណាជាមិនទាន់ដឹងពីលិខិតអំពាវនាវរបស់ក្រសួងសាធារណការក៏ដោយ។ ការចុះថ្លៃនេះត្រូវបានធ្វើឡើងនៅតាមបណ្តាញផ្លូវរត់ទូទាំងប្រទេស ជាក់ស្តែងពីភ្នំពេញទៅបាត់ដំបងក្រុមហ៊ុននេះ បានចុះថ្លៃពី៣ម៉ឺនរៀល ទៅ២ម៉ឺនរៀល។
ដោយឡែក អង្គការសង្គមស៊ីវិលបានចំអកផង អបអរផងថា ការចេញលិខិតអំពាវនាវរបស់ក្រសួងសាធារណការនិងដឹកជញ្ជូន ហាក់ដូចជាយឺតយ៉ាវ ខណៈដែលប្រេងឥន្ធនៈបានចុះថ្លៃជាងមួយខែទៅហើយ។ ក៏ប៉ុន្តែមិនថ្វីទេ ការអំពាវនាវរបស់ក្រសួងសាធារណការនៅពេលនេះ ក៏ចំពេលដែលទីផ្សារប្រេងឥន្ធនៈកំពុងស្ថិតក្នុងស្ថានភាពចុះថ្លៃនៅឡើយ។ គេនៅមិនទាន់ដឹងថាសេចក្តីអំពាវនាវនេះមានប្រសិទ្ធភាពជាទូទៅឬយ៉ាងណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ