ក្រសួងដែនដី បដិសេធព័ត៌មានដែលថាអាល្លឺម៉ង់នឹងផ្តាច់ជំនួយផ្នែកដីធ្លី
ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីប្រកាសព័ត៌មានមួយកាលពីម្សិលមិញ ដោយច្រានចោលព័ត៌មានដែលថា“រដ្ឋាភិបាលអាល្លឺម៉ង់នឹងឈប់ផ្តល់ជំនួយផ្នែកកិច្ចការដីធ្លីដល់កម្ពុជា”។ សេចក្តីប្រកាសព័ត៌មានបានសរសេរថា ការផ្សព្វផ្សាយព័ត៌មាននេះ មិនបានឆ្លុះបញ្ចាំងពីការពិត និង មិនបានបង្ហាញពីសមិទ្ធិផលដែលសម្រេចបាន ពីកិច្ចសហប្រតបត្តិការកម្ពុជា-អាល្លឺម៉ង់។
ចុះផ្សាយនៅថ្ងៃ៖
ស្តាប់ - ០១:៥៥
ការចេញផ្សាយសេចក្តីប្រកាសនេះ គឺធ្វើឡើងដើម្បីតបនឹងការផ្សាយព័ត៌មានកាលពីថ្ងៃសុក្រទី ០៥ ខែកុម្ភៈ របស់ស្ថាប័នព័ត៌មានមួយចំនួន។
ក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ភាគីអាល្លឺម៉ង់បានទទួលស្គាល់នូវវឌ្ឍនភាព និង ភាពជោគជ័យ នៃកិច្ចសហប្រតិបត្តិការ ដែលសម្រេចបាននៅលើវិស័យដីធ្លី ក្នុងរយៈពេល ២០ឆ្នាំកន្លងមក។ ក្រសួងបន្តថា ជំនួយរបស់ភាគីអាល្លឺម៉ង់ បានផ្តល់នូវចំណេះដឹង និង ជំនាញដល់ភាគីកម្ពុជា ព្រមទាំងបានរួមចំណែកក្នុងកម្មវិធីកំណែទម្រង់វិស័យដីធ្លីនៅក្នុងប្រទេសនេះផងដែរ។
ដោយច្រានចោលព័ត៌មានដែលថា“រដ្ឋាភិបាលអាល្លឺម៉ង់នឹងឈប់ផ្តល់ជំនួយផ្នែកកិច្ចការដីធ្លីដល់កម្ពុជា” ក្រសួងរៀបចំដែនដី នគរូបនីយកម្ម និងសំណង់ ពន្យល់ថា ជំនួយបច្ចេកទេសរបស់អាល្លឺម៉ង់ លើកម្មវិធីដីធ្លី នឹងត្រូវបញ្ចប់នៅដំណាច់ខែមិថុនា ឆ្នាំ ២០១៦ខាងមុខ តាមកិច្ចព្រមព្រាងសហប្រតិបត្តិការទ្វេរភាគី មិនមែនដោយមូលហេតុបរាជ័យនោះទេ។
ក្រសួងបន្តទៀតថា ក្រសួងនៅបន្តទទួលជំនួយបច្ចេកទេសរបស់អាល្លឺម៉ង់ លើគម្រោងលើកកម្ពស់ជីវភាព រស់នៅ និង សន្តិសុខស្បៀង ជាបន្តទៀតរហូតដល់ដំណាច់ខែកញ្ញា ឆ្នាំ២០១៧ ឯណោះ។ ហើយគម្រោងនេះ នឹងត្រូវអនុវត្តចំពោះប្រជាពលរដ្ឋដែលទទួលបានដីសម្បទានសង្គមកិច្ចពីរដ្ឋាភិបាល នៅក្នុងខេត្តក្រចេះ ខេត្តត្បូងឃុំ និង ខេត្តកំពង់ធំ។
វិទ្យុបារាំងអន្តរជាតិ មិនអាចទាក់ទងសុំការបំភ្លឺពីមន្ត្រីស្ថានទូតអាល្លឺម៉ង់ប្រចាំប្រទេសកម្ពុជាបានទេ នៅថ្ងៃអាទិត្យនេះ។
ប៉ុន្តែ លោក គិត ទូច មន្ត្រីជាន់ខ្ពស់កម្មវិធីអភិបាលកិច្ចល្អ និងជាអ្នកតាមដានបញ្ហាដីធ្លី របស់មជ្ឈមណ្ឌលអប់រំច្បាប់សម្រាប់សហគមន៍ បានឲ្យដឹងថា មួយរយៈពេលចុងក្រោយនេះ ម្ចាស់ជំនួយភាគច្រើនដែលធ្វើការពាក់ព័ន្ធនឹងវិស័យដីធ្លី ដូចជា ហ្វាំងឡង់ អាល្លឺម៉ង់ និង សុយអ៊ែត ជាដើម មាននិន្នការចាកចេញពីកម្ពុជា។ ការចាកចេញនេះ មកពីកម្ពុជា មានធនធានមនុស្សដែលអាចម្ចាស់ការបានដោយខ្លួនឯង ក្នុងការគ្រប់គ្រងវិស័យដីធ្លី ព្រមទាំងមានគោលនយោបាយដីធ្លី រួចស្រេចបាច់អស់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ