ក្រសួងការងារទាត់ចោលរបាយការណ៍អង្គការឃ្លាំមើលសិទ្ធិមនុស្សរឿងការរំលោភសិទ្ធិការងារនៅកម្ពុជា
ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃសុក្រ ម្សិលមិញ បានចេញសេចក្តីប្រកាសព័ត៌មានមួយសម្តែងការសោកស្តាយ និងបដិសេធចំពោះរបាយការណ៍របស់អង្គការឃ្លាំមើលសិទ្ធិមនុស្ស(Humnan Right Watch)ដែលបានលើកឡើងពីការរំលោភសិទ្ធិការងារនៅក្នុងឧស្សាហកម្មកាត់ដេរនៅកម្ពុជា។ ក្រសួងការងារ បានហៅការលើកឡើងរបស់អង្គការអន្តរជាតិនេះ ថា បានរំលោភលើវិជ្ជាជីវៈរបស់ក្រសួង ដែលបាន និងកំពុងបំពេញការងារនេះប្រកបដោយវិជ្ជាជីវៈ និងប្រសិទ្ធភាព។
ចុះផ្សាយនៅថ្ងៃ៖
ស្តាប់ - ០២:៥៣
មួយថ្ងៃបន្ទាប់ អង្គការឃ្លាំមើលសិទ្ធិមនុស្ស(Human Right Watch) បានចេញរបាយការណ៍មួយស្តីការរំលោភសិទ្ធិការងារនៅកម្ពុជា គឺថ្ងៃសុក្រម្សិលមិញ ក្រសួងការងារ និងបណ្តុះបណ្តាលវិជ្ជាជីវៈ បានចេញមុខទាត់ចោលនូវរបាយការណ៍នោះ។ នៅក្នុងសេចក្តីប្រកាសព័ត៌មានរបស់ខ្លួន ក្រសួងការងារបានចាត់ទុករបាយការណ៍នោះថា គ្មានមូលដ្ឋានវិជ្ជាជីវៈច្បាស់លាស់។
គួរបញ្ជាក់ថា កាលពីថ្ងៃព្រហស្បតិ៍ ទី១២ មីនា ក្នុងសប្តាហ៍នេះ អង្គការឃ្លាំមើលសិទ្ធិមនុស្ស(Human Right Watch) បានចេញរបាយការណ៍មួយស្តីការរំលោភសិទ្ធិការងារនៅក្នុងឧស្សាហកម្មកាត់ដេរនៅកម្ពុជាក្រោមចំណងជើងថា “Work Faster or Get out : Labor Rights Abuses in Cambodia’s Garment Industry”។ នៅក្នុងរបាយការណ៍ជាភាសាអង់គ្លេសកម្រាស់១៤០ទំព័ររបស់ខ្លួននេះ អង្គការឃ្លាំមើលសិទ្ធិមនុស្ស(Human Right Watch) បានលើកឡើងជាច្រើនពីការរំលោភសិទ្ធិការងារនៅក្នុងវិស័យកាត់ដេរកម្ពុជា ដូចជាការធ្វើកិច្ចសន្យាការងាររយៈពេលខ្លីដែលផ្តល់ភាពងាយស្រួលដល់ចៅកែរោងចក្រក្នុងបណ្តេញចេញ និងគ្រប់គ្រងកម្មករ ពេលវេលាសម្រាកតិចតួច និងការប្រើប្រាស់មធ្យោបាយគ្រប់យ៉ាង ដើម្បប្រឆាំងនឹងសហជីពឯករាជ្យជាដើម។ចំពោះការលើកឡើងនេះ ក្រសួងការងារកម្ពុជា បានឆ្លើយតបថា កន្លងមក ក៏ដូចពេលបច្ចុប្បន្នដែរ សហគមន៍អន្តរជាតិ អ្នកបញ្ជាទិញ និងអង្គការអន្តរជាតិខាងការងារ(ILO) បានគាំទ្រ និងទទួលស្គាល់ថា លក្ខខណ្ឌការងារនៅកម្ពុជាមានភាពល្អប្រសើរ ស្របតាមបទដ្ឋានអន្តរជាតិ។
ក្រៅពីនេះ អង្គការឃ្លាំមើលសិទ្ធិមនុស្ស(Human Right Watch) ក៏បានលើកឡើងពីការបង្ខំឲ្យកម្មករធ្វើការថែមម៉ោង និង ការចុះធ្វើអធិការកិច្ចការងារពីសំណាក់រដ្ឋាភិបាលកម្ពុជានៅមានកម្រិតទាបនៅឡើយផងដែរ។ បើតាមអង្គការអន្តរជាតិដដែល ៩៤ភាគរយនៃរោងចក្រទាំងអស់ដែលបានត្រួតពិនិត្យដោយកម្មវិធីគម្រោងរោងចក្រកាន់តែប្រសើរនៅកម្ពុជាចន្លោះខែឧសភា ឆ្នាំ២០១៣ ដល់ខែមេសាឆ្នាំ២០១៤ បានរកឃើញថា បានរំលោភលើច្បាប់ស្តីពីការធ្វើការថែមម៉ោងពិសេស។ ចំពោះការចុះធ្វើអធិការកិច្ចការងារពីសំណាក់រដ្ឋាភិបាលកម្ពុជាវិញ អង្គការឃ្លាំមើលសិទ្ធិមនុស្ស(Human Right Watch) បានបង្ហាញថា ក្នុងចំណោមការចុះធ្វើអធិការកិច្ចការងាររាប់ពាន់លើករបស់រដ្ឋាភិបាលកម្ពុជាចន្លោះពីខែមករា ឆ្នា២០០៩ ដល់ខែធ្នូឆ្នាំ២០១៣កន្លងទៅ គឺរដ្ឋាភិបាល បានធ្វើការពិន័យរោងចក្រ សហគ្រាសតែ១០លើកប៉ុណ្ណោះ។
ផ្ទុយពីការលើកឡើងនេះ ក្រសួងការងារបានថ្លែងការពារថា ខ្លួនបាននឹងកំពុងយកចិត្តទុកដាក់ពង្រឹងយន្តការ និងប្រសិទ្ធភាពនៃអធិការកិច្ចការងារ និង ដាក់ពិន័យដល់សហគ្រាស គ្រឹះស្ថានទាំងឡាយណាដែលបានល្មើសនឹងបទបញ្ញត្តិច្បាប់ស្តីពីការងារ។ ជាក់ស្តែងនៅក្នុងឆ្នាំ២០១៤ ក្រុមអធិការកិច្ចការងារចំនួន៤៩ក្រុម បានធ្វើអធិការកិច្ចការងារចំនួន៧១៩១លើក ហើយបានដាក់កំហិតលើសហគ្រាស គ្រឹះស្ថានចំនួន៨០៥ និងបានផាកពិន័យចំនួន១២៨។ ជាមួយគ្នានេះ ក្រសួងការងារបានគូសបញ្ជាក់ថា ការលើកឡើងរបស់អង្គការឃ្លាំមើលសិទ្ធិមនុស្ស(Human Right Watch) គឺមិនអាចទទួលយកបានទេ ព្រោះថា បានរំលោភលើវិជ្ជាជីវៈរបស់ក្រសួង និងកម្មវិធីគម្រោងរោងចក្រកាន់តែប្រសើរនៅកម្ពុជារបស់អង្គការអន្តរជាតិខាងការងារដែលបាននឹងកំពុងបំពេញការងារ ប្រកបដោយវិជ្ជាជីវៈ និងប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ