ក្រសួងយុត្តិធម៌ បង្កើតក្រុមការងារពិសេស ដើម្បីពិនិត្យបែបបទ និងនីតិវិធីនៃការប្រឡងសិស្សចៅក្រម
រឿងរ៉ាវចម្រូងចម្រាស់ជុំវិញការប្រឡងជ្រើសរើសសិស្សចៅក្រម នៃរាជបណ្ឌិតសភាវិជ្ជាជីវៈតុលាការនៅតែបន្ត។ ក្រសួងយុត្តិធម៌ កាលពីម្សិលមិញ បានសម្រេចបង្កើតក្រុមការងារពិសេសមួយ ដើម្បីធ្វើការពិនិត្យឡើងវិញនូវបែបបទ ក៏ដូចជានីតិវិធីនៃការប្រឡងសិស្សចៅក្រម។ ជាការប្រឡង ដែលគ្រោងរៀបចំឡើងនៅថ្ងៃទី៨ ដល់ថ្ងៃទី៩ ខែធ្នូខាងមុខ ប៉ុន្តែត្រូវបានរដ្ឋមន្ដ្រីក្រសួងយុត្តិធម៌ សម្រេចលើកពេលគ្មានកាលកំណត់។
ចុះផ្សាយនៅថ្ងៃ៖
ស្តាប់ - ០២:០២
បន្ទាប់ពីបើកកិច្ចប្រជុំនៅថ្ងៃទី៣០ ខែវិច្ឆិកា ក្រសួងយុត្តិធម៌ បានសម្រេចបង្កើតក្រុមការងារពិសេសមួយ។ ក្រុមពិសេសនេះ នឹងធ្វើការពិនិត្យឡើងវិញនូវរាល់បែបបទ ក៏ដូចជានីតិវិធីនៃការប្រឡងសិស្សចៅក្រមជំនាន់ទី៧ នៃរាជបណ្ឌិតសភាវិជ្ជាជីវៈតុលាការ ដើម្បីធានាតម្លាភាព ភាពត្រឹមត្រូវ និងយុត្តិធម៌នៃការប្រឡង។ ជាក្រុមការងារ ដែលមានសមាសភាព៨រូប ដឹកនាំដោយលោក ហ៊ី សោភា ជាប្រធាន អមដោយអនុប្រធាន២រូប និងសមាជិក៥រូបផ្សេងទៀត។ លោក ជីន ម៉ាលីន អ្នកនាំពាក្យនៃក្រសួងយុត្តិធម៌ បញ្ជាក់ប្រាប់វិទ្យុបារាំងអន្ដរជាតិថា ក្រុមការងារពិសេសនេះ នឹងចាប់ផ្ដើមធ្វើការតាំងពីថ្ងៃអង្គារនេះតទៅហើយ។
ទន្ទឹមនឹងការបង្កើតក្រុមការងារពិសេសនេះ លោក អង្គ វង្ស វឌ្ឍានា រដ្ឋមន្ដ្រីក្រសួងយុត្តិធម៌ ក៏បានសម្រេចលើកពេលនេះ ការប្រឡងសិស្សចៅក្រមជំនាន់ទី៧ ដោយគ្មានកាលកំណត់ផងដែរ។ នេះបើតាមលិខិតរបស់លោក អង្គ វង្ស វឌ្ឍានា ផ្ញើទៅកាន់ប្រធានរាជបណ្ឌិតសភាវិជ្ជាជីវៈតុលាការ។ លិខិតចុះថ្ងៃទី៣០ ខែវិច្ឆិកា បញ្ជាក់ថា ក្រសួងបានសម្រេចលើកពេលនៃការប្រឡង និងសម្រេចបញ្ជូនក្រុមការងាររបស់ក្រសួង ដើម្បីធ្វើការពិនិត្យឡើងវិញនូវបែបបទ និងនីតិវិធីនៃការប្រឡង ក្នុងគោលបំណងធានាឲ្យកាន់តែមានតម្លាភាព និងភាពត្រឹមត្រូវយុត្តិធម៌។
គួរកត់សម្គាល់ថា ចំណាត់ការរបស់ក្រសួងយុត្តិធម៌ពេលនេះ ធ្វើឡើងបន្ទាប់ពីអង្គភាពប្រឆាំងអំពើពុករលួយ បដិសេធមិនចូលរួមសង្កេតការណ៍ដំណើរការប្រឡងប្រជែងជ្រើសរើសសិស្សចៅក្រមជំនាន់ទី៧។ នៅក្នុងលិខិតចុះថ្ងៃទី២៧ វិច្ឆិកា លោក ឱម យ៉ិនទៀង ប្រធានអង្គភាពប្រឆាំងអំពើពុករលួយលើកឡើងថា រាជបណ្ឌិតសភាវិជ្ជាជីវៈតុលាការ គ្មានឆន្ទៈ និងមិនមានការសហការល្អជាមួយអង្គភាពប្រឆាំងអំពើពុករលួយ។
ការសម្រេចមិនចូលរួមសង្កេតការណ៍របស់អង្គភាពប្រឆាំងអំពើពុករលួយ ធ្វើឲ្យលោក អំ សំអាត មន្ដ្រីស៊ើបអង្កេតជាន់ខ្ពស់នៃអង្គការលីកាដូ ខកចិត្ត និងសោកស្ដាយយ៉ាងខ្លាំង។ លោក អំ សំអាត សង្កត់ធ្ងន់ថា ការចូលរួមរបស់អង្គភាពប្រឆាំងអំពើពុករលួយមានសារៈសំខាន់ណាស់ ដើម្បីបញ្ចៀស និងបញ្ចប់ភាពមិនប្រក្រតី ក៏ដូចជាអំពើពុករលួយ ដែលអាចកើតមានឡើងនៅពេលប្រឡងសិស្សចៅក្រមនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ